اسلام آباد

وزیر اعظم شہباز شریف نے بدھ کے روز کہا کہ امریکہ اور ایران کے درمیان جنگ نے گزشتہ دو برسوں میں پاکستان کی اقتصادی پیش رفت کو شدید دھچکا پہنچایا ہے۔ انہوں نے کہا کہ ان کی حکومت دونوں ممالک کے درمیان کشیدگی کم کرنے اور مغربی ایشیا میں امن بحال کرنے کے لیے اپنی کوششیں جاری رکھے گی۔

انہوں نے بتایا کہ جنگ شروع ہونے کے بعد عالمی منڈی میں ایندھن کی قیمتوں میں تیزی سے اضافہ ہوا ہے۔ ان کے مطابق،جنگ سے پہلے ہمارا ہفتہ وار تیل کا بل تقریباً 300 ملین ڈالر تھا، جو اب بڑھ کر 800 ملین ڈالر تک پہنچ گیا ہے۔کابینہ کے اجلاس سے خطاب کرتے ہوئے شہباز شریف نے کہا کہ ایک ٹاسک فورس روزانہ کی بنیاد پر صورتحال کی نگرانی کر رہی ہے۔

انہوں نے کہا کہ موجودہ چیلنجز سے نمٹنے کے لیے اجتماعی کوششوں کی ضرورت ہے۔

امریکہ اور ایران کے درمیان مذاکرات کی پیش رفت اور خطے میں کشیدگی کم کرنے کے لیے پاکستان کی کوششوں سے کابینہ کو آگاہ کرتے ہوئے انہوں نے کہا کہ اسلام آباد نے علاقائی استحکام کے فروغ کے لیے سنجیدہ اقدامات کیے ہیں۔انہوں نے بتایا کہ ایران اور امریکہ کے درمیان مذاکرات 11 اپریل کو اسلام آباد میں شروع ہوئے اور 21 گھنٹے تک جاری رہے، جبکہ اس وقت دونوں ممالک کے درمیان جنگ بندی برقرار ہے۔

انہوں نے کہا کہ ایران کے وزیر خارجہ عباس عراقچی اپنی ٹیم کے ساتھ مذاکرات کے دوسرے مرحلے کے لیے پاکستان آئے تھے۔ ان کے ساتھ اہم ملاقاتیں ہوئیں۔" انہوں نے عراقچی کے حالیہ دوروں کا ذکر کرتے ہوئے بتایا کہ انہوں نے اسلام آباد، مسقط اور ماسکو کا دورہ کیا۔

وزیر اعظم نے مزید کہا، "روسی دورے سے قبل میری ان سے فون پر بات ہوئی، جس میں انہوں نے یقین دلایا کہ عمان میں ہونے والی ملاقاتیں خلوص نیت کے ساتھ کی گئیں اور قیادت سے مشاورت کے بعد جلد مثبت جواب دیا جائے گا۔

انہوں نے امید ظاہر کی کہ یہ تنازع جلد ختم ہو جائے گا۔پاکستان امریکہ اور ایران کے درمیان مذاکرات کے دوسرے دور کی میزبانی کرنے کا منصوبہ بھی رکھتا ہے۔ایرانی وزیر خارجہ نے گزشتہ ہفتے کے آخر میں 48 گھنٹوں کے اندر دو مختصر دورے کیے، جن میں انہوں نے چیف آف ڈیفنس فورسز اور آرمی چیف فیلڈ مارشل عاصم منیر اور وزیر اعظم شہباز شریف سے ملاقاتیں کیں اور علاقائی صورتحال پر تبادلہ خیال کیا۔شہباز شریف نے فیلڈ مارشل عاصم منیر اور نائب وزیر اعظم و وزیر خارجہ اسحاق ڈار کی بھی تعریف کی اور کہا کہ انہوں نے خطے میں امن بحال کرنے کے لیے اپنی بھرپور کوششیں کی ہیں۔

ادھر امریکی صدر ڈونلڈ ٹرمپ نے اتوار کے روز ایک بار پھر کہا کہ امریکہ اور ایران کے حکام فون کے ذریعے بات چیت کر کے اس تنازع کا پرامن حل نکال سکتے ہیں۔گزشتہ ہفتے ٹرمپ نے ایران کے ساتھ دو ہفتوں کی جنگ بندی کو غیر معینہ مدت تک بڑھا دیا تاکہ تہران کو جنگ کے خاتمے کے لیے ایک متفقہ تجویز تیار کرنے کا مزید وقت مل سکے۔ یہ جنگ 28 فروری کو اس وقت شروع ہوئی جب امریکہ اور اسرائیل نے مشترکہ طور پر ایران پر حملہ کیا، جس میں ایران کے سپریم لیڈر آیت اللہ علی خامنہ ای اور کئی اعلیٰ کمانڈر ہلاک ہو گئے۔ اس کے بعد اسلامی جمہوریہ کی جوابی کارروائی نے اس جنگ کو پورے خلیجی خطے تک پھیلا دیا۔