جے پور: جے پور (راجستھان) کے جے پور انٹرنینشنل ہوائی اڈے پر بھارت کے نائب صدر سی پی رادھا کرشنن ہفتہ کے روز ایک روزہ سرکاری دورے پر پہنچے۔ ان کی آمد پر راجستھان کے گورنر ہری بھاؤ کسان راو باگڑے اور نائب وزیر اعلیٰ پریم چند بیروا سمیت دیگر معزز شخصیات نے ان کا پرتپاک استقبال کیا۔

نائب صدر اس دورے کے دوران کئی پروگراموں میں شرکت کریں گے، جن میں راجستھان یونیورسٹی کا 35واں کانووکیشن اور بھگوان مہاویر کینسر ہسپتال اینڈ ریسرچ سینٹر کا 23واں کینسر سروائیورز ڈے شامل ہے۔ نائب صدر نے X پر ایک پوسٹ میں کہا کہ ان کا جے پور ہوائی اڈے پر گورنر ہری بھاؤ باگڑے، نائب وزیر اعلیٰ پریم چند بیروا اور دیگر معززین نے گرمجوشی سے استقبال کیا۔

انہوں نے مزید بتایا کہ وہ آج ان دونوں اہم پروگراموں میں شرکت کریں گے۔ اس سے قبل جمعرات کو آل انڈیا انسٹی ٹیوٹ آف میڈیکل سائنسز رشیکیش کا چھٹا کانووکیشن منعقد ہوا، جس میں نائب صدر سی پی رادھا کرشنن مہمانِ خصوصی کے طور پر شریک ہوئے۔

اس موقع پر مرکزی وزیر مملکت برائے صحت انوپریا پٹیل، اتراکھنڈ کے وزیر اعلیٰ پشکر سنگھ دھامی اور گورنر لیفٹیننٹ جنرل گرمیت سنگھ بھی موجود تھے۔ تقریب کے دوران نائب صدر نے ادارے کی سالانہ اشاعت "RUDRAKSHA" جاری کی، جس میں گزشتہ سال کی کامیابیوں، اختراعات اور تعلیمی پیش رفت کو اجاگر کیا گیا ہے۔

انہوں نے اپنے خطاب میں کہا کہ کانووکیشن طلبہ کی زندگی کا ایک اہم مرحلہ ہوتا ہے، جو ان کی برسوں کی محنت، نظم و ضبط اور قربانیوں کا نتیجہ ہے، اور یہ ان کی پیشہ ورانہ ذمہ داریوں کے نئے سفر کی شروعات بھی ہے۔ انہوں نے فارغ التحصیل طلبہ کو مبارکباد دیتے ہوئے انہیں اپنے طبی کیریئر میں اعلیٰ اخلاقیات، ہمدردی اور خدمت کے جذبے کو برقرار رکھنے کی تلقین کی۔