نئی دہلی: الیکشن کمیشن نے 2026 کے اسمبلی اور ضمنی انتخابات کے پیش نظر ملک بھر میں 21 لاکھ سے زائد پولنگ اسٹیشنوں پر ووٹروں کی سہولت اور رسائی کو بہتر بنانے کے لیے جامع ہدایات جاری کر دی ہیں۔ اتوار کو جاری کردہ پریس ریلیز کے مطابق 2,18,807 پولنگ اسٹیشنوں میں سے ہر ایک پر بنیادی سہولیات کی فراہمی یقینی بنائی جائے گی، جن میں پینے کا صاف پانی، سایہ دار انتظار گاہ، پانی کی سہولت سے آراستہ بیت الخلاء، مناسب روشنی، معذور افراد کے لیے ریمپ اور معیاری پولنگ کمرہ شامل ہیں۔

کمیشن نے 15 مارچ کو آسام، کیرالہ، پڈوچیری، تمل ناڈو اور مغربی بنگال سمیت مختلف ریاستوں کی اسمبلیوں اور چھ دیگر ریاستوں میں ضمنی انتخابات کے شیڈول کا اعلان کیا تھا۔ اس سلسلے میں تمام ریاستوں اور مرکز کے زیر انتظام علاقوں کے چیف الیکٹورل افسران کو ہدایت دی گئی ہے کہ ہر پولنگ اسٹیشن پر کم از کم ضروری سہولیات کی فراہمی یقینی بنائیں۔

الیکشن کمیشن کا کہنا ہے کہ اس کا مقصد ہر ووٹر کو آسان اور خوشگوار ووٹنگ کا تجربہ فراہم کرنا ہے۔ اسی لیے قطاروں میں کھڑے ووٹروں کے آرام کے لیے وقفے وقفے سے بینچ لگانے کی بھی ہدایت دی گئی ہے۔ مزید برآں، ووٹروں میں آگاہی بڑھانے کے لیے ہر پولنگ اسٹیشن پر چار معیاری ووٹر سہولت پوسٹرز آویزاں کرنا لازمی قرار دیا گیا ہے، جن میں پولنگ اسٹیشن کی تفصیلات، امیدواروں کی فہرست، ووٹنگ کا طریقہ کار، درکار شناختی دستاویزات اور ووٹنگ کے دن کی ہدایات شامل ہوں گی۔

ووٹنگ کے عمل کو مزید سہل بنانے کے لیے ہر پولنگ اسٹیشن پر ووٹر ہیلپ بوتھ بھی قائم کیے جائیں گے۔ یہ بوتھ بوتھ سطح کے افسران اور دیگر عملے کے ذریعے چلائے جائیں گے اور ووٹروں کو ان کے پولنگ بوتھ نمبر اور ووٹر لسٹ میں نام کی تصدیق میں مدد فراہم کریں گے۔ ان بوتھس کو نمایاں انداز میں نصب کیا جائے گا تاکہ ووٹرز کو آسانی سے رہنمائی مل سکے۔

اس کے علاوہ، پولنگ اسٹیشنوں کے باہر موبائل فون جمع کرانے کی سہولت بھی فراہم کی جائے گی۔ ووٹروں کو ہدایت دی گئی ہے کہ وہ پولنگ ایریا میں داخل ہونے سے پہلے اپنے موبائل فون بند کر کے مقررہ اہلکاروں کے پاس جمع کرا دیں، جو ووٹنگ کے بعد واپس کر دیے جائیں گے۔

الیکشن کمیشن نے ان تمام اقدامات پر سختی سے عمل درآمد کرانے کے عزم کا اظہار کرتے ہوئے کہا ہے کہ ان کی نگرانی بھی یقینی بنائی جائے گی۔ تمام متعلقہ افسران کو ہدایت دی گئی ہے کہ وہ ووٹنگ کی تاریخ سے قبل تمام انتظامات مکمل کر لیں تاکہ انتخابی عمل بخوبی انجام دیا جا سکے۔