جموں

ریلوے کے وزیر اشونی ویشنو نے جمعرات کو جموں سے کٹرہ تک توسیع دی گئی وندے بھارت ایکسپریس کو روانہ کیا۔ اس موقع پر انہوں نے کہا کہ دیکھ بھال کے نظام کو مضبوط بنانا حفاظت اور سکیورٹی کے لیے انتہائی اہم ہے، جبکہ اگلا بڑا ہدف جموں-سری نگر ریل کوریڈور کی گنجائش بڑھانا ہے، جس کے لیے پٹریوں کی ڈبلنگ کی جائے گی تاکہ مزید ٹرینیں چلائی جا سکیں۔
انہوں نے کہا: “مینٹیننس ہماری ترجیح ہے کیونکہ اسی سے حفاظت اور سکیورٹی یقینی بنتی ہے۔ اگلا فوکس جموں سے سری نگر ریلوے لائن کی گنجائش بڑھانا ہے۔ قاضی گنڈ سے آرینگر تک لائن کی ڈبلنگ کی جا رہی ہے، جس سے زیادہ ٹرینیں چل سکیں گی۔ یورپ میں بھی یہی ٹیکنالوجی استعمال ہو رہی ہے اور جموں و کشمیر میں بھی یہی ٹیکنالوجی اپنائی گئی ہے۔ اس ریلوے لائن سے کارگو ٹرانسپورٹ کو بھی فائدہ ہوا ہے۔کشمیر سے دہلی تک 2 کروڑ کلوگرام سیب بھیجے جا چکے ہیں جبکہ چیری کے لیے 32 بوگیاں بک کی گئی ہیں۔

ویشنو نے کہا کہ جموں-کٹرہ-سری نگر روٹ پر وندے بھارت ایکسپریس بڑی کامیابی بن کر ابھری ہے، جس میں مکمل نشستیں بھری رہتی ہیں، مسافروں کی بڑی تعداد سفر کر رہی ہے اور جدید ٹیکنالوجی کے ذریعے سخت سردی میں بھی ٹرین آسانی سے چل رہی ہے۔انہوں نے مزید کہا: “وزیر اعظم نے کٹرہ سے سری نگر، انجی کھڈ اور دنیا کے سب سے اونچے چناب پل کا افتتاح کیا تھا، اور یہ ٹرین بہت کامیاب رہی ہے۔ اس ٹرین کی 100 فیصد بکنگ ہے اور اب تک ساڑھے پانچ لاکھ سے زیادہ لوگ سفر کر چکے ہیں۔ اس میں ڈوگری اور کشمیری کھانے بھی پیش کیے جا رہے ہیں۔ یہ ٹرین منفی 10 ڈگری درجہ حرارت میں بھی چل سکتی ہے اور اس کی پائپنگ اس طرح بنائی گئی ہے کہ پانی جم نہیں سکتا۔ گزشتہ برفباری کے موسم میں اس کا تجربہ کیا گیا اور اسی بنیاد پر نئی 20 بوگیوں والی ٹرین کو تیار کیا گیا ہے۔ اس میں اعلیٰ معیار کی الیکٹرانکس استعمال ہوئی ہے اور تقریباً 3000 مائیکرو چپس نصب کی گئی ہیں۔

اس موقع پر جموں و کشمیر کے وزیر اعلیٰ عمر عبداللہ اور مرکزی وزیر جتیندر سنگھ بھی موجود تھے۔

وزیر اعلیٰ عمر عبداللہ نے کہا: “میں ریلوے وزارت کو مبارکباد دیتا ہوں۔ آج ہم نے جموں کو سری نگر سے جوڑ دیا ہے۔ پہلے 8 بوگیوں والی ٹرین کو اب 20 بوگیوں میں تبدیل کیا گیا ہے، جس سے اب 1400 لوگ ایک ساتھ سفر کر سکتے ہیں۔ اس ٹرین سے ہمیں کافی فائدہ ہوا ہے۔ اب سیمنٹ اور گاڑیاں بھی ٹرین کے ذریعے سری نگر بھیجی جا رہی ہیں، جبکہ کشمیر سے دیگر ریاستوں کو پھل بھی بھیجے جا رہے ہیں۔ ہمیں جموں و کشمیر میں ایک ڈرائی پورٹ کی ضرورت ہے اور ہم چاہتے ہیں کہ برآمدی سامان کی کسٹم کلیئرنس یہیں ہو۔ ہم اس دن کا طویل عرصے سے انتظار کر رہے تھے۔

مرکزی وزیر جتیندر سنگھ نے اس موقع پر نریندر مودی اور اشونی ویشنو کو کشمیر وادی تک ریلوے لائن مکمل کرنے کا کریڈٹ دیا۔انہوں نے کہا کہ میں اشونی ویشنو جی کا شکریہ ادا کرتا ہوں۔ میں نے ادھم پور میں اسٹاپ کی درخواست کی تھی جو منظور ہوئی۔ میں وزیر اعظم نریندر مودی کا بھی شکریہ ادا کرتا ہوں۔ 1972 میں ٹرین جموں پہنچی تھی اور 42 سال بعد کٹرہ پہنچی۔ 2014 میں مودی جی نے کٹرہ ریلوے اسٹیشن کا افتتاح کیا۔ اس کے بعد سری نگر تک کام رکا ہوا تھا، جسے مودی جی نے دوبارہ شروع کیا۔ آج دنیا کا سب سے اونچا پل قائم ہے اور ہم سری نگر سے جڑ چکے ہیں۔

یہ ٹرین، جو پہلے سری نگر سے شری ماتا ویشنو دیوی کٹرہ تک چلتی تھی، اب جموں توی تک چلے گی، جس سے ملک کی جدید ترین ٹرین براہ راست جموں و کشمیر کے سب سے بڑے شہر اور ریلوے مرکز تک پہنچ گئی ہے۔جب وزیر اعظم نریندر مودی نے 6 جون 2025 کو کٹرہ-سری نگر وندے بھارت ایکسپریس کا افتتاح کیا تھا، تب یہ ٹرین 8 کوچز کے ساتھ چل رہی تھی۔ اس کے بعد سے یہ ٹرین مسلسل مکمل گنجائش کے ساتھ چل رہی ہے اور مسافروں کی جانب سے زبردست ردعمل ملا ہے۔

ٹرین کو 20 کوچز تک بڑھانے کا فیصلہ اسی بڑھتی ہوئی مانگ کے پیش نظر کیا گیا ہے، جس سے اس کی نشستوں کی گنجائش دوگنی سے بھی زیادہ ہو گئی ہے اور خاص طور پر یاترا اور سیاحتی سیزن میں ریزرویشن اور ویٹنگ لسٹ کے دباؤ میں نمایاں کمی آئے گی۔