راج ناندگاؤں/ آواز دی وائس
چھتیس گڑھ کی تین ضلعی عدالتوں کو جمعرات کے روز نامعلوم ای میلز کے ذریعے بم سے اڑانے کی دھمکی موصول ہوئی، جس کے بعد پولیس نے عدالتی احاطوں کی سخت تلاشی لی۔ پولیس حکام کے مطابق راج ناندگاؤں، درگ اور بلاس پور اضلاع کی عدالتوں کی سرکاری ای میل آئی ڈیز پر دھمکی آمیز پیغامات موصول ہوئے، جس کے بعد فوراً پولیس کو الرٹ کر دیا گیا۔
راج ناندگاؤں میں عدالت کی سرکاری ای میل آئی ڈی پر صبح 10:07 بجے ایک نامعلوم شخص کی جانب سے ای میل موصول ہوئی، جس میں آر ڈی ایکس پر مبنی امپرووائزڈ ایکسپلوسیو ڈیوائس (آئی ای ڈی) کے ذریعے خودکش حملے کی دھمکی دی گئی تھی۔ راج ناندگاؤں کے ایک پولیس افسر نے بتایا کہ ای میل بھیجنے والے نے یہ بھی دھمکی دی تھی کہ ججوں کو دوپہر 2:35 بجے تک عدالتی احاطے سے باہر نکال دیا جائے۔
انہوں نے بتایا کہ اس کے فوراً بعد ضلع کلکٹر اور پولیس سپرنٹنڈنٹ کو الرٹ کیا گیا اور ضروری حفاظتی اور بچاؤ کے اقدامات کرنے کی ہدایات دی گئیں۔ افسر کے مطابق، بم ڈسپوزل اسکواڈ اور سونگھنے والے کتوں کی ٹیم کے ساتھ پولیس دستے کو فوری طور پر عدالت بھیجا گیا اور پورا احاطہ خالی کرا لیا گیا۔
انہوں نے کہا کہ تلاشی کے دوران احاطے میں کہیں بھی کوئی مشتبہ شے، بم، دھماکہ خیز مواد یا کوئی خطرناک چیز نہیں ملی۔ پولیس نے بتایا کہ درگ اور بلاس پور کی ضلعی عدالتوں کی سرکاری ای میل آئی ڈیز پر بھی اسی نوعیت کی دھمکیاں موصول ہوئیں، جس کے بعد متعلقہ علاقوں کی پولیس حرکت میں آئی اور وہاں بھی تلاشی مہم شروع کی گئی۔
پولیس کے مطابق ای میلز کے ماخذ کا پتہ لگانے کے لیے تفتیش جاری ہے۔
