کولکتہ:مغربی بنگال میں جاری سیاسی پیش رفت کے درمیان ترنمول کانگریس نے منگل کے روز پارٹی کے 8 سینئر رہنماؤں کو پارٹی سے خارج کر دیا۔جن رہنماؤں کو خارج کیا گیا ان میں جاوید احمد خان۔ فرہاد حکیم۔ اروپ رائے۔ رتھن گھوش۔ بپلاب مترا۔ صابینہ یاسمین۔ اروپ بسواس اور سنیہاسس چکرورتی شامل ہیں۔آل انڈیا ترنمول کانگریس نے اس سے قبل انہی رہنماؤں کو شوکاز نوٹس جاری کرتے ہوئے الزام لگایا تھا کہ انہوں نے جان بوجھ کر پارٹی مخالف سرگرمیوں میں حصہ لیا۔

یہ پیش رفت پارٹی کے اندرونی تنظیمی اختلافات کے پس منظر میں سامنے آئی ہے۔ پیر کے روز مغربی بنگال اسمبلی میں قائد حزب اختلاف رتبراٹو بنرجی کی قیادت میں ایک باغی گروپ نے آل انڈیا ترنمول کانگریس کمیٹی کے لیے نئی قیادت کے ڈھانچے کا اعلان کیا تھا اور اروپ رائے کو اس کا چیئرمین مقرر کیا تھا۔

اس گروپ نے 30 رکنی نیشنل ورکنگ کمیٹی بھی تشکیل دی تھی اور ساتھ ہی اس بات کا اعادہ کیا تھا کہ سابق وزیر اعلیٰ ممتا بنرجی پارٹی میں سرپرست اور رہنما کا کردار ادا کریں۔رتبراٹو بنرجی نے پیر کو صحافیوں سے گفتگو کرتے ہوئے کہا تھا کہ اروپ رائے کو متفقہ طور پر آل انڈیا ترنمول کانگریس کا چیئرمین منتخب کیا گیا ہے۔ انہوں نے سابق وزیر اروپ بسواس اور رکن اسمبلی فرہاد حکیم کو نائب چیئرمین بھی نامزد کیا۔

انہوں نے کہا۔"آج یہاں آل انڈیا ترنمول کانگریس کا خصوصی اجلاس منعقد کیا گیا۔ اس اجلاس میں مندوبین کے متفقہ انتخاب کے ذریعے آل انڈیا ترنمول کانگریس کمیٹی اور نیشنل ورکنگ کمیٹی تشکیل دی گئی۔ اروپ رائے کو آل انڈیا ترنمول کانگریس کا چیئرمین منتخب کیا گیا ہے۔"رتبراٹو بنرجی نے بتایا کہ 30 رکنی کمیٹی میں فرہاد حکیم۔ اروپ بسواس۔ رتھن گھوش۔ صابینہ یاسمین۔ جاوید خان۔ سندیپن ساہا اور دیگر شامل ہیں۔ جبکہ فرہاد حکیم۔ اروپ بسواس۔ رتھن گھوش اور صابینہ یاسمین کو نائب صدور مقرر کیا گیا ہے۔انہوں نے مزید کہا کہ آنے والے دنوں میں ضلعی صدور اور ضلعی کمیٹیاں بھی تشکیل دی جائیں گی۔

انہوں نے کہا۔"ہم نے ترنمول کانگریس میں ممتا بنرجی کے کردار کے بارے میں اپنا مؤقف بارہا واضح کیا ہے۔ ہم چاہتے ہیں کہ دیدی سرپرست کی ذمہ داری سنبھالیں اور ہماری رہنمائی کریں۔"بعد ازاں ممتا بنرجی کی زیر صدارت نیشنل ورکنگ کمیٹی کے اجلاس کے بارے میں اے این آئی سے گفتگو کرتے ہوئے رتبراٹو بنرجی نے مخالف دھڑے کی جانب سے کیے گئے فیصلوں کی قانونی حیثیت پر سوال اٹھایا۔