جودھپور (راجستھان) : راجستھان ہائی کورٹ نے جمعرات کو 2021 کی سب انسپکٹر (SI) بھرتی کا عمل پیپر لیک اور سازباز کے وسیع الزامات کے بعد منسوخ کر دیا۔ یہ فیصلہ جسٹس سمیر جین نے سنایا۔ عدالت نے 14 اگست کو تمام فریقین کے دلائل سننے کے بعد اپنا فیصلہ محفوظ کر لیا تھا۔

بھرتی عمل کی منسوخی سے متعلق عرضیاں تقریباً ایک سال پہلے 13 اگست 2024 کو دائر کی گئی تھیں۔ سماعت کے دوران ریاستی حکومت نے واضح کیا کہ اس کی بھرتی منسوخ کرنے کی کوئی نیت نہیں ہے۔ یہ موقف منتخب امیدواروں نے بھی اختیار کیا تھا، جنہوں نے منسوخی کی مخالفت کی۔

عدالتی حکم پر ردعمل ظاہر کرتے ہوئے عرضی گزار ہرندر نیل نے کہا: "عدالت نے مشاہدہ کیا کہ امتحانی پرچہ واٹس ایپ، سوشل میڈیا پر لیک ہوا اور اس میں بلوٹوتھ گینگ بھی ملوث تھا۔ عدالت نے کہا کہ بھرتی کو جاری رکھنا بدقسمتی ہوگی۔ یہ ایک تاریخی فیصلہ ہے اور میرا ماننا ہے کہ یہ ایک سنگ میل کی حیثیت رکھے گا۔

ایڈووکیٹ او پی سولنکی نے بھی اس فیصلے کا خیرمقدم کرتے ہوئے کہا: یہ ایک تاریخی فیصلہ ہے۔ اب راجستھان کے لوگ سمجھ گئے ہیں کہ ایک اچھا فیصلہ اور حقیقی انصاف کیا ہوتا ہے۔ اگرچہ اس میں چار سال لگے، مگر یہ ایک شاندار فیصلہ ہے اور ہم سب بہت خوش ہیں۔

راجستھان کے وزیر کیروڑی لال مینا نے انصاف میں تاخیر کا الزام سابق کانگریس حکومت پر عائد کرتے ہوئے کہا: سابق وزیر اعلیٰ اشوک گہلوت کی حکومت ان تاخیری امتحانات کی ذمہ دار ہے جنہوں نے طلبہ کی زندگی کے دو سال ضائع کر دیے۔ پیپر لیک کے ثبوت ایس او جی اور حکومت کو پیش کیے جانے کے باوجود اور امیدواروں کے احتجاج کے بعد بھی امتحان منسوخ نہیں کیا گیا۔ آج کا فیصلہ سچ اور نوجوانوں کی جدوجہد کی جیت ہے۔

یہ راجستھان کے بے روزگار نوجوانوں کے حق میں آیا ہے۔ چتوڑگڑھ کے ایک طالب علم فیروز نے اس فیصلے کو تاریخی قرار دیتے ہوئے کہا: یہ طلبہ کے لیے ایک تاریخی دن ہے، خاص طور پر ان کے لیے جنہوں نے 2021 میں جدوجہد کی اور بغیر نقل کے امتحان دیا۔ یہ ان کے لیے ایک اہم لمحہ ہے جنہوں نے وکلا، سپریم کورٹ اور ہائی کورٹ پر بھروسہ کیا۔ ان کی طویل جدوجہد کو بالآخر کامیاب تسلیم کیا گیا ہے۔