جموں: نیشنل انویسٹی گیشن ایجنسی (این آئی اے) نے لشکرِ طیبہ (ایل ای ٹی) سے منسلک ایک بین ریاستی دہشت گرد ماڈیول کے کیس کی تحقیقات اپنے ہاتھ میں لے لی ہیں اور گرفتار کیے گئے دو پاکستانی شہریوں سمیت پانچ دہشت گردوں کو پوچھ گچھ کے لیے پیر کے روز حراست میں لے لیا ہے۔

حکام کے مطابق 7 اپریل کو جموں و کشمیر پولیس نے انسداد دہشت گردی کارروائی کے دوران لشکر سے وابستہ پانچ دہشت گردوں کو گرفتار کیا تھا، جن میں 16 سال سے مفرور عبد اللہ عرف ابو ہریرہ بھی شامل ہے۔ عبد اللہ کے علاوہ ایک اور پاکستانی دہشت گرد عثمان عرف خبیب اور سری نگر کے تین رہائشیوں محمد نقیب بھٹ، عادل راشد اور غلام محمد میر عرف ماما کو بھی اس بڑے آپریشن میں گرفتار کیا گیا تھا، جس میں جموں و کشمیر پولیس اور مرکزی ایجنسیاں شامل تھیں۔

حکام نے بتایا کہ تفتیش کے دوران ایک بڑے نیٹ ورک کا انکشاف ہوا ہے جو دہشت گردوں کی معاونت کرتا تھا۔ تحقیقات کا چارج سنبھالنے کے بعد این آئی اے نے پیر کے روز تمام گرفتار افراد کو جموں کی خصوصی این آئی اے عدالت میں پیش کیا۔ عدالت نے پانچوں ملزمان کو ایجنسی کی تحویل میں بھیج دیا۔ حکام کے مطابق دو پاکستانی شہریوں کو دو دن کی این آئی اے تحویل میں دیا گیا ہے جبکہ تین مقامی دہشت گردوں کو 15 دن کی تحویل میں رکھا گیا ہے۔