تینوں حکومتیں مل کر دہلی کی ترقی کی راہ میں حائل رکاوٹیں دور کر رہی ہیں: ریکھا گپتا
نئی دہلی
دہلی کی وزیر اعلیٰ ریکھا گپتا نے جمعہ کے روز کہا کہ قومی دارالحکومت میں تینوں حکومتیں مل کر کام کر رہی ہیں، جس کے نتیجے میں دہلی کی ترقی میں حائل کئی رکاوٹیں دور کی جا رہی ہیں۔انہوں نے کہا کہ گزشتہ سال مرکزی حکومت کے ذریعے لائسنسنگ کے عمل میں پولیس کی لازمی منظوری کی شرط ختم کر دی گئی تھی۔
ریکھا گپتا نے زور دیتے ہوئے کہا کہ قوانین پر عمل درآمد ہر صورت میں ضروری ہے اور جو بھی قواعد و ضوابط کی خلاف ورزی کرے گا، اسے اس کے نتائج بھگتنا ہوں گے۔مرکزی حکومت میں نریندر مودی کے 12 سال مکمل ہونے کے موقع پر منعقدہ پریس کانفرنس سے خطاب کرتے ہوئے وزیر اعلیٰ نے کہا کہ جب تینوں حکومتیں — مرکزی حکومت، دہلی حکومت اور میونسپل کارپوریشن آف دہلی (ایم سی ڈی) — مل کر کام کرتی ہیں تو بہت سی رکاوٹیں خود بخود ختم ہو جاتی ہیں۔
انہوں نے کہا کہ دہلی حکومت، ایم سی ڈی اور دہلی ڈیولپمنٹ اتھارٹی (ڈی ڈی اے) کے کام کاج کو زیادہ منظم، آسان اور باہمی ہم آہنگی پر مبنی بنایا جا رہا ہے تاکہ ترقیاتی منصوبے تیزی اور بغیر رکاوٹ کے مکمل ہو سکیں۔
ریکھا گپتا نے اعلان کیا کہ دہلی میں موجود کچرے کے تین بڑے پہاڑوں کو 2028 تک مکمل طور پر ختم کر دیا جائے گا۔وزیر اعلیٰ نے کہا کہ گزشتہ 12 برسوں کے دوران مرکزی حکومت نے دہلی کو سڑکوں کے بنیادی ڈھانچے سمیت مختلف شعبوں میں مالی معاونت فراہم کی ہے۔
انہوں نے بتایا کہ مرکزی حکومت نے گرو تیغ بہادر (جی ٹی بی) اسپتال میں 200 کروڑ روپے کی لاگت سے ایک جدید ٹراما سینٹر قائم کرنے کی منظوری دے دی ہے۔
ریکھا گپتا نے مزید کہا کہ مرکزی حکومت نے حال ہی میں ایک کندریہ ودیالیہ (مرکزی اسکول) کے قیام کی منظوری دی ہے، جبکہ مزید مرکزی اسکولوں کی منظوری حاصل کرنے کی کوششیں بھی جاری ہیں۔
