نئی دہلی
کانگریس کے سینئر رہنما جے رام رمیش نے بدھ کے روز مرکزی وزیر برائے قبائلی امور جویل اوراؤں کو گریٹ نکوبار پروجیکٹ کے حوالے سے ایک خط لکھا اور مطالبہ کیا کہ فاریسٹ رائٹس ایکٹ 2006 کی دفعات کو نہ صرف کاغذی طور پر نافذ دکھایا جائے بلکہ ان پر پوری دیانت داری اور اصل روح کے مطابق عمل بھی کیا جائے۔
گزشتہ ہفتے جویل اوراؤں کی جانب سے بھیجے گئے خط کے جواب میں جے رام رمیش نے کہا کہ وزیر کا مکتوب ’’فاریسٹ رائٹس ایکٹ 2006 کے تحت مقامی قبائلی برادریوں کو حاصل حقوق کو جان بوجھ کر نظر انداز کرنے کا جواز پیش کرنے کی کوشش‘‘ معلوم ہوتا ہے۔
رمیش نے کہا کہ میں 13 مئی 2026 کو گریٹ نکوبار جزیرے کے منصوبے کے بارے میں لکھے گئے میرے خط کے جواب پر آپ کا شکریہ ادا کرتا ہوں، لیکن مجھے تشویش ہے کہ میرے اٹھائے گئے مخصوص قانونی نکات کا جواب دینے کے بجائے آپ کا خط مقامی قبائلی برادریوں کے حقوق کو نظر انداز کرنے کو درست ثابت کرنے کی کوشش کرتا دکھائی دیتا ہے۔
انہوں نے کہا کہ وزیر کا یہ دعویٰ کہ ’’گریٹ نکوبار میں ترقیاتی سرگرمیاں انڈمان و نکوبار جزائر (قبائلی تحفظ) ضابطہ 1956 کے تحت نافذ قانونی ذمہ داریوں کے مطابق انجام دی جائیں گی‘‘، حقیقت کے برعکس ہے، کیونکہ اسی ضابطے کے تحت قبائلی محفوظ علاقے کے 84.10 مربع کلومیٹر حصے کو تحفظ یافتہ زون سے خارج کرنے کی تجویز موجود ہے۔
سابق مرکزی وزیر ماحولیات جے رام رمیش نے کہا کہ وہ یہ سمجھنے سے قاصر ہیں کہ جن جنگلات کو قبائلی برادریاں پہلے ہی استعمال کر رہی ہیں، انہیں دوبارہ قبائلی محفوظ علاقہ قرار دینا کس طرح اس نقصان کی تلافی کر سکتا ہے جو علاقے کو محفوظ زون سے خارج کرنے کے نتیجے میں ہوگا یا قبائلی حقوق کے تحفظ میں مددگار ثابت ہوگا۔
انہوں نے مزید کہا کہ انڈمان و نکوبار انتظامیہ کا یہ دعویٰ بھی مکمل طور پر درست نہیں ہے کہ اس منصوبے کی وجہ سے کسی قبائلی آبادی کو بے گھر نہیں کیا جائے گا۔رمیش کے مطابق منصوبے کے پہلے مرحلے کے لیے 130.75 مربع کلومیٹر جنگلاتی رقبے کو دیگر مقاصد کے لیے منتقل کیا جانا ہے، جبکہ یہ علاقہ شومپین قبیلے کے رہائشی علاقوں کا حصہ ہے اور اس میں نکوباری برادری کی روایتی زمینیں اور دیہات بھی شامل ہیں۔
انہوں نے کہا کہ منصوبے کے مشیر ادارے اے ای کام کی جانب سے شائع کردہ نقشوں میں بھی منصوبے کے اندر ’’شومپین قبائل کا مقام‘‘ واضح طور پر نشان زد کیا گیا ہے، جبکہ بعض نکوباری دیہات بھی انہی نقشوں میں دکھائے گئے ہیں۔جے رام رمیش نے مزید کہا کہ نیتی آیوگ نے معروف ماہرِ بشریات پروفیسر وشوجیت پانڈیا سے اس معاملے پر ایک رپورٹ تیار کروائی تھی۔
انہوں نے کہا کہ ڈاکٹر پانڈیا کی ویڈیو رپورٹ میں شومپین قبیلے کا ایک فرد واضح طور پر یہ کہتے ہوئے نظر آتا ہے: ‘اگر جنگلات کاٹنے ہیں تو ساحلی علاقوں میں کاٹیے، ہماری پہاڑیوں تک مت آئیے۔’ مجھے یہ دیکھ کر شدید حیرت ہوئی کہ انتظامیہ اس ویڈیو ثبوت کو نظر انداز کر رہی ہے، جس میں شومپین برادری کا فرد ڈاکٹر پانڈیا اور ان کی ٹیم سے اپنے جنگلات کو محفوظ رکھنے کی اپیل کر رہا ہے۔
.jpg "قبائلی حقوق کو جان بوجھ کر نظر انداز کیا گیا:جےرام رمیش")
