نئی دہلی

مرکزی وزیر برائے شہری ہوا بازی کے رام موہن نائیڈو نے کہا ہے کہ میگھالیہ کو کئی دہائیوں تک "بادلوں کا گھر" کہا جاتا تھا، لیکن آج یہ "مواقع کا گھر" بن کر ابھر رہا ہے۔ انہوں نے کہا کہ یہ تبدیلی پورے شمال مشرقی خطے کی وسیع تر ترقیاتی کہانی کی عکاسی کرتی ہے، جو بے شمار امکانات سے بھرپور ہے۔

نائیڈو نے یہ بات ایک ویڈیو پیغام میں کہی، جسے پیر اور منگل کو میگھالیہ کے دارالحکومت شیلانگ میں منعقدہ شمال مشرقی ہندوستان بنیادی ڈھانچہ سربراہی اجلاس کے ایک سیشن کے دوران منگل کو نشر کیا گیا۔

وزیر نے کہا کہ جب بھی انہیں کسی پروگرام کے سلسلے میں شمال مشرقی خطے کا دورہ کرنے کا موقع ملا، وہ وہاں کے لوگوں اور خطے میں موجود "لامحدود امکانات" سے بے حد متاثر ہو کر واپس لوٹے۔

انہوں نے کہا کہ میگھالیہ کو کئی دہائیوں تک بادلوں کے گھر کے طور پر جانا جاتا تھا، لیکن آج یہ مواقع کے گھر کے طور پر ابھر رہا ہے۔ یہ تبدیلی پورے شمال مشرق کی وسیع تر ترقی کی داستان کو ظاہر کرتی ہے۔شہری ہوا بازی کے وزیر نے کہا کہ آزادی کے بعد کئی برسوں تک شمال مشرقی خطے کو اکثر "دہلی سے اس کے فاصلے" کے پیمانے پر دیکھا جاتا تھا، لیکن آج وزیر اعظم نریندر مودی کی قیادت، ان کی 'ایکٹ ایسٹ' پالیسی اور "تیزی سے اور پہلے قدم اٹھانے کے وژن" کی بدولت اس خطے کی شناخت فاصلے سے نہیں بلکہ رابطے اور ترقی سے ہو رہی ہے۔

نائیڈو نے کہا کہ خود یہ سربراہی اجلاس بھی اسی عزم کی عکاسی کرتا ہے۔انہوں نے مزید کہا کہ شمال مشرقی خطے کی تمام آٹھ ریاستوں، مرکزی حکومت کی مختلف وزارتوں اور صنعت و تجارت کے نمائندوں کی شرکت اس بات کا ثبوت ہے کہ پورے حکومتی نظام نے مل کر اس خطے کی بے پناہ صلاحیتوں کو حقیقت میں بدلنے کے لیے ایک مربوط حکمت عملی اختیار کی ہے۔