نئی دہلی
ہندوستان کے چیف جسٹس (سی جے آئی) سوریہ کانت نے کہا ہے کہ آئین چند بڑے شہروں میں رہنے والے ایسے افراد کا خصوصی حق نہیں ہے جو مہنگی قانونی کارروائیوں کا خرچ برداشت کر سکتے ہیں اور بہترین قانونی ماہرین کی خدمات حاصل کر سکتے ہیں، بلکہ یہ ملک کے ہر شہری کا یکساں طور پر آئین ہے۔
چیف جسٹس نے یہ بات سینئر وکیل اندرا جے سنگھ کی یادداشتوں پر مبنی کتاب "دی کانسٹی ٹیوشن اِز مائی ہوم: کنورسیشنز آن اے لائف اِن لا" کی رونمائی کے موقع پر اپنے خطاب میں کہی۔
چیف جسٹس کو اس تقریب میں مہمانِ خصوصی کے طور پر مدعو کیا گیا تھا، تاہم وہ اس میں شرکت نہ کر سکے۔ انہوں نے کتاب کی اشاعت پر نیک خواہشات کا اظہار کرتے ہوئے ایک ویڈیو پیغام بھیجا اور برکس ممالک کے ججوں کی آئندہ میٹنگ میں مصروفیت کے باعث تقریب میں شریک نہ ہو پانے پر افسوس ظاہر کیا۔
جسٹس سوریہ کانت نے کہا کہ آئین درحقیقت ہمارا مشترکہ گھر ہے۔ یہ صرف ججوں، وکلا، ریاست یا عوامی اداروں کا نہیں ہے۔ یہ ہر اُس شہری کا بھی ہے جو اس کے دائرے میں انصاف چاہتا ہے اور اس کے وعدوں پر یقین رکھتا ہے، چاہے وہ شہر میں رہتا ہو یا گاؤں میں، غریب ہو یا محروم طبقے سے تعلق رکھتا ہو۔انہوں نے مزید کہا کہ آئین چند میٹرو شہروں کے اُن لوگوں کا خصوصی حق نہیں ہے جو مہنگی قانونی کارروائیوں کا خرچ اٹھا سکتے ہیں اور ایسی باتیں ثابت کرنے کے لیے بہترین قانونی ماہرین کی خدمات حاصل کرتے ہیں جن کا ہمارے آئین نے کبھی تصور بھی نہیں کیا تھا۔
چیف جسٹس نے کہا کہ آئین صرف ایک قانونی دستاویز نہیں جو معاشرے کو دور سے چلاتی ہو، بلکہ یہ ایک مسلسل موجود رہنے والی طاقت بھی ہے۔انہوں نے کہا کہ یہ عدالتوں اور چیمبرز میں، دلائل اور غور و فکر کے عمل میں ہمارے ساتھ رہتا ہے۔ اس کی رسائی رسمی قانونی مقامات سے کہیں آگے تک پھیلی ہوئی ہے اور اس کا حقیقی اثر شہریوں کی زندگیوں اور ہماری جمہوریت کے کردار میں نظر آتا ہے۔
چیف جسٹس نے کہا کہ آئین پسندی اختیار اور اصول کے درمیان توازن قائم رکھنے کا نام ہے۔انہوں نے کہا کہ عوامی ادارے اُس وقت بہترین انداز میں کام کرتے ہیں جب طاقت اور ذمہ داری کو توازن، جوابدہی، شفافیت اور بنیادی اقدار سے وفاداری کے جذبے کے ساتھ استعمال کیا جائے۔
