لکھنؤ (اتر پردیش): سماجوادی پارٹی (ایس پی) کے سربراہ اکھلیش یادو نے بدھ کے روز جاری بجلی بحران کے درمیان اتر پردیش کے وزیر اعلیٰ یوگی آدتیہ ناتھ پر سخت تنقید کرتے ہوئے ریاستی حکومت کے لائحۂ عمل پر سوال اٹھایا۔ انہوں نے کہا کہ “اب بی جے پی میں کوئی کرنٹ باقی نہیں رہا۔
ایکس پر ایک پوسٹ میں ایس پی سربراہ نے سوال کیا کہ کیا اتر پردیش کے وزیر توانائی اروند کمار شرما کو وزیر اعلیٰ یوگی آدتیہ ناتھ کی جائزہ میٹنگوں میں بلایا جاتا ہے یا نہیں۔ انہوں نے دعویٰ کیا کہ دونوں لیڈران کو اکثر ساتھ نہیں دیکھا جاتا۔ اکھلیش یادو نے پارٹی کے اندرونی اختلافات کی طرف اشارہ کرتے ہوئے کہا کہ بی جے پی کے اراکین اسمبلی اور اراکین پارلیمنٹ اپنی ہی حکومت کے خلاف خطوط لکھ رہے ہیں۔
انہوں نے طنزیہ انداز میں وزیر اعلیٰ پر یہ بھی تنقید کی کہ انہوں نے بجلی بحران کو “دہلی والوں کے بھیجے ہوئے ایلچی کی سازش” قرار نہیں دیا۔ بجلی کٹوتی کے مسئلے پر ناراضی ظاہر کرتے ہوئے انہوں نے حکومت پر الزام لگایا کہ وہ عوامی غصے سے بچنے کے لیے بجلی سب اسٹیشنوں پر پراونشیل آرمڈ کانسٹیبلری (پی اے سی) تعینات کر رہی ہے۔
اکھلیش یادو نے کہا، “اگلے انتخاب میں عوام بی جے پی کو اچھی طرح دھو پٹخ کر ہمیشہ کے لیے خشک کر دے گی۔ شکر ہے کہ اتر پردیش کے ‘ناکام وزیر اعلیٰ’ نے یہ نہیں کہا کہ اس ‘عظیم بجلی بحران’ کے پیچھے دہلی سے بھیجے گئے ایلچی کی سازش ہے۔
یہ واضح کیا جائے کہ کیا وزیر بجلی وزیر اعلیٰ کی جائزہ میٹنگوں میں شریک نہیں ہوتے یا انہیں بلایا ہی نہیں جاتا۔ اگر وہ شریک ہوتے ہیں تو مہربانی کرکے ایک ایسی تصویر جاری کریں جس میں دونوں ایک دوسرے کے کندھے پر ہاتھ رکھے ہوں، شاید عوام کو آپ کی ‘باہمی گرم جوشی’ سے کچھ راحت مل جائے، کیونکہ عوام نے آپ دونوں کو کبھی ساتھ نہیں دیکھا۔”
انہوں نے مزید کہا، “بی جے پی حکومت میں بجلی سب اسٹیشنوں پر پی اے سی تعینات کی جاتی ہے اور ارکان اسمبلی و پارلیمنٹ اپنی ہی حکومت کے خلاف خطوط لکھ کر بزدلانہ انداز میں عوامی غصے سے بچنے کی کوشش کرتے ہیں۔ اب بی جے پی میں کوئی کرنٹ باقی نہیں رہا۔” اس سے قبل وزیر اعلیٰ یوگی آدتیہ ناتھ نے کہا تھا کہ ریاست کے ہر صارف کو بلا تعطل بجلی فراہم کرنا ان کی حکومت کی اولین ترجیح ہے۔
انہوں نے کہا، “ریاست کے تمام صارفین، جن میں عام لوگ، کسان، تاجر اور صنعتیں شامل ہیں، کو مسلسل بجلی فراہم کرنا اتر پردیش حکومت کی سب سے بڑی ترجیح ہے۔ میں نے محکمہ توانائی، پاور کارپوریشن اور ڈسکام حکام کے ساتھ بجلی سپلائی نظام کا جائزہ لیا ہے۔ متعلقہ افسران کو ہدایت دی گئی ہے کہ وہ مکمل حساسیت، فوری کارروائی اور جوابدہی کے ساتھ کام کریں تاکہ ریاست بھر میں بجلی کی ہموار اور مسلسل فراہمی یقینی بنائی جا سکے۔
ڈبل انجن حکومت ریاست کے ہر شہری کی زندگی میں سہولت، اعتماد اور ترقی کی روشنی لانے کے لیے پُرعزم ہے۔” دریں اثنا، اتر پردیش کے وزیر توانائی اے کے شرما نے کہا کہ ریاست نے بجلی سپلائی کے تمام سابقہ ریکارڈ توڑ دیے ہیں اور حکومت مسلسل بجلی فراہمی کو یقینی بنانے کے لیے پُرعزم ہے۔
