نئی دہلی: اشوک نے بدھ کے روز یوریا اور دیگر کھادوں کی ممکنہ قلت کے بارے میں خبردار کرتے ہوئے حکومت سے کسانوں کو ان کی مناسب فراہمی یقینی بنانے کی اپیل کی ہے۔ گہلوت نے ایک بیان میں کہا کہ مرکزی اور ریاستی حکومتوں دونوں کو اس مسئلے پر کسانوں میں بیداری پیدا کرنے کے لیے اقدامات کرنے چاہییں۔

کانگریس کے سینئر رہنما نے کہا کہ آنے والے وقت میں ملک کو یوریا، ڈی اے پی اور دیگر کھادوں کی شدید کمی کا سامنا کرنا پڑ سکتا ہے، کیونکہ بھارت ان کی سپلائی کے لیے بڑی حد تک درآمدات پر منحصر ہے اور اس وقت درآمدات متاثر ہو رہی ہیں۔

انہوں نے کہا، “جب کھادوں کی فراہمی معمول کے مطابق ہوتی تھی تب بھی کسانوں کو لمبی قطاروں میں کھڑا ہونا پڑتا تھا۔ ممکنہ قلت کی صورت میں حالات تشویشناک ہو سکتے ہیں۔” گہلوت نے کہا کہ حکومت کی ذمہ داری ہے کہ بروقت کھاد دستیاب کرائی جائے۔

انہوں نے مطالبہ کیا کہ حکومتیں کسانوں کو آگاہ کریں اور ایسی فصلوں کی کاشت کی حوصلہ افزائی کریں جن میں کم کھاد کی ضرورت ہوتی ہے۔ کانگریس رہنما نے کہا، اس بحران کے وقت حکومت جتنی شفافیت کے ساتھ کام کرے گی اور لوگوں کو الجھن میں رکھنے کے بجائے واضح معلومات فراہم کرے گی، اتنا ہی سب کے لیے صورتحال سے نمٹنا آسان ہوگا۔