نئی دہلی
سماج وادی پارٹی (ایس پی) کے قومی صدر اور اتر پردیش کے سابق وزیر اعلیٰ اکھلیش یادو نے بھارتیہ جنتا پارٹی (بی جے پی) حکومت کی "کوریڈور" اور "چوڑائی کاری" منصوبوں میں مبینہ بدعنوانی اور مالی بے ضابطگیوں کا الزام عائد کرتے ہوئے منگل کے روز کثیر رکنی عدالتی تحقیقات کا مطالبہ کیا۔
سماج وادی پارٹی کے سربراہ نے یہ مطالبہ رام مندر کے چندہ بکس اور مالیاتی انتظام میں مبینہ بے ضابطگیوں کے الزامات کے درمیان اتر پردیش حکومت کی جانب سے تشکیل دی گئی خصوصی تحقیقاتی ٹیم (ایس آئی ٹی) کی جانچ شروع ہونے کے بعد کیا ہے۔
اکھلیش یادو نے منگل کو سوشل میڈیا پلیٹ فارم ایکس پر ایک پوسٹ میں کہا کہ بی جے پی حکومت کے بنائے گئے ہر کوریڈور اور چوڑائی کاری منصوبے کے پیچھے جو بدعنوانی اور گھوٹالے ہیں، ان کی کثیر رکنی عدالتی تحقیقات ہونی چاہئیں۔
انہوں نے الزام لگایا کہ اس میں ملوث کسی ٹرسٹی، کسی کمیٹی کے رکن یا کسی انتظامی و ترقیاتی اتھارٹی کے افسر کو نہیں بخشا جانا چاہیے۔ اتنے بڑے گھوٹالے ان سب کی ملی بھگت کے بغیر ممکن نہیں ہوتے۔
سابق وزیر اعلیٰ نے کہا کہ گزشتہ چند برسوں کے دوران ان منصوبوں سے وابستہ تمام عہدیداروں، افسران اور ان میں اہم کردار ادا کرنے والے افراد کی مبینہ طور پر غیر قانونی طریقے سے حاصل کی گئی جائیدادوں اور بے پناہ دولت کی بھی تحقیقات ہونی چاہئیں۔ یہ جانچ عام عوام، دیانت دار صحافیوں اور مختلف سیاسی جماعتوں کے عوامی نمائندوں کی نگرانی میں کرائی جانی چاہیے۔اکھلیش یادو نے اپنی پوسٹ کے ساتھ 31 سیکنڈ کا ایک ویڈیو بھی شیئر کیا۔
ویڈیو پر لکھا تھا کہ ایودھیا: 1940 میں قائم شیو مندر پر بلڈوزر چلایا گیا۔ویڈیو میں ایک مندر نما عمارت کو بلڈوزر کے ذریعے منہدم کرتے ہوئے دکھایا گیا ہے۔
