نئی دہلی۔مغربی دہلی کے علاقے اتم نگر کی جے جے کالونی میں 26 سالہ ترون کمار کی موت کے بعد پیدا ہونے والی کشیدہ صورتحال کے پیش نظر جمعیۃ علماء ہند کے ایک وفد نے منگل کو دہلی پولیس کے ایک سینئر افسر سے ملاقات کی۔ وفد نے علاقے میں امن و امان اور فرقہ وارانہ ہم آہنگی برقرار رکھنے کے لیے مؤثر اقدامات کرنے کا مطالبہ کیا۔

یہ وفد تنظیم کے صدر مولانا محمود مدنی کی ہدایت پر پولیس حکام سے ملاقات کے لیے پہنچا تھا۔ یہ ملاقات جنک پوری میں واقع دفتر میں ہوئی۔ وفد کی قیادت تنظیم کے جنرل سکریٹری مولانا محمد حکیم الدین قاسمی نے کی۔

ملاقات کے دوران وفد نے پولیس کو ایک تفصیلی یادداشت پیش کی جس میں واقعہ کے بعد علاقے میں پیدا ہونے والی صورتحال پر تشویش ظاہر کی گئی۔ جمعیۃ نے کہا کہ مقامی مسلم برادری کے کئی افراد اس واقعہ کے بعد خوف اور عدم تحفظ کے ماحول میں زندگی گزار رہے ہیں۔ تنظیم نے الزام لگایا کہ بعض شرپسند عناصر سوشل میڈیا کے ذریعے اشتعال انگیز پیغامات پھیلا کر حالات کو خراب کرنے کی کوشش کر رہے ہیں۔

جمعیۃ علماء ہند نے یہ بھی کہا کہ ترون کمار کی موت نہایت افسوسناک ہے اور تنظیم متاثرہ خاندان کے ساتھ ہمدردی کا اظہار کرتی ہے۔ ساتھ ہی مطالبہ کیا گیا کہ اس پورے معاملے کی غیر جانبدارانہ، شفاف اور مکمل جانچ کی جائے تاکہ حقیقت سامنے آ سکے۔ تنظیم کے مطابق یہ واقعہ ممکنہ طور پر دو گروہوں کے درمیان تنازع سے جڑا ہو سکتا ہے، لیکن کچھ عناصر اسے فرقہ وارانہ رنگ دینے کی کوشش کر رہے ہیں۔

یادداشت میں یہ بھی کہا گیا کہ واقعہ کے بعد بعض مقامات پر توڑ پھوڑ، لوٹ مار اور آگ زنی کی اطلاعات سامنے آئی ہیں۔ اس کے علاوہ دہلی میونسپل کارپوریشن کی جانب سے مبینہ بلڈوزر کارروائی پر بھی تشویش ظاہر کی گئی اور کہا گیا کہ کسی بھی کارروائی کو قانونی طریقہ کار کے مطابق ہی انجام دیا جانا چاہیے۔

وفد نے انتظامیہ کے سامنے کئی مطالبات پیش کیے جن میں نفرت پھیلانے والوں کے خلاف سخت کارروائی، سوشل میڈیا پر اشتعال انگیز مواد پر روک، علاقے میں مناسب سکیورٹی انتظامات اور تشدد سے متاثرہ افراد کو انصاف فراہم کرنا شامل ہے۔ اس کے علاوہ رمضان اور آنے والی عید الفطر کے پیش نظر مساجد میں نماز، بازاروں کے کھلنے اور عیدگاہ میں نماز کے دوران سکیورٹی انتظامات کو یقینی بنانے کی بھی درخواست کی گئی۔

اس موقع پر جوائنٹ کمشنر جتین نروال نے وفد کو یقین دہانی کرائی کہ پولیس علاقے میں امن و امان برقرار رکھنے کے لیے ضروری اقدامات کر رہی ہے۔ انہوں نے بتایا کہ بیرونی افراد کی نقل و حرکت پر نظر رکھی جا رہی ہے اور امن کمیٹی کی نشستیں منعقد کر کے فرقہ وارانہ ہم آہنگی کو برقرار رکھنے کی کوشش کی جا رہی ہے۔ پولیس نے یہ بھی کہا کہ مقامی لوگوں کی حفاظت کو یقینی بنایا جائے گا اور افواہیں پھیلانے والوں کے خلاف سخت کارروائی کی جائے گی۔