لیہ
ہندوستان کے نائب صدر سی۔ پی۔ رادھا کرشنن تین روزہ دورے پر جمعہ کے روز مرکز کے زیرِ انتظام خطے لداخ پہنچ گئے، جہاں وہ بین الاقوامی یومِ یوگا کی تقریبات میں شرکت کریں گے۔نائب صدر کا کشوک بکولا رنپوچے ہوائی اڈے پر پرتپاک استقبال کیا گیا۔اس موقع پر لداخ کے لیفٹیننٹ گورنر ونئے کمار سکسینہ، لداخ خودمختار پہاڑی ترقیاتی کونسل (ایل اے ایچ ڈی سی) کارگل کے چیف ایگزیکٹو کونسلر ڈاکٹر محمد جعفر اخون، لداخ سے رکنِ لوک سبھا محمد حنیفہ سمیت دیگر اعلیٰ حکام اور معزز شخصیات موجود تھیں۔
نائب صدر کا خیرمقدم کرتے ہوئے لیفٹیننٹ گورنر نے کہا کہ بین الاقوامی یومِ یوگا کی تقریبات سے قبل مرکز کے زیرِ انتظام خطے میں ان کا استقبال کرنا ان کے لیے اعزاز اور خوشی کی بات ہے۔
ونئے کمار سکسینہ نے سوشل میڈیا پلیٹ فارم ایکس پر لکھا کہ بین الاقوامی یومِ یوگا 2026 سے قبل معزز نائب صدر کی موجودگی نہایت حوصلہ افزا ہے۔ یوگا کی لازوال روایت کے جشن کی تیاریوں کے دوران ان کی رہنمائی اور قیادت ہمیں زیادہ صحت مند، متوازن اور ہم آہنگ طرزِ زندگی اپنانے کی ترغیب دے گی۔
حکام کے مطابق نائب صدر 21 جون تک لداخ میں قیام کریں گے اور اس دوران مختلف پروگراموں میں شرکت کریں گے۔وہ ہفتے کے روز لوکنگ گاؤں کا دورہ کریں گے، جہاں وہ سیلف ہیلپ گروپس کے ساتھ تبادلۂ خیال کریں گے اور وائبرنٹ ولیجز پروگرام کے تحت سرحدی علاقوں میں جاری ترقیاتی اقدامات کا جائزہ لیں گے۔ اس کے علاوہ وہ وار میموریل پر حاضری دے کر شہداء کو خراجِ عقیدت بھی پیش کریں گے۔
نائب صدر 21 جون کو لیہ میں منعقد ہونے والی بین الاقوامی یومِ یوگا کی مرکزی تقریب میں شرکت کریں گے، جس میں نوجوانوں، سکیورٹی فورسز کے اہلکاروں اور مختلف تنظیموں کے نمائندوں کی بڑی تعداد کے شریک ہونے کی توقع ہے۔
نائب صدر کا عہدہ سنبھالنے کے بعد سی۔ پی۔ رادھا کرشنن کا لداخ کا یہ پہلا سرکاری دورہ ہے۔
