نئی دہلی: دہلی پولیس نے ہفتہ کی صبح سویرے ایک منظم اور خفیہ کارروائی کے ذریعے ماحولیاتی کارکن سونم وانگچک کو جنتر منتر کے احتجاجی مقام سے صفدر جنگ اسپتال منتقل کر دیا۔ اعلیٰ پولیس ذرائع کے مطابق یہ حکمت عملی نئے پولیس کمشنر انوراگ کمار کے عہدہ سنبھالنے کے بعد ہونے والی ایک اعلیٰ سطحی میٹنگ میں تیار کی گئی تھی۔

ذرائع کے مطابق سینئر افسران نے کارروائی کے لیے صبح سویرے کا وقت منتخب کیا، کیونکہ اس وقت احتجاج میں شریک افراد کی تعداد سب سے کم ہوتی ہے۔ پولیس نے اس مختصر وقفے کا بھی فائدہ اٹھایا جب وانگچک کے قریبی ساتھی ابھیجیت دیپکے احتجاجی مقام سے کچھ دیر کے لیے باہر گئے ہوئے تھے، جس سے اسٹیج اپنے اہم منتظم سے خالی ہو گیا تھا۔

اس کے بعد نئی دہلی ضلع کی اسپیشل اسٹاف اور مقامی پولیس کے تقریباً 30 سے 35 اہلکار سادہ لباس میں خاموشی سے بیریکیڈ لگے احتجاجی مقام میں داخل ہوئے۔

ذرائع کا کہنا ہے کہ پوری کارروائی انتہائی رازداری سے انجام دی گئی۔ مکمل منصوبے سے صرف چند اعلیٰ افسران ہی واقف تھے، جبکہ انسپکٹروں اور بیشتر اہلکاروں کو صرف موقع پر پہنچ کر اپنی پوزیشن سنبھالنے کی ہدایت دی گئی تھی۔

پولیس اہلکاروں نے سونم وانگچک کے بستر کو چاروں طرف سے بڑی سفید چادروں سے ڈھانپ لیا تاکہ انہیں ہٹاتے وقت مجمع جمع نہ ہو اور کسی ہنگامے سے بچا جا سکے۔ اس کے بعد انہیں خاموشی سے اسٹیج سے نکال کر ایمبولینس تک پہنچایا گیا۔

ذرائع کے مطابق یہ کارروائی تین سطحوں میں انجام دی گئی۔

• پہلی سطح: سادہ لباس میں موجود اہلکاروں نے اسٹیج کا کنٹرول سنبھالا اور سونم وانگچک کو وہاں سے منتقل کیا۔

• دوسری سطح: سی آر پی ایف اور ریپڈ ایکشن فورس (RAF) کے اہلکاروں نے بیریکیڈ کے باہر موجود مظاہرین کو روکے رکھا تاکہ کسی قسم کی جھڑپ نہ ہو۔

• تیسری سطح: دہلی پولیس کے سینئر افسران ایمبولینس اور پولیس گاڑیوں کے قریب قائم کنٹرول پوائنٹ سے پوری کارروائی کی نگرانی کرتے رہے۔

سونم وانگچک کو ایمبولینس میں منتقل کیے جانے کے بعد ٹریفک پولیس نے صفدر جنگ اسپتال تک کا راستہ مکمل طور پر خالی کرایا، جس سے ایمبولینس بغیر کسی رکاوٹ کے اسپتال پہنچ گئی۔

کارروائی مکمل ہونے کے کچھ ہی دیر بعد ابھیجیت دیپکے احتجاجی مقام پر واپس پہنچے اور الزام لگایا کہ ان کی غیر موجودگی میں سونم وانگچک کو وہاں سے ہٹا دیا گیا۔ انہوں نے اعلان کیا کہ وہ خود بھوک ہڑتال جاری رکھتے ہوئے احتجاج کو آگے بڑھائیں گے۔

دوسری جانب دہلی پولیس نے مؤقف اختیار کیا کہ پوری کارروائی انتہائی تحمل اور پُرامن انداز میں انجام دی گئی۔ نئی دہلی کے ڈپٹی کمشنر آف پولیس (ڈی سی پی) کے مطابق دہلی ہائی کورٹ کے احکامات اور ڈاکٹروں کے مشورے کے مطابق سونم وانگچک کی بگڑتی ہوئی صحت کے پیش نظر انہیں ضروری طبی علاج کے لیے اسپتال منتقل کیا گیا۔ پولیس کے مطابق کارروائی کے دوران بعض مظاہرین نے رکاوٹ ڈالنے کی کوشش کی، جس سے معمولی ہنگامہ آرائی ہوئی، تاہم پولیس نے زیادہ سے زیادہ تحمل کا مظاہرہ کرتے ہوئے کارروائی کو بحفاظت مکمل کیا اور مظاہرین سے اپیل کی کہ وہ جنتر منتر کا مقام پرامن طریقے سے خالی کر دیں۔