نئی دہلی: یونائیٹڈ ڈاکٹرس فرنٹ (UDF) نے پیر کے روز گہری تشویش اور مایوسی کا اظہار کرتے ہوئے کہا کہ اس کے نمائندوں کو پارلیمنٹ کی محکمانہ قائمہ کمیٹی برائے تعلیم، خواتین، بچوں، نوجوانوں اور کھیل کی کارروائی میں شرکت کی اجازت نہیں دی گئی، حالانکہ کمیٹی کی جانب سے انہیں تقریباً ایک ہفتہ قبل باضابطہ دعوت نامہ موصول ہوا تھا۔

یونائیٹڈ ڈاکٹرس فرنٹ کی جانب سے جاری بیان کے مطابق تنظیم کے نمائندے کمیٹی کی رسمی دعوت پر پارلیمنٹ پہنچے تھے تاکہ وہ نیٹ (NEET)، نیشنل ٹیسٹنگ ایجنسی (NTA) اور امتحانی اصلاحات کے حوالے سے نوجوان ڈاکٹروں، طبی طلبہ اور صحت کے شعبے سے وابستہ افراد کے مؤقف سے آگاہ کر سکیں۔

تنظیم نے کمیٹی کی درخواست پر اپنی تفصیلی تحریری سفارشات، متعلقہ دستاویزات اور پریزنٹیشن مواد بھی پہلے ہی جمع کرا دیا تھا۔ بیان میں کہا گیا ہے کہ پارلیمنٹ پہنچنے پر یو ڈی ایف کے نمائندوں کو مطلع کیا گیا کہ انہیں کمیٹی کی کارروائی میں شرکت کی اجازت نہیں دی جائے گی۔

تنظیم کے مطابق پارلیمانی قائمہ کمیٹی کے چیئرمین نے ذاتی ملاقات میں بتایا کہ کمیٹی کے بیشتر ارکان کی مخالفت کے باعث وہ یو ڈی ایف کی شرکت ممکن نہیں بنا سکتے۔ تاہم انہوں نے اس صورتحال پر افسوس کا اظہار کرتے ہوئے یو ڈی ایف کے نمائندوں سے علیحدہ ملاقات کی، ان کی تفصیلی سفارشات وصول کیں اور یقین دہانی کرائی کہ ان تجاویز کو سرکاری ریکارڈ کا حصہ بنایا جائے گا۔

یونائیٹڈ ڈاکٹرس فرنٹ کے چیئرمین ڈاکٹر لکشیا متل نے کہا: "یہ افسوسناک ہے کہ ملک بھر کے نوجوان ڈاکٹروں اور میڈیکل داخلے کے خواہش مند طلبہ کی نمائندگی کرنے والی تنظیم کو باضابطہ دعوت ملنے کے باوجود کمیٹی کے سامنے اپنا مؤقف پیش کرنے کا موقع نہیں دیا گیا۔ ہم پارلیمانی عمل اور کمیٹی کے اختیارات کا احترام کرتے ہیں، لیکن لاکھوں طلبہ اور صحت کے شعبے سے وابستہ افراد کی نمائندگی کرنے والے فریقین کو سنا جانا چاہیے، خصوصاً ایسے معاملات میں جو ملک کے اہم ترین قومی امتحانات سے متعلق ہوں۔"

یو ڈی ایف نے واضح کیا کہ اس کی تشویش کسی فردِ واحد کے خلاف نہیں بلکہ طبی تعلیم اور قومی امتحانات سے متعلق پالیسی مباحث میں تمام متعلقہ فریقوں کی شمولیت کے اصول سے متعلق ہے۔ کمیٹی کو جمع کرائی گئی اپنی سفارشات میں یو ڈی ایف نے نیٹ اور نیشنل ٹیسٹنگ ایجنسی سے متعلق متعدد اہم مسائل اٹھائے۔ تنظیم نے سفارش کی کہ پارلیمنٹ کے ایک قانون کے ذریعے ایک نئی قانونی حیثیت رکھنے والی قومی امتحانی اتھارٹی قائم کی جائے، جو موجودہ این ٹی اے کے نظام کی جگہ لے اور شفافیت، جوابدہی، قانونی نگرانی اور عوامی اعتماد کو مزید مضبوط بنائے۔

تنظیم نے نیٹ-یو جی 2026 سے متعلق خدشات اور نیٹ-یو جی 2024 کے حل طلب معاملات کی جامع تحقیقات کا بھی مطالبہ کیا، جن میں امتحانی سکیورٹی، پرچہ لیک کے الزامات، امتحانی مراکز کی تقسیم، گریس مارکس تنازع، مختلف ایجنسیوں اور ٹھیکیدار اداروں کا کردار اور دیگر ایسے امور شامل ہیں جو امتحانی نظام پر عوامی اعتماد کو متاثر کر رہے ہیں۔

یو ڈی ایف نے مزید درخواست کی کہ متعلقہ حکام نیشنل ٹیسٹنگ ایجنسی کی جانب سے قومی نشان (National Emblem) کے استعمال کی قانونی حیثیت اور مجاز منظوری کا بھی جائزہ لیں۔ تنظیم کا کہنا ہے کہ نیٹ امتحان سے متعلق بار بار سامنے آنے والے تنازعات نے میڈیکل طلبہ اور ان کے خاندانوں کے اعتماد کو شدید نقصان پہنچایا ہے۔ اسی لیے تمام ادارہ جاتی کوتاہیوں اور جوابدہی کے نظام کا شفاف، غیر جانبدار اور مقررہ مدت کے اندر جائزہ لیا جانا ضروری ہے۔ آخر میں یو ڈی ایف نے پارلیمانی قائمہ کمیٹی کے چیئرمین کا شکریہ ادا کیا کہ انہوں نے وفد سے ذاتی ملاقات کی، اس کی سفارشات وصول کیں اور اٹھائے گئے مسائل پر غور کرنے کی یقین دہانی کرائی۔