ویتنام میں ہندوستانی سفارت خانے نے کہا ہے کہ ہنوئی میں سفارت خانہ اور ہو چی منہ سٹی میں قونصل خانہ متعلقہ ریاستی حکومتوں کے ساتھ مسلسل رابطے میں ہیں تاکہ میتوں کو جلد از جلد ان کے آبائی مقامات تک پہنچایا جا سکے۔ سفارت خانے نے سماجی رابطے کے پلیٹ فارم ایکس پر جاری بیان میں کہا کہ اس سانحے میں جاں بحق ہونے والوں کے اہل خانہ کے ساتھ ہماری دعائیں ہیں اور ہر ممکن تعاون جاری رکھا جائے گا۔
اس سے قبل سفارت خانے نے اطلاع دی تھی کہ 15 ہندوستانی شہریوں کی میتیں ویتنام ایئرلائنز کی پرواز وی این 979 کے ذریعے ہو چی منہ سٹی سے روانہ کی گئی تھیں۔ متعلقہ ریاستی حکومتوں کو پہلے ہی مطلع کر دیا گیا تھا تاکہ ممبئی پہنچنے کے بعد میتوں کی اپنے اپنے شہروں تک منتقلی کے انتظامات کیے جا سکیں۔ سفارت خانے اور ہو چی منہ سٹی میں قونصل خانے نے فو کوک خصوصی اقتصادی زون۔ آن جیانگ صوبے۔ ہو چی منہ سٹی کے محکمہ خارجہ۔ ویتنام کی وزارت خارجہ اور دیگر اداروں کا بھی تعاون پر شکریہ ادا کیا۔
یہ حادثہ 11 جولائی کو اس وقت پیش آیا تھا جب سیاحوں کو لے جانے والی ایک تیز رفتار کشتی فو کوک جزیرے کے قریب ہون مائے رت نگوائی جزیرے کے نزدیک خراب موسم کی زد میں آ کر الٹ گئی۔ کشتی میں 32 ہندوستانی سیاح اور عملے کے 4 ویتنامی ارکان سمیت مجموعی طور پر 36 افراد سوار تھے۔
ویتنامی حکام کے مطابق کشتی ہون مائے رت جزیرے سے آن تھوئی بندرگاہ جا رہی تھی کہ شدید لہروں کے باعث الٹ گئی اور تمام افراد سمندر میں جا گرے۔ قریب موجود دیگر سیاحتی کشتیوں نے فوری طور پر امدادی کارروائیاں شروع کیں جبکہ بعد میں ریسکیو ٹیموں نے تمام افراد کو ساحل پر منتقل کیا۔ حادثے میں 21 افراد کو بچا لیا گیا جبکہ 15 سیاح ہلاک ہوگئے۔
جاں بحق ہونے والوں میں 10 کا تعلق تمل ناڈو۔ 3 کا آندھرا پردیش اور 2 کا کیرالہ سے تھا۔
حادثے کے بعد ہندوستانی سفارت خانے نے ویتنامی حکام کے ساتھ مل کر شناخت۔ قانونی کارروائیوں اور قونصلر امور کی تکمیل کی۔ ساتھ ہی زندہ بچ جانے والے افراد اور ان کے اہل خانہ کو بھی ہر ممکن مدد فراہم کی گئی۔
سفارت خانے نے ایک شدید زخمی ہندوستانی شہری کی صحت سے متعلق بھی تازہ معلومات دیتے ہوئے بتایا کہ ان کا کامیاب طبی عمل مکمل ہو چکا ہے اور انہیں فو کوک سے ہو چی منہ سٹی کے ایک جدید اسپتال منتقل کر دیا گیا ہے۔ ان کے اہل خانہ بھی وہاں پہنچ چکے ہیں اور ان کی جلد صحت یابی کے لیے دعائیں کی جا رہی ہیں۔
آندھرا پردیش۔ تمل ناڈو اور کیرالہ کی حکومتوں نے ممبئی پہنچنے کے بعد میتوں کی اپنے اپنے علاقوں تک منتقلی کے خصوصی انتظامات کیے ہیں۔
آندھرا پردیش بھون کے مطابق مرکزی وزیر شہری ہوا بازی کنجاراپو رام موہن نائیڈو کی مداخلت اور ویتنام میں ہندوستانی سفارت خانے سے مشاورت کے بعد تین میتوں کو پہلے حیدرآباد منتقل کیا جائے گا جہاں سے انہیں سڑک کے راستے مچلی پٹنم۔ کڑپہ اور ہندوپور بھیجا جائے گا۔
کیرالہ سے تعلق رکھنے والے اے سی تھامس 57 سال اور ان کی اہلیہ لووینی تھامس 56 سال کی میتیں ممبئی سے ترواننت پورم منتقل کی جائیں گی جہاں غیر مقیم کیرالی امور کا محکمہ انہیں ان کے آبائی گھر تک پہنچانے کے انتظامات کرے گا۔ اہل خانہ نے اس سانحے کو ناقابل یقین صدمہ قرار دیتے ہوئے بتایا کہ وہ مسلسل ہندوستانی سفارت خانے اور ریاستی حکام سے رابطے میں رہے۔
ادھر حادثے میں بچ جانے والے کئی افراد اتوار کی شب ہندوستان واپس پہنچ گئے۔ حیدرآباد کے راجیو گاندھی بین الاقوامی ہوائی اڈے پر پہنچنے والے متاثرین نے بتایا کہ کشتی چند ہی لمحوں میں بلند لہروں کی زد میں آ کر الٹ گئی۔ انہوں نے مقامی امدادی ٹیموں کی فوری کارروائی کو سراہا تاہم جزیرے پر ابتدائی طبی امداد کے دوران پیش آنے والی مشکلات کا بھی ذکر کیا۔
حادثے کے بعد ویتنامی حکومت نے بڑے پیمانے پر امدادی اور انتظامی کارروائیاں شروع کیں۔ وزارت خارجہ نے متاثرہ خاندانوں کی مدد۔ قانونی اور قونصلر تعاون اور ہندوستانی سفارتی مشنز کے ساتھ رابطے کے لیے خصوصی ٹیمیں تشکیل دیں۔
نائب وزیر خارجہ لی تھی تھو ہانگ نے امدادی سرگرمیوں کی نگرانی کی جبکہ ہو چی منہ سٹی کے محکمہ خارجہ نے میتوں کو فرانزک میڈیسن مرکز منتقل کرنے۔ ان کے تحفظ اور متاثرہ خاندانوں کی چوبیس گھنٹے مدد کے انتظامات کیے۔ ویتنامی حکومت نے تمل ناڈو سے آنے والے نمائندوں کے لیے امیگریشن کے عمل میں بھی سہولت فراہم کی۔
ویتنامی حکام نے اس حادثے کی مجرمانہ تحقیقات بھی شروع کر دی ہیں۔
ہندوستانی سفارت خانہ ہنوئی اور ہو چی منہ سٹی میں قونصل خانہ اس پورے عمل کے دوران ویتنامی حکام۔ وزارت خارجہ۔ متعلقہ ریاستی حکومتوں اور ہوائی اڈوں کے حکام کے ساتھ مسلسل رابطے میں رہے تاکہ جاں بحق ہونے والوں کی میتیں باوقار انداز میں وطن واپس لائی جا سکیں۔ ممبئی پہنچنے کے بعد اب متعلقہ ریاستی حکومتوں نے میتوں کو ان کے آبائی علاقوں تک پہنچانے کا مرحلہ شروع کر دیا ہے۔
