نئی دہلی
دہلی پولیس نے حالیہ اتم نگر قتل کیس سے متعلق افواہیں پھیلانے اور گمراہ کن مواد شیئر کرنے والے کئی سوشل میڈیا اکاؤنٹس کے خلاف قانونی کارروائی شروع کر دی ہے۔ حکام نے جمعہ کو بتایا کہ ان میں ایک وائرل ویڈیو بھی شامل ہے جس میں عوام سے مالی مدد کے نام پر چندہ مانگا جا رہا تھا۔
10 مارچ کو سوشل میڈیا پر سامنے آنے والی ایک ویڈیو میں ایک کیو آر کوڈ دکھایا گیا تھا جس کے ذریعے اس واقعے سے جڑی کہانی بیان کرتے ہوئے عوام سے مالی امداد طلب کی جا رہی تھی۔ جانچ کے دوران معلوم ہوا کہ گزشتہ دو دنوں میں مشتبہ بینک اکاؤنٹ میں تقریباً 37 لاکھ روپے جمع ہو چکے ہیں۔
دوارکا کے ڈپٹی کمشنر آف پولیس کشل پال سنگھ نے کہا کہ عوام کے ساتھ ممکنہ دھوکہ دہی کے پیش نظر متعلقہ بینک برانچ کے مینیجر کو ہدایت دی گئی ہے کہ اس اکاؤنٹ کی تمام کریڈٹ اور ڈیبٹ سہولتیں فوراً بند کر دی جائیں اور عوام کی جانب سے جمع کی گئی رقم کو منجمد کر دیا جائے۔
انہوں نے مزید بتایا کہ 4 مارچ کو اتم نگر میں ہونے والی جھڑپ کے بعد سوشل میڈیا پر گردش کرنے والے گمراہ کن اور اشتعال انگیز مواد کا پولیس نے سنجیدگی سے نوٹس لیا ہے۔ اس جھڑپ میں 26 سالہ نوجوان کی موت ہو گئی تھی۔
پولیس نے فوری کارروائی کرتے ہوئے مختلف سوشل میڈیا پلیٹ فارمز کے ساتھ رابطہ قائم کیا تاکہ اس طرح کے مواد کو ہٹایا جا سکے۔افسر کے مطابق اب تک ایکس پر آئی ٹی ایکٹ کی دفعہ 79(3)(بی) کے تحت 14 مواد ہٹانے کی درخواستیں بھیجی جا چکی ہیں، جبکہ اسی نوعیت کی آٹھ درخواستیں انسٹاگرام کو بھی بھیجی گئی ہیں تاکہ نشاندہی شدہ اشتعال انگیز مواد کو ہٹایا جا سکے۔
پولیس نے بتایا کہ افواہیں پھیلانے اور غیر مصدقہ معلومات شیئر کرنے والے سوشل میڈیا اکاؤنٹس چلانے والے افراد کے خلاف بھی کارروائی شروع کر دی گئی ہے۔
پولیس نے ایک بار پھر خبردار کیا کہ سوشل میڈیا پر جھوٹی یا گمراہ کن معلومات پھیلانا قانون کے تحت قابلِ سزا جرم ہے اور عوامی امن کو نقصان پہنچانے کی کوشش کرنے والوں کے خلاف سخت کارروائی کی جائے گی۔
اس سے پہلے پولیس نے واضح کیا تھا کہ 4 مارچ کو ہولی کے موقع پر اتم نگر کی جے جے کالونی میں دو پڑوسی گروہوں کے درمیان ہونے والی جھڑپ میں مارے جانے والے نوجوان ترون کے قتل کے سلسلے میں دو نابالغوں سمیت 14 بالغ افراد کو گرفتار کیا جا چکا ہے۔
حکام کے مطابق علاقے میں صورتِ حال قابو میں ہے اور وہاں مناسب تعداد میں پولیس اہلکار تعینات ہیں۔
.gif)
