پنجی
عام آدمی پارٹی کے کنوینر اروند کیجریوال نے ایودھیا کے رام مندر کو ملنے والے چندے میں مبینہ خردبرد کو محض ایک جھلک قرار دیتے ہوئے دعویٰ کیا ہے کہ اس پورے معاملے میں ملوث بااثر افراد کو بچانے کی کوشش کی جا رہی ہے۔
کیجریوال نے یہاں ایک پریس کانفرنس سے خطاب کرتے ہوئے مندر کو ملنے والے عطیات کی مبینہ چوری کے معاملے میں جاری تحقیقات پر بھی سوالات اٹھائے۔دہلی کے سابق وزیر اعلیٰ نے کہا کہ مندر میں عقیدت مندوں نے زیورات، چاندی کی اینٹیں، نقد رقم اور دیگر قیمتی اشیا نذر کی تھیں، جو مبینہ طور پر چوری ہو گئیں۔
انہوں نے مندر ٹرسٹ سے متعلق مبینہ اراضی گھوٹالے کے الزامات کا حوالہ دیتے ہوئے کہا کہ 2021 سے ہی مالی بے ضابطگیوں کا سلسلہ جاری تھا۔کیجریوال نے کہا کہ بھگوان رام کے ہر عقیدت مند کے ذہن میں سب سے بڑا سوال یہ ہے کہ کیا اس کے ذمہ دار افراد کو سزا ملے گی۔ آج پورا ملک یہ جاننا چاہتا ہے کہ وہ بااثر لوگ کون ہیں جنہیں بچایا جا رہا ہے۔
انہوں نے الزام لگایا کہ معاملے کو دبانے کی کوشش کے تحت ثبوتوں کو ختم کیا جا رہا ہے اور گواہوں کو ڈرایا اور دھمکایا جا رہا ہے۔کیجریوال نے ان دعوؤں کو مسترد کر دیا کہ وزیر اعظم نریندر مودی کو مبینہ بے ضابطگیوں کے بارے میں کوئی معلومات نہیں تھیں۔
انہوں نے دعویٰ کیا کہ لوگوں کو یقین نہیں ہے کہ وزیر اعظم کو اس بات کی کوئی اطلاع نہیں تھی کہ کیا ہو رہا تھا۔ مندر ٹرسٹ ان کی قیادت میں تشکیل دیا گیا تھا اور ہر رکن ان کی پسند کا تھا۔ یہ ممکن نہیں کہ ان کی معلومات کے بغیر اتنے برسوں تک ایسی سرگرمیاں جاری رہیں۔
کیجریوال نے مندر کے لیے زمین کی خریداری سے متعلق پرانے الزامات کا ذکر کرتے ہوئے دعویٰ کیا کہ ٹرسٹ نے زمین کی خریداری اس کی اصل قیمت سے کہیں زیادہ نرخ پر کی۔ انہوں نے الزام لگایا کہ تعمیراتی ٹھیکوں میں کمیشن دیا گیا اور یہ بھی دعویٰ کیا کہ کئی بار نذرانوں کی چوری سی سی ٹی وی کیمروں میں ریکارڈ ہوئی۔
کیجریوال نے کہا کہ اب تک سامنے آنے والے چوری کے واقعات محض ایک جھلک ہیں۔ انہوں نے الزام عائد کیا کہ آٹھ ماہ کی سی سی ٹی وی فوٹیج کو ضائع کر دیا گیا ہے۔عام آدمی پارٹی کے رہنما نے تحقیقات پر سوال اٹھاتے ہوئے کہا کہ معاملے کی جانچ کے لیے تشکیل دی گئی خصوصی تحقیقاتی ٹیم (ایس آئی ٹی) کے پاس قانونی اختیارات نہیں ہیں، کیونکہ اسے ایف آئی آر درج کیے بغیر ہی قائم کیا گیا تھا۔
کیجریوال نے کہا کہ ایس آئی ٹی نہ تو مشتبہ افراد کو گرفتار کر سکی، نہ ہی تلاشی لے سکی اور نہ ہی سمن جاری کر سکی۔ انہوں نے کہا کہ زمین سے متعلق مبینہ بے ضابطگیوں کی تحقیقات کے لیے پہلے تشکیل دی گئی ایس آئی ٹی بھی کسی حتمی نتیجے تک نہیں پہنچ سکی تھی۔
دہلی کے سابق وزیر اعلیٰ نے الزام لگایا کہ اگرچہ نچلی سطح کے آٹھ ملازمین کو گرفتار کیا گیا اور ان سے تقریباً 80 لاکھ روپے برآمد کیے گئے، لیکن بڑی مالی بے ضابطگیوں کے لیے مبینہ طور پر ذمہ دار افراد کے خلاف کوئی کارروائی نہیں کی گئی۔
کیجریوال نے کہا کہ ہم یہ الزام نہیں لگا رہے کہ وزیر اعظم تک کوئی رقم پہنچی۔ ہمارے پاس ایسا دعویٰ کرنے کے لیے کوئی ثبوت نہیں ہے۔ لیکن واقعات کا سلسلہ اس بات کی طرف اشارہ کرتا ہے کہ اس میں ملوث افراد کو بچانے اور پورے معاملے کو دبانے کی کوشش کی گئی ہے۔
عام آدمی پارٹی کے سربراہ نے ہندو برادری اور عقیدت مندوں سے اس معاملے کو اٹھانے کی اپیل کرتے ہوئے کہا کہ ان مبینہ بے ضابطگیوں سے بھگوان رام کے لاکھوں عقیدت مندوں کے جذبات مجروح ہوئے ہیں۔
رام مندر کو ملنے والے چندے میں مبینہ خردبرد کا معاملہ 7 جون کو سامنے آیا تھا۔ اتر پردیش حکومت کی تشکیل کردہ ایس آئی ٹی کی ابتدائی رپورٹ کی بنیاد پر 25 جون کو ایف آئی آر درج کی گئی تھی۔
