نئی دہلی

دہلی ہائی کورٹ نے جمعہ کے روز سماجی کارکن اور جواہر لعل نہرو یونیورسٹی کے سابق طلبہ رہنما عمر خالد کو 2020 کے شمال مشرقی دہلی فسادات سے متعلق مبینہ بڑی سازش کے مقدمے میں تین دن کی عبوری ضمانت دے دی۔ عدالت نے ان کی والدہ کی سرجری کو مدنظر رکھتے ہوئے ’’ہمدردانہ نقطۂ نظر‘‘ اختیار کیا۔

عدالت نے یکم جون کی صبح 7 بجے سے 3 جون کی شام 5 بجے تک ایک لاکھ روپے کے ذاتی مچلکے پر عبوری ضمانت منظور کی۔ عدالت نے ہدایت دی کہ عمر خالد این سی آر کے دائرے میں ہی رہیں گے، اپنے گھر پر قیام کریں گے اور عبوری رہائی کے دوران صرف اسپتال جانے کی اجازت ہوگی۔

عمر خالد نے ہائی کورٹ میں ٹرائل کورٹ کے 19 مئی کے اس حکم کو چیلنج کیا تھا جس میں ان کی عبوری ضمانت کی درخواست مسترد کر دی گئی تھی۔راحت دیتے ہوئے ہائی کورٹ نے کہا کہ عمر خالد کو اس سے قبل بھی خاندانی تقریبات میں شرکت کے لیے کئی مرتبہ عبوری ضمانت دی جا چکی ہے اور انہوں نے ہر بار عدالت کی عائد کردہ شرائط کی پابندی کی ہے۔ عدالت نے یہ بھی کہا کہ اگرچہ وہ اس مقدمے میں ’’اہم سازش کاروں میں سے ایک‘‘ قرار دیے گئے ہیں، تاہم ان کی والدہ کی طبی حالت اور طے شدہ سرجری کو دیکھتے ہوئے ہمدردانہ رویہ اختیار کرنا مناسب ہے۔

اس سے قبل عمر خالد نے دہلی ہائی کورٹ میں درخواست دائر کرکے 22 مئی سے 5 جون تک 15 دن کی عبوری ضمانت کی استدعا کی تھی اور ٹرائل کورٹ کے 19 مئی کے حکم کو منسوخ کرنے کا مطالبہ کیا تھا، جس میں 2020 کے شمال مشرقی دہلی فسادات کی مبینہ بڑی سازش کے مقدمے میں ان کی عارضی رہائی کی درخواست مسترد کر دی گئی تھی۔

قومی تحقیقاتی ایجنسی ایکٹ کی دفعہ 21(4) کے تحت دائر اپیل میں کہا گیا تھا کہ عمر خالد اپنے مرحوم ماموں کے چہلم میں شرکت کرنا چاہتے ہیں اور اپنی 62 سالہ والدہ کی دیکھ بھال کے لیے عبوری ضمانت کے خواہاں ہیں، جن کی 2 جون کو رسولی نکالنے کی سرجری طے ہے۔ٹرائل کورٹ نے 19 مئی کو عبوری ضمانت کی درخواست مسترد کرتے ہوئے کہا تھا کہ عارضی رہائی کے لیے پیش کی گئی وجوہات ’’کافی نہیں ہیں‘‘۔ کڑکڑڈوما عدالت کے ایڈیشنل سیشن جج سمیر باجپئی نے کہا تھا کہ ماموں کے چہلم میں شرکت ’’اتنی ضروری نہیں‘‘ ہے۔ عدالت نے یہ بھی مشاہدہ کیا تھا کہ سرجری کے دوران عمر خالد کی بہنیں اور والد ان کی والدہ کی دیکھ بھال کر سکتے ہیں۔

عمر خالد ستمبر 2020 سے ایف آئی آر نمبر 59/2020 سے متعلق اس مبینہ بڑی سازش کے مقدمے میں زیرِ حراست ہیں۔ استغاثہ کا الزام ہے کہ یہ فسادات شہریت ترمیمی قانون (CAA) کے خلاف احتجاجی مظاہروں سے جڑی ایک پہلے سے منصوبہ بند سازش کا حصہ تھے، جبکہ عمر خالد نے ان تمام الزامات کی تردید کی ہے۔