نئی دہلی

کانگریس نے پیر کے روز سی بی ایس ای کی بارہویں جماعت کے لیے نافذ کی گئی "آن اسکرین مارکنگ"  نظام میں مبینہ بے ضابطگیوں کے معاملے پر حکومت کو نشانہ بنایا اور کہا کہ وزیرِ اعظم نریندر مودی کو جواب دینا چاہیے کہ وزیرِ تعلیم دھرمیندر پردھان اب تک اپنے عہدے پر کیوں برقرار ہیں، جبکہ وہ اپنی "نااہلی" کے باعث کھلے عام طلبہ کا مستقبل برباد کر رہے ہیں۔

پارٹی کے جنرل سکریٹری جئے رام رمیش نے دعویٰ کیا کہ اس تشخیصی نظام کی وجہ سے لاکھوں طلبہ کا تعلیمی مستقبل متاثر ہوا ہے۔رمیش نے سوشل میڈیا پلیٹ فارم ایکس پر ایک پوسٹ میں کہا کہ سی بی ایس ای نے بارہویں جماعت کے بورڈ امتحانات کے لیے آن اسکرین مارکنگ  نظام نافذ کیا، جس کے نتیجے میں ملک بھر کے لاکھوں طلبہ کا تعلیمی مستقبل متاثر ہوا ہے۔ بارہویں جماعت کا کامیابی کا تناسب غیر معمولی طور پر 3 فیصد کم ہو گیا ہے اور پورا عمل بے ضابطگیوں سے بھرپور رہا ہے۔

انہوں نے دعویٰ کیا کہ اس نظام کے دوران متعدد مسائل سامنے آئے، جن میں دھندلی اور ناقابلِ مطالعہ جوابی کاپیاں، غلط جانچ، طلبہ کے ساتھ غلط جوابی کاپیوں کا منسلک ہو جانا، امتحانی جانچ کرنے والوں کو ادائیگی میں تاخیر اور طلبہ سے ازسرِ نو جانچ (ری ایویلیوایشن) کے لیے غیر معمولی فیس وصول کرنے جیسے معاملات شامل ہیں۔

کانگریس رہنما نے مزید کہا کہ اب وزیرِ تعلیم، جو پورے ادارہ جاتی نظام کے زوال کی قیادت کر رہے ہیں، اس بحران کے سامنے آنے کے ایک ہفتے سے زیادہ عرصے بعد جاگے ہیں۔ وہ اب آئی آئی ٹی کانپور کو ان تکنیکی مسائل کے حل کے لیے شامل کرکے خود کو کسی نجات دہندہ کے طور پر پیش کرنے کی کوشش کر رہے ہیں۔