ممبئی

شیو سینا (ادھو بالا صاحب ٹھاکرے) کے رکن پارلیمنٹ سنجے راوت نے جمعرات کو بھارتیہ جنتا پارٹی (بی جے پی) پر شدید حملہ کرتے ہوئے الزام لگایا کہ پارٹی کی قیادت سیاسی جماعتوں میں پھوٹ ڈالنے اور اپوزیشن کو کمزور کرنے کے جنون میں مبتلا ہے۔

حالیہ سیاسی پیش رفت پر پریس کانفرنس سے خطاب کرتے ہوئے سنجے راوت نے کہا کہ بی جے پی کی جانب سے مبینہ طور پر اپوزیشن جماعتوں کو توڑنے کی کوششیں اس بات کا ثبوت ہیں کہ وہ سیاسی پارٹیوں کو تقسیم کرنے کے "نشے" میں مبتلا ہے۔

انہوں نے کہا کہ وہ (بی جے پی) سیاسی جماعتوں کو توڑنے کے اتنے جنون میں مبتلا ہیں، انہیں اس کا ایسا نشہ چڑھا ہوا ہے کہ وہ کسی کو نہیں چھوڑیں گے، یہاں تک کہ ایک دن وہ ایک دوسرے کی جماعتیں بھی توڑ ڈالیں گے۔

سنجے راوت نے مزید دعویٰ کیا کہ اگر بی جے پی اقتدار سے باہر ہو گئی تو خود اس کی جماعت ٹکڑوں میں بٹ جائے گی۔انہوں نے کہا کہ میں پہلے بھی کہہ چکا ہوں کہ جس دن وہ اقتدار سے باہر ہوں گے اور یہ مرکزی ایجنسیاں ہمارے کنٹرول میں آئیں گی، اسی دن بی جے پی دس حصوں میں تقسیم ہو جائے گی، اور وہ بھی صرف دس منٹ کے اندر۔

دریں اثنا، بدھ کے روز سنجے راوت نے سچن اہیر کے ایکناتھ شندے کی شیو سینا میں شامل ہونے کے بعد ان پر بھی سخت تنقید کی اور الزام لگایا کہ انہوں نے ذاتی مفاد کی خاطر پارٹی کا ساتھ چھوڑ دیا، حالانکہ انہیں پارٹی کی جانب سے ہر ممکن حمایت حاصل رہی۔اے این آئی سے بات کرتے ہوئے سنجے راوت نے سچن اہیر کو ماضی میں دی گئی ذمہ داریوں کا ذکر کرتے ہوئے کہا، "انہیں سب کچھ ملا۔ سچن اہیر کو ایم ایل سی بنایا گیا، پارٹی کا نائب رہنما مقرر کیا گیا اور کامگار سینا کا کارگزار صدر بھی بنایا گیا۔ آخر کسی شخص کو اس سے زیادہ اور کیا دیا جا سکتا ہے؟

انہوں نے مزید کہا کہ سیاست اور ذاتی زندگی دونوں میں ایک چیز ہوتی ہے جسے اصول اور وفاداری کہتے ہیں۔ وہ آدتیہ ٹھاکرے جی کے انتہائی قریبی ساتھی رہے ہیں، اس لیے وہ یہ بھی نہیں کہہ سکتے کہ انہیں ٹھاکرے سے ملنے کا موقع نہیں ملتا تھا۔ لیکن اب لالچ اتنا بڑھ گیا ہے اور سیاست میں اقتدار کی بھوک اس قدر شدید ہو چکی ہے کہ اصول اور وفاداری کی کوئی قدر باقی نہیں رہی۔ خیر، جو ہونا تھا ہو گیا۔

سچن اہیر کا یہ فیصلہ ایسے وقت میں سامنے آیا ہے جب گزشتہ ہفتے شیو سینا (ادھو بالا صاحب ٹھاکرے) کے چھ لوک سبھا ارکان ایکناتھ شندے کے دھڑے میں شامل ہو گئے تھے، جسے نائب وزیر اعلیٰ نے "آپریشن ٹائیگر" کا نام دیا تھا۔30 جون کو شیو سینا میں شامل ہونے کے بعد سچن اہیر نے مہاراشٹر قانون ساز کونسل کے نائب چیئرمین کے عہدے کے لیے شیو سینا کے امیدوار کے طور پر اپنا نامزدگی فارم بھی داخل کر دیا ہے۔