موہالی
پنجاب کے وزیر اعلیٰ بھگونت مان نے جمعرات کو سکھ گروؤں کی تصاویر کی مبینہ بے حرمتی سے متعلق وائرل ویڈیو کے الزامات کو مسترد کرتے ہوئے کہا کہ ویڈیو میں نظر آنے والا شخص وہ نہیں ہیں۔
انہوں نے کہا کہ ان کے سیاسی مخالفین سیاسی میدان میں ان کا مقابلہ نہیں کر پا رہے، اس لیے وہ مذہبی بنیادوں پر انہیں بدنام کرنے کی کوشش کر رہے ہیں۔بھگونت مان نے مزید کہا کہ وہ سری اکال تخت کا مکمل احترام کرتے ہیں اور دعویٰ کیا کہ اس تنازعے میں انہیں نشانہ بنانے کے لیے تینوں بڑی سیاسی جماعتیں ایک ہو گئی ہیں۔
پریس کانفرنس سے خطاب کرتے ہوئے پنجاب کے وزیر اعلیٰ نے کہا کہ وہ سیاسی طور پر میرا مقابلہ نہیں کر سکتے، اس لیے مذہبی بنیادوں پر مجھے بدنام کرنے کی کوشش کر رہے ہیں۔ میں سری اکال تخت کو چیلنج نہیں کر سکتا۔ ویڈیو میں نظر آنے والا شخص میں نہیں ہوں۔ تینوں سیاسی جماعتیں مجھے بدنام کرنے کے لیے متحد ہو گئی ہیں۔
وزیر اعلیٰ مان نے شیرو مانی گوردوارہ پربندھک کمیٹی (ایس جی پی سی) پر بھی تنقید کی اور سوال کیا کہ دیگر رہنماؤں کے خلاف بائیکاٹ کے پوسٹر کیوں نہیں لگائے گئے۔انہوں نے دعویٰ کیا کہ ویڈیو اور اس سے متعلق ماسک تیار کرنے والوں کا جلد پردہ فاش ہو جائے گا اور ان کے پاس اس معاملے کے ایک اہم ملزم کے خلاف ثبوت موجود ہیں۔
انہوں نے کہا کہ میں ایس جی پی سی سے پوچھنا چاہتا ہوں کہ انہوں نے بھگونت مان کے بائیکاٹ کے پوسٹر تو لگائے، لیکن سکھبیر بادل کے خلاف ایسے پوسٹر کیوں نہیں لگائے گئے؟ میں سری اکال تخت کو چیلنج نہیں کر سکتا، میری اتنی حیثیت نہیں ہے۔ میں نے ویڈیو میں بھی واضح کیا تھا کہ وہ شخص میں نہیں ہوں۔ اس کے بعد لیب ٹیکنیشنز کو نشانہ بنایا گیا۔ کانگریس، جس نے سری اکال تخت پر گولہ باری کی تھی، بھی اپوزیشن کے ساتھ مل گئی۔ میں آج برنالہ جا رہا ہوں، عوام کے درمیان جاؤں گا اور یہ سلسلہ جاری رکھوں گا۔ اس ویڈیو کو دیکھیے کہ کس طرح ایک جعلی ویڈیو تیار کی گئی۔
انہوں نے مزید کہا کہ یہ ماسک کہاں سے تیار کروایا گیا؟ ہمارے پاس جگمن سمرا کی تصویر اور ویڈیو موجود ہے، جو اصل بلیک میلر ہے اور ماسک لے کر گھوم رہا تھا۔ اسی شخص نے اروند کیجریوال کا ماسک بھی تیار کیا تھا۔ایک روز قبل شیرو مانی گوردوارہ پربندھک کمیٹی کے رکن اور وکیل بھگونت سنگھ سیالکا نے مبینہ وائرل ویڈیو کے معاملے میں سخت کارروائی کا مطالبہ کرتے ہوئے کہا تھا کہ اس سلسلے میں ’’ایف آئی آر درج ہونی چاہیے۔
سیالکا نے کہا کہ اس قسم کا عمل ریاست میں بدامنی پیدا کر سکتا ہے، اس لیے اس میں ملوث افراد کو کسی صورت معاف نہیں کیا جانا چاہیے۔انہوں نے مزید کہا کہ گورنر، آئینی سربراہ ہونے کے ناطے، اس معاملے میں مداخلت کا اختیار رکھتے ہیں اور اگر ضرورت ہو تو اس صورتحال سے نمٹنے کے لیے آئین میں ترمیم بھی کی جا سکتی ہے۔
