تل ابیب

 اسرائیل اور امریکہ نے ایران کی جانب سے لاحق کیے گئے اس خطرے کو ختم کرنے کے لیے ایک مشترکہ کارروائی شروع کی ہے، جسے وہ وجودی خطرہ قرار دے رہے ہیں۔قوم سے خطاب میں اسرائیلی وزیرِاعظم بن یامین نیتن یاہو نے ایرانی حکومت کی دیرینہ دشمنی کو اجاگر کرتے ہوئے اس اقدام کو دفاعی اور تزویراتی دونوں قرار دیا۔

انہوں نے کہا كہ میرے بھائیو اور بہنو، اسرائیل کے شہریو، ابھی ایک گھنٹہ پہلے اسرائیل اور امریکہ نے ایران کی دہشت گرد حکومت کی جانب سے لاحق وجودی خطرے کو ختم کرنے کے لیے ایک کارروائی کا آغاز کیا ہے۔نیتن یاہو نے امریکی صدر ڈونلڈ ٹرمپ کا امریکی حمایت پر شکریہ ادا کیا اور ٹرمپ کی قیادت کو “تاریخی” قرار دیا۔

انہوں نے کہا كہ میں اپنے عظیم دوست، صدر ڈونلڈ ٹرمپ کی تاریخی قیادت پر ان کا شکریہ ادا کرتا ہوں۔ 47 برسوں سے آیت اللہ کی حکومت ‘اسرائیل کو موت’ اور ‘امریکہ کو موت’ کے نعرے لگاتی آ رہی ہے۔ اس نے ہمارے لوگوں کا خون بہایا، کئی امریکیوں کو قتل کیا اور اپنے ہی عوام کا قتلِ عام کیا۔ اس قاتل دہشت گرد حکومت کو جوہری ہتھیار حاصل کرنے کی اجازت نہیں دی جا سکتی، کیونکہ اس سے پوری انسانیت کو خطرہ لاحق ہو سکتا ہے۔ ہماری مشترکہ کارروائی بہادر ایرانی عوام کے لیے یہ حالات پیدا کرے گی کہ وہ اپنی تقدیر خود اپنے ہاتھ میں لیں۔اس کے بعد نیتن یاہو نے ایرانی عوام سے اسلامی حکومت کے خلاف اٹھ کھڑے ہونے کی پرجوش اپیل کی۔

انہوں نے کہا كہ وقت آ گیا ہے کہ ایران کے تمام طبقات — فارسی، کرد، آذری، بلوچ اور احوازی  ظلم و جبر کی زنجیروں کو توڑ دیں اور ایک آزاد اور امن پسند ایران قائم کریں۔اس سے قبل اسرائیلی دفاعی افواج (آئی ڈی ایف) نے “آپریشن روئرنگ لائن” کے نام سے حملوں کا اعلان کیا تھا، جس کا مقصد اسرائیل کو لاحق خطرے کا خاتمہ بتایا گیا۔

بیان میں کہا گیا كہ آئی ڈی ایف اور امریکی مسلح افواج نے ایرانی دہشت گرد حکومت کو شدید نقصان پہنچانے اور وقت کے ساتھ اسرائیل کو درپیش وجودی خطرات کو ختم کرنے کے لیے ایک وسیع اور مشترکہ کارروائی شروع کی ہے۔ ایرانی حکومت نے اسرائیل کو تباہ کرنے کا اپنا منصوبہ ترک نہیں کیا۔ اس نے اسرائیل کی سرحدوں پر موجود اپنے پراکسی گروہوں کو مالی امداد، تربیت اور اسلحہ فراہم کرنا جاری رکھا ہے۔ یہ اقدامات اسرائیل کے لیے وجودی خطرہ ہیں اور مشرقِ وسطیٰ اور پوری دنیا کے لیے خطرہ بنے ہوئے ہیں۔

اس سے قبل امریکی صدر ڈونلڈ ٹرمپ نے ایرانی افواج کو خبردار کیا تھا کہ وہ ہتھیار ڈال دیں اور ہتھیار چھوڑنے کی صورت میں مکمل استثنا حاصل کریں، ورنہ “یقینی موت” کا سامنا کریں، کیونکہ اسرائیل اور امریکہ کی مشترکہ فوجی کارروائی کے بعد مشرقِ وسطیٰ مکمل جنگ کی کیفیت میں داخل ہو چکا ہے۔ٹروتھ سوشل پر ایک ٹیلی وژن خطاب میں ٹرمپ نے ایران میں فوجی کارروائی کے آغاز کی تصدیق کی، جس میں ملک کے جوہری اور فوجی ڈھانچے کو نشانہ بنایا گیا۔

انہوں نے کہا كہ اسلامی انقلابی گارڈ، مسلح افواج اور تمام پولیس اہلکاروں سے میں آج رات کہتا ہوں کہ ہتھیار ڈال دیں اور مکمل استثنا حاصل کریں، یا اس کے برعکس یقینی موت کا سامنا کریں۔ ہتھیار ڈال دیں، آپ کے ساتھ منصفانہ سلوک کیا جائے گا اور مکمل تحفظ دیا جائے گا، ورنہ یقینی موت ہو گی۔

تمہاری آزادی کی گھڑی آ پہنچی ہے”کا اعلان کرتے ہوئے ٹرمپ نے ایرانی شہریوں سے کہا کہ وہ محفوظ مقامات پر رہیں کیونکہ “ہر طرف بم برسیں گے”۔ انہوں نے اس کارروائی کو عوام کے لیے اپنی حکومت سنبھالنے کا ایک تاریخی موقع قرار دیا۔یہ براہِ راست حملہ کئی ہفتوں سے جاری اعلیٰ سطحی جوہری مذاکرات اور خطے میں بڑھتی فوجی تیاریوں کے بعد سامنے آیا ہے۔ اگرچہ حملے کے مکمل اثرات اور دائرہ کار کا ابھی جائزہ لیا جا رہا ہے، تاہم اس اقدام نے دونوں ممالک کے درمیان وسیع تر محاذ آرائی میں ایک بڑے جوابی قدم کا اشارہ دیا ہے۔