نئی دہلی: دہلی فسادات کی مبینہ بڑی سازش کے مقدمے کے ملزم شرجیل امام نے طویل عرصے سے جیل میں قید رہنے اور مقدمے کی سماعت میں پیش رفت نہ ہونے کا حوالہ دیتے ہوئے کڑکڑڈوما عدالت میں دوسری بار ضمانت کی درخواست دائر کی ہے۔ ان کی پہلی درخواستِ ضمانت سپریم کورٹ نے 5 جنوری 2026 کو مسترد کر دی تھی۔

نئی درخواست میں مؤقف اختیار کیا گیا ہے کہ سپریم کورٹ کے فیصلے کو چھ ماہ سے زیادہ عرصہ گزرنے کے باوجود مقدمے میں کوئی نمایاں پیش رفت نہیں ہوئی، جبکہ شرجیل امام تقریباً چھ برس سے زیر حراست ہیں۔ دوسری جانب، اسی مقدمے کے ایک اور ملزم عمر خالد کی جانب سے بھی باقاعدہ ضمانت کی درخواست دائر کی گئی ہے۔

ایڈیشنل سیشن جج (اے ایس جے) سمیر باجپئی نے جمعہ کے روز شرجیل امام کی تازہ درخواستِ ضمانت پر دہلی پولیس کو نوٹس جاری کرتے ہوئے جواب طلب کیا۔ اس سے قبل 9 جون کو عدالت نے عمر خالد کی درخواستِ ضمانت پر بھی نوٹس جاری کیا تھا۔ دونوں درخواستوں کی سماعت اب 4 جولائی کو ہوگی۔ شرجیل امام کی جانب سے دائر درخواست میں کہا گیا ہے کہ 5 جنوری 2026 کے سپریم کورٹ کے فیصلے کے بعد پیدا ہونے والی ’’اہم نئی صورتِ حال‘‘ کے باعث دوسری درخواست دائر کرنا ضروری ہو گیا ہے۔

درخواست میں کہا گیا ہے کہ سپریم کورٹ کے فیصلے کے چھ ماہ سے زائد عرصہ گزرنے کے باوجود مقدمے کی کارروائی میں کوئی بامعنی پیش رفت نہیں ہوئی اور ابھی تک فردِ جرم عائد کرنے سے متعلق دلائل بھی مکمل نہیں ہو سکے ہیں۔ شرجیل امام کے وکیل احمد ابراہیم نے عدالت میں مؤقف پیش کیا کہ مقدمہ ابھی تک فردِ جرم عائد کیے جانے کے مرحلے تک بھی نہیں پہنچ سکا۔ درخواست میں کہا گیا: ’’اس درخواست کے دائر کیے جانے تک مقدمہ ابھی فردِ جرم عائد کرنے کے مرحلے تک نہیں پہنچا ہے اور فردِ جرم سے متعلق دلائل ابھی تک مکمل نہیں ہوئے۔‘‘

درخواست میں گلفشا فاطمہ کیس میں سپریم کورٹ کے مشاہدات کا بھی حوالہ دیا گیا، جس میں دفاعی وکلا نے نشاندہی کی تھی کہ مقدمہ ابھی فردِ جرم سے متعلق دلائل کے مرحلے میں ہے اور روایتی معنوں میں ٹرائل کے آغاز کی کوئی قریبی پیش رفت نظر نہیں آتی۔ درخواست کے مطابق چھ ماہ بعد بھی صورتحال جوں کی توں ہے۔ مزید برآں، درخواست میں سید افتخار اندرابی بنام قومی تحقیقاتی ایجنسی (این آئی اے) مقدمے میں سپریم کورٹ کے فیصلے کا حوالہ دیتے ہوئے کہا گیا کہ اس میں انسدادِ دہشت گردی کے سخت قوانین کے تحت ضمانت سے متعلق کے اے نجیب فیصلے کے اصولوں سے مختلف نقطۂ نظر اختیار کیا گیا۔

درخواست میں یہ بھی نشاندہی کی گئی کہ اسی سپریم کورٹ بنچ نے، جس نے گلِفشا فاطمہ مقدمے میں فیصلہ دیا تھا، بعد ازاں 22 مئی 2026 کو اسی مبینہ بڑی سازش کے مقدمے کے شریک ملزم تسلیم احمد کو عبوری ضمانت بھی دی تھی۔ عدالت نے ساتھ ہی غیر قانونی سرگرمیاں (انسداد) قانون (یو اے پی اے) کی دفعہ 43ڈی(5) کے تحت ضمانت سے متعلق وسیع قانونی سوال کو بھی چیف جسٹس ہند کی جانب سے تشکیل دی جانے والی ایک بڑی بنچ کے سپرد کرنے کی سفارش کی تھی۔