کولکتہ

 ترنمول کانگریس (ٹی ایم سی) کے ریاستی ہیڈکوارٹر پر پارٹی کے باغی دھڑے کے قبضے کے بعد، مغربی بنگال کے وزیر دلیپ گھوش نے ہفتے کے روز اس اندرونی تنازع کو پارٹی کا "داخلی معاملہ" قرار دیتے ہوئے کہا کہ پارٹی دفاتر اور اسمبلی نشستوں کی ملکیت کا فیصلہ قانون اور اسمبلی اسپیکر کریں گے۔

ٹی ایم سی میں جاری سیاسی بحران پر بات کرتے ہوئے دلیپ گھوش نے کہا کہ اگرچہ اس طرح کے واقعات سے گریز کیا جانا چاہیے، تاہم قیادت اور عہدوں کے بارے میں فیصلہ قانونی دائرہ کار کے تحت ہوگا۔انہوں نے صحافیوں سے گفتگو کرتے ہوئے کہا کہ یہ ٹی ایم سی کا اندرونی معاملہ ہے۔ دفاتر یا اسمبلی نشستوں پر کس کا حق ہوگا، اس کا فیصلہ اسپیکر اور قانون کریں گے۔ تاہم، اس قسم کا رویہ نہیں ہونا چاہیے۔ جمہوریت میں اپوزیشن کا ایک اہم کردار ہوتا ہے، جو حکومت کی رہنمائی اور بہتر طرز حکمرانی کو یقینی بنانے کے لیے ضروری ہے۔

وزیر نے ٹی ایم سی رہنما ابھیشیک بنرجی پر بھی سخت تنقید کرتے ہوئے الزام لگایا کہ انتخابی مہم کے دوران ان کے "اشتعال انگیز" بیانات کی وجہ سے ریاست میں انتخابات کے بعد بڑے پیمانے پر تشدد بھڑکا۔

کلکتہ ہائی کورٹ کی جانب سے ابھیشیک بنرجی کی اس درخواست پر فوری راحت دینے سے انکار کے حوالے سے، جس میں انہوں نے اپنے "ڈی جے" بیان سے متعلق مقدمے میں آواز کا نمونہ دینے کی تجویز کو چیلنج کیا تھا، دلیپ گھوش نے کہا کہ انتخابات کے دوران ان کے بیانات اشتعال انگیز تھے۔ ہماری پارٹی کے متعدد کارکنوں پر حملے کیے گئے، ان کے گھروں کو انتخابی تشدد میں تباہ کر دیا گیا۔ ایسے لوگوں کو آزاد نہیں رہنا چاہیے، ان کے لیے جیل ہی مناسب جگہ ہے۔

دلیپ گھوش کا یہ بیان جمعہ کے روز ٹی ایم سی کے میٹروپولیٹن ریاستی دفتر کے باہر مرکزی ریزرو پولیس فورس (سی آر پی ایف) اور کولکتہ پولیس کی بھاری تعیناتی کے بعد سامنے آیا ہے۔سکیورٹی اقدامات اس دعوے کے بعد کیے گئے کہ قائد حزب اختلاف ریتابرتا بنرجی کی قیادت میں ایک باغی گروپ نے پارٹی ہیڈکوارٹر کا کنٹرول سنبھال لیا ہے۔ یہ پیش رفت اس کے ایک روز بعد ہوئی، جب باغی دھڑے نے نئی دہلی میں الیکشن کمیشن سے رجوع کرتے ہوئے 28 سال پرانی پارٹی کے نام، فنڈز اور دو پھولوں والے انتخابی نشان پر اپنا دعویٰ پیش کیا تھا۔

فرہاد حکیم، جاوید خان اور اکھروززمان کے ہمراہ ریتابرتا بنرجی نے ای ایم بائی پاس پر واقع پارٹی دفتر، جو 2022 سے پارٹی کا مرکزی دفتر ہے، میں داخل ہو کر اس پر اپنا کنٹرول قائم کرنے کا اعلان کیا۔ باغی دھڑے نے دفتر کے سائن بورڈ تبدیل کر دیے اور ممتا بنرجی کی جگہ سینئر رکن اسمبلی اروپ رائے کو نیا چیئرمین قرار دیتے ہوئے ایک بینر بھی نصب کر دیا۔

باغی دھڑے کا کہنا ہے کہ عمارت کے لیز کی مدت ختم ہو چکی تھی اور ان کی ورکنگ کمیٹی کے تحت ایک نیا معاہدہ کیا گیا ہے۔رکن اسمبلی اکھروززمان نے کہا کہ یہ ہمارا پارٹی دفتر ہے اور یہ ہمارا ہی پارٹی دفتر رہے گا۔ مرکزی دروازے کی چابی ہمارے پاس رہے گی۔" انہوں نے مزید کہا کہ وہ دفتر میں موجود ممتا بنرجی کی تصاویر کا اب بھی احترام کرتے ہیں، تاہم وہ ابھیشیک بنرجی کی قیادت کو مسترد کرتے ہیں۔

پارٹی ہیڈکوارٹر پر اس ڈرامائی قبضے کے بعد ممتا بنرجی کے حامی دھڑے میں شدید غصہ پایا جا رہا ہے، جس کے نتیجے میں سینئر رہنما سڑکوں پر نکل آئے اور پولیس میں ہنگامی شکایات درج کرائیں۔کولکتہ پولیس نے اعلان کیا ہے کہ وہ عمارت کی ملکیت اور لیز سے متعلق سرکاری دستاویزات کی جانچ کے بعد ہی وہاں معمول کی سیاسی سرگرمیوں کی اجازت دے گی، جس کے بعد اس سیاسی تنازع کا اگلا مرحلہ نئی دہلی میں طے ہونے کا امکان ہے۔

الیکشن کمیشن نے ممتا بنرجی کے حامی دھڑے اور ریتابرتا بنرجی کے باغی گروپ، دونوں کو ہدایت دی ہے کہ وہ 6 جولائی کو شام 5:30 بجے تک اپنے تنظیمی دعوے اور جوابی دعوے مکمل تفصیلات کے ساتھ جمع کرائیں۔