نئی دہلی: ترنمول کانگریس کے ارکان پارلیمنٹ کے ایک وفد نے اتوار کو اسپیکر لوک سبھا اوم برلا کے دفتر میں درخواست جمع کراتے ہوئے پارٹی کے اندر علیحدہ گروپ بنانے کی کوشش کو غیر آئینی قرار دیا اور اس معاملے میں مداخلت کی اپیل کی۔

وفد کی قیادت کیرتی آزاد اور ساگاریکا گھوش نے کی۔ درخواست میں مؤقف اختیار کیا گیا کہ آئین اور انسدادِ انحراف قانون کے تحت پارلیمنٹ کے اندر کسی سیاسی جماعت کے نام اور انتخابی نشان پر منتخب ہونے کے بعد الگ گروپ بنانے کی کوئی گنجائش موجود نہیں ہے۔

کیرتی آزاد نے کہا کہ سپریم کورٹ کی آئینی بنچ واضح کر چکی ہے کہ سیاسی جماعتوں میں تقسیم کی کوئی آئینی حیثیت نہیں۔ انہوں نے کہا کہ پارٹی نے اپنا مؤقف اسپیکر تک پہنچا دیا ہے اور انہیں امید ہے کہ فیصلہ آئین اور قواعد کے مطابق ہوگا۔

انہوں نے مزید کہا کہ ترنمول کانگریس چند ارکان پارلیمنٹ یا اسمبلی کا نام نہیں بلکہ لاکھوں کارکنوں کی جدوجہد کا نتیجہ ہے۔ ان کے مطابق ممتا بنرجی نے پارٹی کو مضبوط بنیاد فراہم کی اور اسی قیادت کے تحت جماعت نے اپنی شناخت قائم کی۔

ساگاریکا گھوش نے کہا کہ ترنمول کانگریس ایک متحد اور ناقابل تقسیم جماعت ہے۔ ان کے مطابق جو ارکان پارٹی کے انتخابی نشان پر کامیاب ہوئے ہیں وہ ایوان کے اندر الگ گروپ تشکیل نہیں دے سکتے کیونکہ یہ آئین اور قانون دونوں کے خلاف ہے۔

انہوں نے کہا کہ اگر کوئی رکن کسی دوسری جماعت میں شامل ہونا چاہتا ہے تو اسے قانون کے مطابق عمل کرنا ہوگا، بصورت دیگر اس کی رکنیت پر سوالات اٹھ سکتے ہیں۔

یہ پیش رفت ایسے وقت میں سامنے آئی ہے جب اطلاعات ہیں کہ ترنمول کانگریس کے بعض ارکان پارلیمنٹ لوک سبھا میں الگ شناخت اور نشستوں کے انتظام کا مطالبہ کر رہے ہیں۔ سیاسی حلقوں کے مطابق حالیہ مغربی بنگال اسمبلی انتخابات میں پارٹی کی مایوس کن کارکردگی کے بعد جماعت کے اندر اختلافات نمایاں ہوئے ہیں، جس سے قیادت اور بعض رہنماؤں کے درمیان فاصلے بڑھنے کی خبریں سامنے آ رہی ہیں۔