ٹرمپ نےایل جی ترنجیت سندھو کی ہندوستان امریکہ تعلقات میں ان کے کردار کی تعریف کی
واشنگٹن
امریکی صدر ڈونالڈ ٹرمپ نے جمعرات کے روز ترنجیت سنگھ سندھو کو دہلی کا نیا لیفٹیننٹ گورنر مقرر ہونے پر مبارکباد دی اور ہندوستان–امریکہ تعلقات کو مضبوط بنانے میں ان کے کردار کو سراہا۔ ایک بیان میں ٹرمپ نے سندھو کے سفارتی تجربے کی تعریف کی اور ان کے نئے عہدے کے لیے نیک خواہشات کا اظہار کیا۔
ٹرمپ نے ٹروتھ سوشل پر لکھا کہ دہلی کے نئے لیفٹیننٹ گورنر بننے پر ترنجیت سندھو کو دلی مبارکباد۔ ایک ماہر سفارتکار اور امریکہ میں سابق سفیر کے طور پر انہوں نے ہمیشہ امریکہ–ہندوستان تعلقات کو مضبوط بنانے کے لیے گہری وابستگی دکھائی ہے۔ دہلی کی ترقی کی قیادت کرنے اور عالمی روابط کو آگے بڑھانے میں ان کی کامیابی کی خواہش کرتا ہوں۔
اسی دوران، دہلی کے لیفٹیننٹ گورنر سندھو نے بدھ کے روز امریکہ کی آزادی کے 250 سال مکمل ہونے کے موقع پر منعقدہ “فریڈم 250” تقریب میں ہندوستان–امریکہ تعاون کو مزید مضبوط بنانے کی اہمیت پر زور دیا۔ اس تقریب میں شرکت کرتے ہوئے انہوں نے کہا کہ اس شراکت داری سے دونوں ممالک کے درمیان خاص طور پر سرمایہ کاری اور ٹیکنالوجی کے شعبوں میں تعاون کو مزید گہرا کرنے کا موقع ملا ہے۔
سندھو نے ایک پیغام میں کہا کہ نئی دہلی میں فریڈم 250 تقریب کے آغاز کے موقع پر امریکہ کے سفیر سرجیو گور سے ملاقات کرکے مجھے بے حد خوشی ہوئی۔ دہلی میں امریکی سرمایہ کاری بڑھانے اور ہندوستان–امریکہ ٹیکنالوجی تعاون کو وسعت دینے پر ہماری مفید بات چیت ہوئی۔ ہندوستان اور امریکہ کے درمیان مضبوط شراکت داری عالمی ترقی کا ایک اہم ستون بنی ہوئی ہے۔ میں ایسے تعاون کی امید کرتا ہوں جس سے دہلی کے باشندوں کو فائدہ پہنچے۔
ترنجیت سنگھ سندھو نے 11 مارچ 2026 کو دہلی ہائی کورٹ کے چیف جسٹس دیویندر کمار اپادھیائے کی موجودگی میں اپنے عہدے کا حلف لیا۔ وہ ملک بھر میں گورنروں اور لیفٹیننٹ گورنروں کی تقرریوں میں بڑے پیمانے پر کی گئی تبدیلیوں کا حصہ ہیں۔ اس تبدیلی کے تحت انہوں نے وی کے سکسینہ کی جگہ لی ہے۔
ترنجیت سنگھ سندھو معروف سکھ رہنما تیجا سنگھ سمندری کے پوتے ہیں۔ وہ 1988 بیچ کے ہندوستانی فارن سروس کے افسر رہے اور فروری 2020 سے جنوری 2024 تک امریکہ میں ہندوستان کے سفیر کے طور پر خدمات انجام دیتے رہے۔ ریٹائرمنٹ کے بعد انہوں نے 2024 میں بھارتیہ جنتا پارٹی میں شامل ہو کر سیاست میں قدم رکھا اور اسی سال امرتسر سے لوک سبھا کا انتخاب بھی لڑا، تاہم انہیں کانگریس کے رہنما گرجیت سنگھ اوجلا کے ہاتھوں شکست کا سامنا کرنا پڑا۔
