پٹنہ
مرکزی وزیر داخلہ امت شاہ جمعرات کے روز پٹنہ پہنچے اور بہار کے وزیر اعلیٰ نتیش کمار سے ملاقات کی۔یہ پیش رفت اس وقت سامنے آئی ہے جب نتیش کمار نے اعلان کیا کہ وہ بہار کے وزیر اعلیٰ کے طور پر تقریباً 20 سال کی مدت پوری کرنے کے بعد راجیہ سبھا میں جانے کا فیصلہ کر رہے ہیں۔
امت شاہ، جو بی جے پی کے صدر نتن نبین کے راجیہ سبھا نامزدگی کے عمل میں شرکت کرنے والے ہیں، پٹنہ پہنچنے پر نتن نبین نے ان کا استقبال کیا۔ادھر نتیش کمار کے راجیہ سبھا انتخابات کے لیے نامزدگی داخل کرنے کے فیصلے نے ریاست میں ایک نئے وزیر اعلیٰ کی راہ ہموار کر دی ہے، جس سے جنتا دل (یونائیٹڈ) کے کارکنان اور حامی حیران رہ گئے ہیں۔
پٹنہ میں وزیر اعلیٰ کی رہائش گاہ کے باہر احتجاج کر رہے جنتا دل (یونائیٹڈ) کے کارکنان اور حامی اس بات پر یقین کرنے کو تیار نہیں تھے کہ نتیش کمار نے وزیر اعلیٰ کا عہدہ چھوڑنے کا فیصلہ کر لیا ہے۔
ایک جے ڈی یو کارکن نے کہا كہ یہ بھی ممکن ہے کہ ان کا اکاؤنٹ ہیک ہو گیا ہو”، جب انہوں نے سوشل میڈیا پلیٹ فارم ایکس پر نتیش کمار کی پوسٹ پر ردِعمل دیا۔ایک اور کارکن نے کہا کہ اگر وزیر اعلیٰ نتیش کمار نے اپنا فیصلہ تبدیل نہ کیا تو وہ احتجاج کریں گے۔
ایک حامی نے کہا كہ نتیش کمار عوام کے مینڈیٹ کی توہین نہیں کر سکتے۔ ان پر ایک بڑی سازش کے تحت زبردست دباؤ ڈالا جا رہا ہے۔ایک اور حامی نتیش کمار کے فیصلے سے بے حد پریشان نظر آیا اور ان سے وزیر اعلیٰ کے عہدے پر برقرار رہنے کی اپیل کی۔
اس نے کہا كہ یہ دل توڑ دینے والی خبر ہے۔ نتیش کمار طلبہ تحریک کے زمانے سے لے کر آج تک بہار کے عوام کی خدمت کر رہے ہیں۔ بہار کے لوگ انہیں اپنے خاندان کا فرد سمجھتے ہیں۔ نتیش کمار کے علاوہ یہاں کوئی اور وزیر اعلیٰ نہیں ہو سکتا۔ ہم چاہتے ہیں کہ وہ ہی وزیر اعلیٰ رہیں۔
نتیش کمار نے تصدیق کی ہے کہ وہ راجیہ سبھا جائیں گے اور موجودہ انتخابی مرحلے میں اپنی نامزدگی داخل کریں گے۔ 75 سالہ رہنما نے یہ بھی کہا کہ نئی کابینہ کو ان کی مکمل حمایت حاصل ہوگی۔
انہوں نے سوشل میڈیا پلیٹ فارم ایکس پر لکھا، “میں اس بار ہونے والے انتخابات میں راجیہ سبھا کا رکن بننا چاہتا ہوں۔ میں آپ سب کو پورے خلوص کے ساتھ یقین دلاتا ہوں کہ مستقبل میں بھی آپ کے ساتھ میرا رشتہ قائم رہے گا اور ایک ترقی یافتہ بہار کی تعمیر کے لیے آپ کے ساتھ مل کر کام کرنے کا میرا عزم مضبوط رہے گا۔ نئی حکومت جو بھی تشکیل پائے گی اسے میرا مکمل تعاون اور رہنمائی حاصل ہوگی۔
.gif)
