واشنگٹن

امریکہ اور ہندوستان کے درمیان جاری عبوری تجارتی معاہدے پر مذاکرات کے پس منظر میں، متعدد امریکی قانون سازوں نے منگل کو (مقامی وقت کے مطابق) دونوں ممالک کے تعلقات کی اہمیت پر زور دیا، جبکہ محصولات (ٹیرف)، تجارت اور تزویراتی تعاون کے حوالے سے مختلف آراء کا اظہار کیا۔

اے این آئی سے گفتگو کرتے ہوئے کینساس سے تعلق رکھنے والے سینیٹر راجر مارشل نے ہندوستان-امریکہ تجارتی معاہدے پر جاری مذاکرات کے حوالے سے بعض چیلنجز کی نشاندہی کی، تاہم مستقبل کے امکانات کے بارے میں امید ظاہر کی۔

انہوں نے کہا کہ تجارتی معاہدے کے حوالے سے کچھ چیلنجز موجود ہیں۔ دونوں ممالک کے درمیان تقریباً 50 ارب ڈالر کا تجارتی عدم توازن ہے۔ ابھی کافی کام کرنا باقی ہے۔ میں ایتھانول جیسے شعبوں میں مواقع کے بارے میں پُرامید ہوں۔ کئی برسوں سے ہندوستان نے امریکی مصنوعات کے لیے بلند محصولات اور رکاوٹیں قائم کر رکھی ہیں۔ اگر آپ چاہتے ہیں کہ ہم آپ کی تیار کردہ مصنوعات خریدیں تو ہم بھی امید کرتے ہیں کہ آپ ہمارے لیے اپنی منڈی اسی طرح کھولیں گے۔

تجارتی اختلافات کے باوجود مارشل نے دونوں ممالک کے درمیان تعلقات کو مزید مضبوط بنانے کی حمایت کرتے ہوئے کہا کہ میں ہندوستان اور امریکہ کے تعلقات کے حوالے سے بے حد پُرجوش ہوں۔ ہم بہت سی مشترکہ اقدار رکھتے ہیں۔ اس کے ساتھ ہم دونوں جمہوری ممالک ہیں اور ایک آزاد دنیا کے حامی ہیں۔ ہمارے پاس کئی شعبوں میں مل کر کام کرنے کا بہترین موقع ہے۔ یقیناً کچھ اختلافات موجود ہیں، لیکن جیسے ایک خاندان میں اختلافات ہوتے ہیں، ویسے ہی یہاں بھی رہیں گے۔

دوسری جانب کانگریس کے رکن سہاس سبرامنیم نے دوطرفہ تعلقات کو دوبارہ متحرک کرنے کی ضرورت پر زور دیتے ہوئے کہا کہ موجودہ انتظامیہ نے امریکہ-ہندوستان تعلقات کو نقصان پہنچایا ہے۔ اب ہم دوبارہ روابط بحال کرنے اور اس تعلق کو مزید مضبوط بنانے کی کوشش کر رہے ہیں۔ یہ دنیا کے اہم ترین تعلقات میں سے ایک ہے۔

انہوں نے مزید کہا کہ ہمیں اس بات کو یقینی بنانا ہوگا کہ دہشت گردی کے خلاف کارروائی، معاشی فوائد اور تجارتی تعاون کے حوالے سے امریکہ اور ہندوستان ایک ہی صفحے پر ہوں۔ اسی طرح چین کا مقابلہ کرنے کے تناظر میں بھی ہندوستان ایک اہم شراکت دار ہے اور تعلقات کو معمول پر لانے کی کوششوں میں اس کا کردار اہم ہوگا۔

کانگریس کے رکن بریڈ شرمین نے تجارت کے موضوع پر گفتگو کرتے ہوئے دونوں ممالک کے درمیان معمول کے معاشی تعلقات کی بحالی پر زور دیا۔انہوں نے کہا کہ اس انتظامیہ نے سخت اور نقصان دہ محصولات کے ساتھ آغاز کیا تھا، اور میں امید کرتا ہوں کہ امریکہ اور ہندوستان کے درمیان معمول کے تجارتی تعلقات بحال ہو جائیں گے۔ یہ دونوں معیشتوں کے لیے اہم ہے اور ہمارے جغرافیائی و تزویراتی تعلقات کے لیے بھی ضروری ہے۔

امریکہ میں تارکینِ وطن مخالف جذبات کے حوالے سے شرمین نے کہا کہ میگا  تحریک کے بعض عناصر تقریباً ہر کسی کے مخالف ہیں، جن میں ہندوستانی نژاد امریکی بھی شامل ہیں۔ ہمارے ملک میں ماضی میں بھی تعصب اور اجنبیت پسندی رہی ہے، لیکن گزشتہ 250 برسوں کے دوران امریکہ دنیا کا سب سے زیادہ خوش آمدید کہنے والا ملک رہا ہے، اور تقریباً ہر تارکِ وطن گروہ کو کسی نہ کسی سطح پر امتیازی سلوک کا سامنا کرنا پڑا ہے۔

اسی دوران کانگریس کے رکن راجا کرشنامورتی نے امریکہ کی موجودہ انتظامیہ کی ٹیرف پالیسی پر تنقید کرتے ہوئے کہا کہ صدر ٹرمپ نے غیر ضروری طور پر ہمارے کئی دوستوں، شراکت داروں اور اتحادیوں کے ساتھ تجارتی جنگیں چھیڑ رکھی ہیں۔ اس کا براہِ راست نتیجہ امریکی عوام کے لیے مہنگی اشیا کی صورت میں سامنے آ رہا ہے۔ جب تک یہ تجارتی جنگیں اور عمومی محصولات برقرار رہیں گے، ہم درحقیقت خود اپنا ہی نقصان کرتے رہیں گے۔انہوں نے امریکہ میں ہندوستانی نژاد افراد اور دیگر اقلیتی برادریوں کے خلاف حالیہ واقعات کی بھی مذمت کی۔

ان کے مطابق:ہم نے ٹیکساس میں دیکھا کہ سفید فام بالادستی کے حامی ایک گروہ نے سٹی ہال کے سامنے ہندوستان کا پرچم پھاڑ دیا اور ہندوستان سے تعلق رکھنے والے لوگوں کو واپس جانے کا کہا۔ انہوں نے یہ دعویٰ بھی کیا کہ ٹیکساس پر ہندوؤں کا قبضہ ہو رہا ہے اور اس نوعیت کی کئی بے بنیاد باتیں کیں۔ ہمیں ہر قسم کے تعصب کے خلاف کھڑا ہونا ہوگا اور یہ واضح کرنا ہوگا کہ ایسی سوچ غیر امریکی ہے اور امریکہ میں اس کی کوئی جگہ نہیں۔

ادھر جنوبی اور وسطی ایشیائی امور کے امریکی بیورو میں نائب معاون وزیر خارجہ بیتھنی پولوس موریسن نے کہا کہ واشنگٹن اور نئی دہلی ایک تاریخی تجارتی معاہدے کو حتمی شکل دینے کے "بہت، بہت قریب" پہنچ چکے ہیں۔

ایک تقریب سے خطاب کرتے ہوئے انہوں نے کہا کہ تجارت کے میدان میں، فروری 2026 میں ہم نے تاریخی تجارتی معاہدے کو مکمل کرنے کے ارادے کا اعلان کیا تھا، اور اب ہم اس کے حتمی مرحلے کے بہت قریب ہیں۔انہوں نے مزید کہا کہ مجوزہ معاہدہ 1.4 ارب آبادی والی ہندوستانی منڈی کو امریکی مصنوعات کے لیے "باہمی اور مساوی فائدے" کی بنیاد پر کھول دے گا۔

ان کے مطابق:یہ معاہدہ 1.4 ارب افراد پر مشتمل ہندوستانی منڈی کو امریکی مصنوعات کے لیے ایسے اصولوں کے تحت کھولے گا جو باہمی اور مساوی فوائد پر مبنی ہوں گے۔ انتظامیہ 2030 تک 500 ارب ڈالر کی دوطرفہ تجارت کے ہدف، یعنی 'مشن 500'، کو حاصل کرنے کے لیے تیزی سے کام کر رہی ہے۔

واضح رہے کہ منگل کے روز امریکی تجارتی نمائندے جیمیسن گریر اور ہندوستان کے مرکزی وزیر تجارت و صنعت پیوش گوئل نے نئی دہلی میں ملاقات کی، جس کا مقصد عبوری تجارتی معاہدے پر جاری مذاکرات کو آگے بڑھانا تھا۔ یہ مذاکرات اصل میں صدر ڈونلڈ ٹرمپ اور وزیر اعظم نریندر مودی کی جانب سے شروع کیے گئے تھے۔