نئی دہلی/ آواز دی وائس

سپریم کورٹ نے پیر کے روز دہلی ہائی کورٹ کے اُس حکم پر روک لگا دی، جس کے تحت 2017 کے اناؤ عصمت دری کیس میں سزا یافتہ کلدیپ سینگر کی عمر قید کی سزا معطل کی گئی تھی اور اسے ضمانت دی گئی تھی۔

سپریم کورٹ کی تین رکنی ویکیشن بینچ، جس کی سربراہی چیف جسٹس آف انڈیا (سی جے آئی) سوریہ کانت کر رہے تھے، نے سینٹرل بیورو آف انویسٹی گیشن (سی بی آئی) کی اس عرضی پر سماعت کی، جس میں دہلی ہائی کورٹ کے فیصلے کو چیلنج کیا گیا تھا۔ عدالتِ عظمیٰ نے ہائی کورٹ کے حکم پر روک لگاتے ہوئے نوٹ کیا کہ اتر پردیش کے سابق ایم ایل اے کلدیپ سینگر ایک دوسرے کیس میں بھی جیل میں بند ہے۔

سپریم کورٹ نے واضح طور پر کہا کہ کلدیپ سینگر کو جیل سے رہا نہیں کیا جائے گا۔ چیف جسٹس سوریہ کانت، جسٹس جے کے مہیشوری اور جسٹس اے جی مسیح پر مشتمل بینچ نے سینگر کو بھی نوٹس جاری کرتے ہوئے سی بی آئی کی عرضی پر دو ہفتوں کے اندر جواب طلب کیا ہے۔ سی جے آئی نے کہا کہ ہمیں اطلاع دی گئی ہے کہ مجرم کو تعزیراتِ ہند کی دفعہ 304 (قتل) کے تحت بھی سزا سنائی جا چکی ہے اور وہ اس معاملے میں تاحال حراست میں ہے۔ کیس کے ان غیر معمولی حالات کو مدنظر رکھتے ہوئے ہم ہائی کورٹ کے متنازعہ حکم پر عمل درآمد روک رہے ہیں۔ فریقِ مخالف (سینگر) کو رہا نہیں کیا جائے گا۔

متاثرہ فریق کے وکیل ہیمنت کمار موریہ نے کہا کہ میں آج سپریم کورٹ کا شکریہ ادا کرنا چاہتا ہوں۔ متاثرہ بھی اپنی تشکر کا اظہار کرنا چاہتی ہے۔ سپریم کورٹ نے نچلی عدالتوں کے لیے ایک مضبوط حکم جاری کیا ہے کہ ملزم کو کسی بھی صورت میں جیل سے رہا نہیں کیا جائے گا، اور ریلیف دینے والا حکم معطل کر دیا گیا ہے۔ مخالف فریق کو جوابی حلف نامہ داخل کرنے کے لیے وقت دیا گیا ہے، اور تب تک وہ کسی بھی حال میں جیل سے باہر نہیں آئے گا۔ یہ سپریم کورٹ کا حکم ہے اور ہائی کورٹ کے فیصلے پر روک عائد ہے۔

کانگریس رہنما اور خواتین حقوق کی کارکن ممتاز پٹیل نے کہا کہ اب ہمیں امید ہے کہ اناؤ کیس کی متاثرہ کو انصاف ملے گا۔ کلدیپ سینگر کو سزائے موت دی جانی چاہیے۔ ایک نیا قانون آنا چاہیے جس کے تحت عصمت دری کے مجرموں کو سزائے موت دی جائے۔ واضح رہے کہ دہلی ہائی کورٹ نے 23 دسمبر کو اپنے حکم میں اپیل زیرِ سماعت رہنے تک کلدیپ سینگر کی عمر قید کی سزا معطل کر دی تھی اور اسے ضمانت دے دی تھی۔

بی جے پی سے نکالے گئے رہنما کلدیپ سینگر کو دسمبر 2019 میں اناؤ عصمت دری کیس میں مجرم قرار دیا گیا تھا اور 25 لاکھ روپے جرمانے کے ساتھ عمر قید کی سزا سنائی گئی تھی۔ اگرچہ اس کیس میں اسے ضمانت ملی تھی، تاہم وہ قتل سے متعلق ایک دوسرے سی بی آئی کیس میں 10 سال کی سزا کاٹنے کے باعث جیل میں ہی رہا۔ اتوار کے روز متاثرہ نے کہا تھا کہ اسے پورا یقین ہے کہ سپریم کورٹ سے اسے انصاف ملے گا۔ اس نے اتر پردیش کے وزیر اعلیٰ یوگی آدتیہ ناتھ سے اپیل کی تھی کہ اس کی حفاظت کو یقینی بنایا جائے تاکہ وہ بلا خوف اپنی قانونی لڑائی لڑ سکے۔

قومی دارالحکومت میں آل انڈیا پروگریسیو ویمن ایسوسی ایشن (اے آئی پی ڈبلیو اے) کے زیرِ اہتمام احتجاج کے دوران اناؤ عصمت دری کیس کی متاثرہ نے الزام لگایا کہ سینگر نے سی بی آئی کے تفتیشی افسر اور دہلی ہائی کورٹ کے ایک جج سمیت متعدد اہلکاروں کو رشوت دی، اور کہا کہ ضمانت کے بعد اس کے خاندان کو سنگین نتائج کا سامنا کرنا پڑا ہے۔

انہوں نے  کہا کہ مجھے یقین ہے کہ سپریم کورٹ سے مجھے انصاف ملے گا۔ کلدیپ سینگر نے دہلی ہائی کورٹ کے جج اور سی بی آئی کے ایک تفتیشی افسر کو رشوت دی ہے۔ میرے شوہر کی نوکری چھین لی گئی، اور میرے بچوں اور گواہوں کو دھمکیاں دی جا رہی ہیں۔ جن افراد کے نام ہم سی بی آئی کے سامنے لیتے ہیں، انہیں تحفظ فراہم کیا جانا چاہیے۔ میں وزیر اعلیٰ یوگی آدتیہ ناتھ سے درخواست کرتی ہوں کہ مجھے اس طرح تحفظ دیا جائے کہ میں بے خوف ہو کر اپنی لڑائی لڑ سکوں۔