دہرادون

اتراکھنڈ کے وزیر اعلیٰ پشکر سنگھ دھامی نے جمعہ کو حکام کو ہدایت دی کہ 1,000 نئی بھرتیاں کرکے فاریسٹ گارڈز کی مناسب دستیابی یقینی بنائی جائے۔ یہ ہدایات وزیر اعلیٰ کی رہائش گاہ پر منعقدہ ایک اعلیٰ سطحی اجلاس کے دوران دی گئیں۔وزیر اعلیٰ نے جنگلاتی آگ پر قابو پانے کے اقدامات، پینے کے پانی کے انتظامات، صحت خدمات اور مون سون کی تیاریوں کا جائزہ لیا اور حکام کو بروقت اور مؤثر کارروائی یقینی بنانے کی ہدایت دی۔

دھامی نے جنگلاتی وسائل کو نقصان پہنچانے والوں کے خلاف سخت کارروائی کرنے پر زور دیا اور جنگلاتی آگ کے واقعات میں ردِعمل کے وقت کو کم سے کم رکھنے کی ہدایت دی۔ انہوں نے متعلقہ حکام کو حکم دیا کہ جنگل میں آگ لگنے کی اطلاع ملنے کے ایک گھنٹے کے اندر متاثرہ مقام پر پہنچا جائے۔

انہوں نے یہ بھی ہدایت دی کہ جنگلاتی آگ کی روک تھام کی سرگرمیوں کے لیے دیہی کمیٹیوں اور ون پنچایتوں کو ضوابط کے مطابق ضروری بجٹ فراہم کیا جائے۔انسان اور جنگلی جانوروں کے درمیان بڑھتے ہوئے تصادم کے واقعات کے پیشِ نظر، انہوں نے محکمہ جنگلات کو ہدایت دی کہ ہر ڈویژن میں ویٹرنری ڈاکٹروں کی مناسب دستیابی یقینی بنائی جائے۔

انہوں نے متاثرہ علاقوں میں جنگلاتی آگ کی فوری اطلاع فراہم کرنے کے لیے موبائل الرٹ سسٹم کی ضرورت پر بھی زور دیا۔

وزیر اعلیٰ نے جنگلاتی آگ کے مؤثر انتظام کے لیے ’’شیتلاکھیت ماڈل‘‘ کو پورے ریاست میں نافذ کرنے پر زور دیا۔ انہوں نے حکام کو ہدایت دی کہ فائر لائنز کے اطراف چھوٹے آبی تالاب تعمیر کیے جائیں، جنگلاتی آگ کی روک تھام کے لیے ٹھوس لائحۂ عمل تیار کیا جائے اور آگ بجھانے والے عملے کو مناسب آلات فراہم کیے جائیں۔ انہوں نے جنگلاتی آگ کی روک تھام کے لیے بڑے پیمانے پر عوامی بیداری مہم چلانے کی بھی اپیل کی۔گرمی کے موسم کو مدنظر رکھتے ہوئے وزیر اعلیٰ نے حکام کو ریاست بھر میں پینے کے پانی کی مناسب فراہمی یقینی بنانے کی ہدایت دی۔ انہوں نے کہا کہ کافی تعداد میں واٹر ٹینکر دستیاب رہیں اور خراب پینے کے پانی کی پائپ لائنوں کی جلد از جلد مرمت کی جائے۔

انہوں نے حکام کو ہدایت دی کہ عوام کو پینے کے پانی کی فراہمی کے حوالے سے کسی قسم کی دشواری کا سامنا نہ ہو۔ ساتھ ہی انہوں نے زیارتی اور سیاحتی مقامات سمیت میدانی علاقوں میں بھی پانی کی مناسب فراہمی یقینی بنانے پر زور دیا۔

وزیر اعلیٰ نے مزید ہدایت دی کہ ریاست بھر میں بلا تعطل بجلی کی فراہمی برقرار رکھی جائے اور توانائی کی پیداوار بڑھانے کے لیے مزید مؤثر اقدامات کیے جائیں۔مون سون کے موسم کو مدنظر رکھتے ہوئے انہوں نے تمام محکموں کو ضروری تیاریاں وقت پر مکمل کرنے کی ہدایت دی۔ انہوں نے ضلعی انچارج سیکریٹریوں کو اپنے اپنے اضلاع میں فیلڈ انسپیکشن کرنے اور خصوصاً حساس علاقوں میں انتظامات کی کڑی نگرانی کرنے کا حکم دیا۔

محکمہ صحت کے جائزے کے دوران وزیر اعلیٰ نے ہدایت دی کہ تمام اسپتالوں میں فائر سیفٹی آڈٹ لازمی طور پر کرایا جائے۔ انہوں نے اسپتالوں میں صفائی کے بہتر انتظامات برقرار رکھنے پر بھی زور دیا۔

ادارہ جاتی زچگی (انسٹی ٹیوشنل ڈلیوری) کو فروغ دینے کی اہمیت اجاگر کرتے ہوئے انہوں نے حکام کو ہدایت دی کہ تمام حاملہ خواتین کا مکمل ریکارڈ محفوظ رکھا جائے اور مون سون کے دوران انہیں اسپتالوں تک پہنچانے کے مناسب انتظامات یقینی بنائے جائیں۔

وزیر اعلیٰ نے یہ بھی کہا کہ چار دھام یاترا پر جانے والے ایسے زائرین جو طبی جانچ کے دوران سفر کے لیے غیر موزوں قرار پائیں، انہیں یاترا نہ کرنے کا مشورہ دیا جائے۔ انہوں نے کہا کہ زائرین کے محفوظ اور ہموار سفر کو یقینی بنانا ریاستی حکومت کی اولین ترجیح ہے۔