نئی دہلی/ آواز دی وائس

بی جے پی کی رکنِ پارلیمان کنگنا رناوت نے پیر کے روز کانگریس کی ایک بڑی ریلی کے دوران وزیراعظم نریندر مودی کے خلاف کیے گئے بیانات کی سخت مذمت کی۔ انہوں نے معافی کا مطالبہ کرتے ہوئے اپوزیشن پر شدید تنقید کی اور کہا کہ محض سیاسی رقابت کی بنیاد پر کسی کی موت کی خواہش کرنا درست نہیں ہے، خاص طور پر جب وہ جمہوری طور پر منتخب وزیراعظم ہوں۔

کنگنا رناوت نے کہا کہ کس مہذب ملک میں عوامی اجتماعات کے دوران کسی کو قتل کرنے کے اعلانات کیے جاتے ہیں؟ ہماری نظریاتی اختلافات ہو سکتے ہیں، لیکن اس کا یہ مطلب نہیں کہ ہم دشمن بن جائیں اور کسی کی موت کی خواہش کریں۔ پورا ملک دکھی ہے کیونکہ وہ جمہوری طور پر منتخب وزیراعظم ہیں۔ یہ بالکل غلط ہے۔ معافی مانگنی چاہیے، کیونکہ اگر ہمارے اپوزیشن رہنما ایسے ہوں گے تو دنیا کے سامنے اچھی مثال قائم نہیں ہو سکے گی۔

ادھر، مرکزی وزیر برائے پارلیمانی امور کرن رجیجو نے بھی مطالبہ کیا کہ راجیہ سبھا میں اپوزیشن لیڈر ملکارجن کھرگے اور لوک سبھا میں اپوزیشن لیڈر راہل گاندھی، کانگریس کارکنان کی جانب سے وزیراعظم نریندر مودی کی جان کو مبینہ دھمکی دیے جانے پر پارلیمنٹ کے ایوان میں معافی مانگیں۔

قومی دارالحکومت میں آج ایک پریس کانفرنس سے خطاب کرتے ہوئے کرن رجیجو نے کہا کہ ہم ملک کے لیے کام کر رہے ہیں اور یہ انتہائی افسوسناک اور المیہ ہے کہ کانگریس کے کارکنان نے کھلے عام وزیراعظم مودی کی قبر کھودنے کا اعلان کیا۔

رجیجو نے کہا کہ کانگریس اور بی جے پی کے کارکنان اور رہنما سیاسی حریف ہیں، دشمن نہیں۔ انہوں نے کہا کہ ہم مختلف نظریات کی ترویج کرتے ہیں، لیکن وزیراعظم مودی کے خواب کے مطابق ایک ترقی یافتہ ہندوستان کے لیے مل کر کام کرتے ہیں۔ اس سے قبل، اتوار کو قومی دارالحکومت میں کانگریس کی ایک ریلی کے دوران پارٹی کے کچھ کارکنان نے وزیراعظم کی قبر کھودنے کی دھمکی دی تھی۔ کانگریس رہنما منجو لتا مینا نے رام لیلا میدان میں مبینہ “ووٹ چوری” کے خلاف منعقدہ پارٹی کی ریلی کے دوران کہا تھا کہ مودی تیری قبر کھودے گی، آج نہیں تو کل کھودے گی۔

بعد میں انہوں نے اپنے متنازع بیان کا دفاع کرتے ہوئے کہا کہ وہ صرف عوام کے غصے کا اظہار کر رہی تھیں جو ووٹوں کی چوری کو لے کر پایا جاتا ہے، اور یہ کہ وزیراعظم نے اب تک حقیقی مسائل پر کوئی بات نہیں کی۔ منجو لتا مینا، جو جے پور خواتین کانگریس کی ضلع صدر بھی ہیں، نے کہا کہ ووٹوں میں دھاندلی کو لے کر عوام میں زبردست غصہ ہے۔ انہوں نے (بی جے پی نے) ووٹ چوری کے ذریعے حکومتیں بنائی ہیں اور الیکشن کمیشن بھی ان کے اشاروں پر کام کر رہا ہے۔ وزیراعظم روزگار، نوجوانوں، خواتین یا کسانوں کی بات نہیں کرتے۔ وہ اصل مسائل سے توجہ ہٹاتے ہیں۔