نئی دہلی
ہندوستانی کرکٹ بورڈ نے ممکنہ “ہنی ٹریپ، قانونی خطرات اور سکیورٹی خدشات” کے پیش نظر انڈین پریمیئر لیگ میں کھلاڑیوں، معاون عملے اور ٹیم عہدیداروں کے ہوٹل کمروں میں غیر مجاز افراد کے داخلے پر پابندی عائد کر دی ہے۔ یہ فیصلہ بورڈ کی انسدادِ بدعنوانی یونٹ کی جانب سے “غلط رویے اور ضابطوں کی خلاف ورزی” کے واقعات سامنے آنے کے بعد لیا گیا۔
بی سی سی آئی نے آئی پی ایل کی 10 فرنچائزز کو جاری خط میں کہا ہے کہ کھلاڑیوں اور ٹیم عہدیداروں کے کمروں میں مہمانوں کے داخلے کے لیے ٹیم منیجر سے تحریری اجازت لینا لازمی ہوگا۔
بی سی سی آئی سکریٹری دیوجیت سیکیا کی جانب سے 10 فرنچائزز کے سی ای اوز کو لکھے گئے خط کی ایک نقل پی ٹی آئی کے پاس موجود ہے۔خط میں کہا گیا ہے کہ موجودہ سیزن کے دوران پیش آنے والے چند واقعات کے پیش نظر یہ ہدایت جاری کی گئی ہے، جس کا مقصد آئی پی ایل سے وابستہ تمام فریقوں میں پیشہ ورانہ طرزِ عمل، نظم و ضبط، سکیورٹی بیداری اور ضابطوں پر عمل کے معیار کو مضبوط بنانا ہے۔
بی سی سی آئی کے مطابق موجودہ سیزن میں کھلاڑیوں، معاون عملے اور ٹیم عہدیداروں سے متعلق بدسلوکی اور ضابطہ خلافی کے کئی واقعات سامنے آئے ہیں۔دیوجیت سیکیا نے خط میں کہا کہ اگر ان واقعات پر توجہ نہ دی گئی تو ٹورنامنٹ، متعلقہ فرنچائزز اور بطور نگران ادارہ بی سی سی آئی کی ساکھ کو شدید نقصان پہنچ سکتا ہے۔ اس سے افراد اور فرنچائزز کو سنگین قانونی مسائل اور سکیورٹی خطرات کا سامنا بھی کرنا پڑ سکتا ہے۔
بی سی سی آئی نے مزید کہا کہ یہ دیکھا گیا ہے کہ کچھ کھلاڑیوں اور معاون عملے کے ارکان نے ٹیم منیجر کی معلومات یا اجازت کے بغیر غیر مجاز افراد کو اپنے ہوٹل کمروں میں داخل ہونے دیا۔
خط میں کہا گیا، “کئی معاملات میں ٹیم منیجر کو ایسے مہمانوں کی موجودگی کے بارے میں کوئی اطلاع نہیں تھی۔ اس عمل پر فوری اثر سے سخت پابندی عائد کی جاتی ہے۔
