سری وجیا پورم: نائب صدر سی پی رادھا کرشنن نے جمعہ کو انڈمان و نکوبار جزائر کا اپنا دو روزہ دورہ شروع کیا، جہاں وہ ’ہر گھر ترنگا‘ مہم اور ’وندے ماترم‘ کی 150ویں سالگرہ کی تقریبات سمیت مختلف پروگراموں میں شرکت کریں گے۔ حکام کے مطابق رادھا کرشنن خصوصی طیارے سے دوپہر کے وقت ویر ساورکر انٹرنیشنل ایئرپورٹ کے قریب واقع بحریہ کے ہوائی اڈے آئی این ایس اترکش پہنچے، جہاں اعلیٰ انتظامی حکام نے ان کا استقبال کیا۔

انڈمان پہنچنے کے بعد نائب صدر لوک نواس گئے، جہاں انہوں نے لیفٹیننٹ گورنر ڈی کے جوشی سے ملاقات کی۔ حکام نے بتایا کہ نائب صدر جمعہ کی شام سیلولر جیل نیشنل میموریل کا دورہ کریں گے۔ وہ وہاں شہدا کے ستون پر خراج عقیدت پیش کریں گے، سواتنترتا جیوتی کو سلام پیش کریں گے اور وی ڈی ساورکر کی کوٹھری کا بھی دورہ کریں گے۔

بعد میں وہ سیلولر جیل نیشنل میموریل میں منعقد ہونے والے لائٹ اینڈ ساؤنڈ شو میں بھی شرکت کریں گے، جس میں ہندوستان کی آزادی کی جدوجہد اور آزادی کے متوالوں کی قربانیوں کی داستان پیش کی جائے گی۔ 9 اگست کو نائب صدر سری وجیا پورم کے فلیگ پوائنٹ پر قومی پرچم لہرا کر ’ہر گھر ترنگا ابھیان‘ میں شرکت کریں گے۔ بعد ازاں وہ ایک آڈیٹوریم میں منعقد ہونے والی ریاستی تقریب ’وندے ماترم پر ترنگا کنسرٹ‘ میں شرکت کریں گے۔ دوپہر کے وقت نائب صدر تاریخی نیتا جی سبھاش چندر بوس جزیرے کا دورہ کریں گے اور شام کو نئی دہلی کے لیے روانہ ہوں گے۔