ہاپوڑ
اتر پردیش پولیس نے ہاپوڑ میں ایک پولیس مقابلے کے بعد کپڑا تاجر سے لوٹ مار کے الزام میں ایک ملزم کو زخمی حالت میں گرفتار کر لیا جبکہ دوسرے ملزم کو بھی دھر لیا گیا۔ پولیس کے مطابق ملزمان نے دہلی-مرادآباد ہائی وے پر ایک کپڑا تاجر کی گاڑی روک کر اسلحے کے زور پر 16 لاکھ روپے سے زائد نقدی لوٹ لی تھی۔
ڈی ایس پی ورون مشرا نے بتایا کہ تاجر نے پولیس کو بتایا تھا کہ وہ 16 لاکھ روپے سے زائد نقدی لے کر جا رہا تھا، جب دو نامعلوم افراد نے، جو اسلحے سے لیس تھے اور ایک گاڑی استعمال کر رہے تھے، اسے لوٹ لیا۔
ابتدائی تحقیقات میں انکشاف ہوا کہ تاجر کا ڈرائیور ہی اس واردات کا اصل منصوبہ ساز تھا۔ ڈرائیور نے اعتراف کیا کہ اس نے اپنے دو ساتھیوں نہال اور رضوان عرف منّو کے ساتھ مل کر لوٹ کی سازش تیار کی اور اسے عملی جامہ پہنایا۔
پولیس نے ڈرائیور سے حاصل ہونے والی معلومات کی بنیاد پر ملزمان کی تلاش شروع کی۔ آج شام جب پولیس نے ملزمان کو گرفتار کرنے کی کوشش کی تو انہوں نے پولیس ٹیم پر فائرنگ کر دی۔ڈی ایس پی ورون مشرا کے مطابق پولیس کی جوابی کارروائی میں منّو زخمی ہو گیا جبکہ نہال کو موقع پر گرفتار کر لیا گیا۔
پولیس نے ملزمان کے قبضے سے 16 لاکھ 50 ہزار روپے نقد برآمد کر لیے ہیں۔ اس کے علاوہ ایک .32 بور پستول، ایک .315 بور دیسی پستول، خالی کارتوس اور واردات میں استعمال ہونے والی گاڑی بھی ضبط کر لی گئی ہے۔
زخمی ملزم کو علاج کے لیے اسپتال میں داخل کرا دیا گیا ہے جبکہ مقدمے میں مزید قانونی کارروائی جاری ہے۔
