نئی دہلی
کینیڈا کے وزیرِ اعظم مارک کارنی نے پیر کے روز ہندوستان کے ساتھ تعلقات میں “نئی امنگ، توجہ اور دور اندیشی” کی تعریف کی اور گزشتہ ایک سال کو اوٹاوا اور نئی دہلی کے درمیان بے مثال روابط کا سال قرار دیا۔
قومی دارالحکومت میں حیدرآباد ہاؤس میں منعقدہ مشترکہ پریس کانفرنس سے خطاب کرتے ہوئے مارک کارنی نے وزیرِ اعظم نریندر مودی کا ان اور ان کے وفد کے لیے “فراخدلانہ مہمان نوازی” پر شکریہ ادا کیا۔ انہوں نے کہا کہ گزشتہ سال جون میں اپنی پہلی گفتگو کے بعد سے شراکت داری کا جذبہ دوطرفہ تعلقات کی بنیاد بنا ہوا ہے۔
کارنی نے کہا كہ آپ نے یہی مہمان نوازی میرے وزرا کو بھی فراہم کی جب وہ یہاں آئے۔انہوں نے یہ بھی یاد دلایا کہ وزیرِ اعظم مودی نے ان کی ابتدائی گفتگو کے چند ہفتوں بعد ہونے والے جی7 سربراہی اجلاس میں بھی شرکت کی تھی۔سفارتی روابط کی وسعت پر روشنی ڈالتے ہوئے کینیڈین وزیرِ اعظم نے کہا کہ گزشتہ ایک سال کے دوران جتنا اعلیٰ سطحی رابطہ ہوا ہے، اتنا کئی دہائیوں میں نہیں ہوا۔
انہوں نے کہا كہ ہمارے وزرائے خارجہ پانچ مرتبہ ملاقات کر چکے ہیں۔ میرے چار وزرا وفود کی قیادت کرتے ہوئے یہاں ہندوستان آئے۔ صوبائی وزرائے اعلیٰ بھی یہاں آئے ہیں، جن میں آج بھی شامل ہیں۔ گزشتہ ایک سال میں کینیڈا اور ہندوستانی حکومتوں کے درمیان جتنا رابطہ ہوا ہے، وہ گزشتہ دو دہائیوں سے بھی زیادہ ہے۔
انہوں نے مزید کہا كہ یہ محض کسی تعلق کی بحالی نہیں ہے بلکہ ایک قیمتی شراکت داری کی توسیع ہے، جس میں نئی امنگ، واضح توجہ اور دور اندیشی شامل ہے۔ یہ بااعتماد ممالک کے درمیان ایک شراکت ہے جو اپنے مستقبل کا راستہ خود متعین کر رہے ہیں۔ہندوستان کی معاشی ترقی پر بات کرتے ہوئے مارک کارنی نے وزیرِ اعظم مودی کی قیادت میں ملک کی ترقی کو سراہا۔
انہوں نے کہا كہ گزشتہ ایک دہائی پر نظر ڈالیں تو صاف نظر آتا ہے کہ فی کس آمدنی کے لحاظ سے ہندوستان دنیا کی تیز ترین ترقی کرنے والی معیشت بن چکا ہے۔ یہاں آمدنی میں اس رفتار سے اضافہ ہوا ہے جو تاریخ میں شاذ و نادر ہی دیکھا گیا ہے۔انہوں نے ابھرتے ہوئے شعبوں میں ہندوستان کی پیش رفت کی بھی تعریف کی۔
کارنی نے کہا كہ صاف توانائی، ڈیجیٹل معیشت، بایوفیولز اور مصنوعی ذہانت کی اگلی نسل کی صلاحیتوں کے سب سے بڑے اور پرعزم منصوبے یہاں ہندوستان میں موجود ہیں۔”
انہوں نے مزید کہا کہ کینیڈا بھی اسی طرح کی امنگیں رکھتا ہے۔
انہوں نے کہا كہ کینیڈا بھی اسی جذبے اور مقصد کا شریک ہےاور واضح کیا کہ یہ ابھرتی ہوئی شراکت داری اختراع، پائیدار ترقی اور مشترکہ معاشی ترجیحات پر مبنی ہوگی۔اس موقع پر دونوں وزرائے اعظم کی موجودگی میں دونوں ممالک کے درمیان متعدد مفاہمتی یادداشتوں (ایم او یوز) کا تبادلہ بھی کیا گیا۔
اس سے قبل آج، وزیرِ اعظم نریندر مودی نے قومی دارالحکومت میں حیدرآباد ہاؤس پر کینیڈا کے وزیرِ اعظم مارک کارنی کے ساتھ دوطرفہ مذاکرات کیے، جن میں دونوں ممالک کے درمیان تعاون اور شراکت داری کو مزید مضبوط بنانے پر توجہ مرکوز کی گئی۔
کینیڈا کے وزیرِ اعظم مارک کارنی 27 فروری کو وزیرِ اعظم نریندر مودی کی دعوت پر ہندوستان کے سرکاری دورے پر پہنچے تھے۔ یہ ان کا ملک کا پہلا سرکاری دورہ ہے، جس کا آغاز ممبئی پہنچنے سے ہوا۔ وہ قومی دارالحکومت میں اپنی مصروفیات مکمل کرنے کے بعد آج ہی ہندوستان سے روانہ ہوں گے۔
.gif)
