سری نگر
جموں و کشمیر کے وزیرِ اعلیٰ نے مرکزی وزیرِ شہری ہوا بازی کے۔ رام موہن نائیڈو سے رابطہ کیا ہے اور اُن سے اپیل کی ہے کہ مرکز کے زیرِ انتظام علاقے میں واپس آنے والے حج عازمین کے چیک اِن سامان کی نقل و حمل سے متعلق مسائل کے حل کے لیے فوری مداخلت کی جائے۔
سوشل میڈیا پلیٹ فارم ایکس پر جاری ایک سرکاری بیان میں وزیرِ اعلیٰ کے دفتر (سی ایم او) نے تصدیق کی کہ عازمینِ حج کے سامان کی بروقت اور محفوظ ترسیل کو یقینی بنانے کے لیے مرکزی وزیر کو ایک باضابطہ خط ارسال کیا گیا ہے۔
سی ایم او جموں و کشمیر نے کہا کہ وزیرِ اعلیٰ نے مرکزی وزیرِ شہری ہوا بازی کے۔ رام موہن نائیڈو کو خط لکھ کر جموں و کشمیر واپس آنے والے حج عازمین کے چیک اِن سامان کی بروقت اور محفوظ منتقلی کو یقینی بنانے کے لیے فوری مداخلت کی درخواست کی ہے۔
دوسری جانب، وزارتِ اقلیتی امور کے مطابق سری نگر ہوائی اڈے کے لیے جاری نوٹم اور رن وے کی جاری مرمت کے باعث رن وے کی لمبائی پر عارضی پابندیاں نافذ ہیں، جس کی وجہ سے فضائی سلامتی کے پیشِ نظر پروازوں کے پے لوڈ (وزن) پر حدود مقرر کی گئی ہیں۔حج پروازوں کے شیڈول میں کسی قسم کی رکاوٹ سے بچنے اور عازمین کو درپیش مشکلات کم کرنے کے لیے اکاسا ایئر کے ذریعے واپس آنے والے حج عازمین کی پروازوں کو احمد آباد کے راستے سری نگر پہنچانے کا منصوبہ بنایا گیا ہے۔ اس انتظام کے تحت احمد آباد تک ہر مسافر کو 35 کلوگرام چیک اِن سامان لے جانے کی اجازت ہوگی۔
اس کے بعد احمد آباد سے سری نگر جانے والی پرواز میں ہر مسافر صرف 5 کلوگرام چیک اِن سامان ساتھ لے جا سکے گا، جبکہ باقی 30 کلوگرام سامان سڑک کے ذریعے الگ سے سری نگر پہنچایا جائے گا۔ کیبن بیگیج کی اجازت میں کوئی تبدیلی نہیں کی گئی ہے۔وزارت نے واضح کیا کہ یہ انتظامات مکمل طور پر ہوائی اڈے کی آپریشنل ضروریات اور فضائی سلامتی کے تقاضوں کے تحت کیے گئے ہیں۔ وزارتِ اقلیتی امور، ہندوستانی حج کمیٹی اور جموں و کشمیر ریاستی حج کمیٹی عازمین کی محفوظ، باوقار اور ہموار واپسی کو یقینی بنانے کے لیے تمام متعلقہ فریقوں کے ساتھ مسلسل رابطے میں ہیں۔
وزارت نے کہا کہ سلامتی پر کسی قسم کا سمجھوتہ نہیں کیا جا سکتا اور تمام فیصلے عازمین کے بہترین مفاد کو مدِنظر رکھتے ہوئے کیے گئے ہیں۔اسلام میں ہر مسلمان پر پانچ بنیادی فرائض (ارکانِ اسلام) کی پابندی لازم ہے، جن میں سے ایک حج ہے۔ دیگر چار ارکان شہادت (ایمان کا اقرار)، نماز، زکوٰۃ اور رمضان المبارک کے روزے ہیں۔
