آواز دی وائس : نئی دہلی

ٹائم میگزین نے وزیر اعظم نریندر مودی ، مغربی بنگال کی وزیر اعلیٰ ممتا بنرجی اور سیرم انسٹی ٹیوٹ آف انڈیا کے سی ای او آدر پونا والا کو 2021 کے 100 بااثر افراد میں شامل کیا۔ ٹائم نے بدھ کو اپنی 2021 کے 100 بااثر افراد کی سالانہ فہرست جاری کی۔ٹائم میگزین نے ہر سال کی طرح اس بار بھی مختلف شعبوں سے تعلق رکھنے والے دنیا کے 100 بااثر ترین افراد کی فہرست جاری کی ہے جس میں سیاست دان، فنکار اور کھلاڑی بھی شامل ہیں۔

ان میں امریکی صدر جو بائیڈن ، نائب صدر کملا ہیرس ، چینی صدر شی جن پنگ ، ڈیوک اور ڈچس آف سسیکس پرنس ہیری اور میگھن اور سابق امریکی صدر ڈونلڈ ٹرمپ شامل ہیں۔ طالبان کے شریک بانی اور نائب وزیراعظم ملا عبدالغنی برادر بھی اس فہرست میں شامل ہیں۔

ٹائم میگزین 100 انتہائی بااثر افراد کی فہرست کو 6 بڑی اقسام میں تقسیم کیا گیا ہے - پائنیر ، آرٹسٹ ، لیڈر ، آئیکن ، ٹائٹن اور انووایٹر۔ ہر زمرے میں دنیا بھر سے شخصیات کی فہرست جاری کی جاتی ہے۔ میگزین کی 100 بااثر افراد کی فہرست کو انتہائی طاقتور اور قابل اعتماد فہرستوں میں شمار کیا جاتا ہے۔ ہر شخص کو میگزین کے ایڈیٹرز اپنے غیر معمولی کام کے لیے منتخب کرتے ہیں اور فہرست میں شامل ہونا متعلقہ فرد کے لیے اعزاز سمجھا جاتا ہے۔

 پی ایم مودی کے ٹائم پروفائل میں کہا گیا ہے کہ آزادی کے بعد 74 سالوں میں ، ہندوستان میں تین نمایاں لیڈر تھے - جواہر لال نہرو ، اندرا گاندھی اور نریندر مودی۔

ممتا بنرجی کے پروفائل میں کہا گیا ہے کہ وہ اپنی پارٹی ترنمول کانگریس کی قیادت نہیں کرتی بلکہ وہ خود پارٹی ہیں ۔ پونا والا کا پروفائل بتاتا ہے کہ کورونا وبائی مرض ابھی ختم نہیں ہوا ہے اور پونا والا اب بھی اسے ختم کرنے میں مدد کررہے ہیں۔ ویکسین کا تقاضا اب بھی بہت زیادہ ہے اور دنیا کے ایک حصے میں ویکسینیشن تاخیر کے عالمی نتائج ہوسکتے ہیں ، بشمول مزید خطرناک قسموں کے ابھرنے کا خطرہ ہوسکتا ہے۔ 

ٹینس پلیئر نومی اوساکا ، روسی اپوزیشن کارکن الیکسی نوالنی ، میوزک آئیکن برٹنی سپیئرز ، ایشین پیسفک پالیسی اینڈ پلاننگ کونسل کے ایگزیکٹو ڈائریکٹر منجوشا پی کلکرنی ، ایپل کے سی ای او ٹم کک ، اداکار کیٹ ونسلیٹ کو بھی ٹائم میگزین نے اپنی 100 بااثر افراد کی فہرست میں شامل کیا ہے۔

Introducing the 2021 #TIME100 featuring the 100 most influential people of the year https://t.co/NEApPrOrN0

— TIME (@TIME) September 15, 2021