سری نگر/ آواز دی وائس
جموں و کشمیر شدید سردی کی لپیٹ میں ہے، جس کے باعث وادی میں درجۂ حرارت میں نمایاں کمی ریکارڈ کی گئی ہے۔ شوپیاں میں درجۂ حرارت صفر سے 8.2 ڈگری سیلسیس نیچے درج کیا گیا۔ اس دوران آسمان صاف رہا اور ڈل جھیل سمیت پانی کے دیگر ذخائر جم گئے۔ ایک عہدیدار نے یہ جانکاری دی۔
عہدیدار کے مطابق سری نگر میں جمعہ کی رات کم از کم درجۂ حرارت صفر سے 5.7 ڈگری سیلسیس نیچے ریکارڈ کیا گیا، جبکہ اس سے ایک رات پہلے یہ صفر سے 6.0 ڈگری سیلسیس سے کچھ زیادہ تھا۔ یہ اس موسم کی اب تک کی سب سے سرد رات رہی۔ شہر کا کم از کم درجۂ حرارت موسمی اوسط سے 3.8 ڈگری سیلسیس کم رہا۔
شدید سردی کے باعث ڈل جھیل کے اندرونی حصوں سمیت کئی آبی ذخائر کے کچھ حصے منجمد ہو گئے۔ جنوبی کشمیر میں شوپیاں وادی کا سب سے سرد علاقہ رہا، جہاں پارہ صفر سے 8.2 ڈگری سیلسیس نیچے چلا گیا۔ شمالی کشمیر کے بارہمولہ ضلع میں واقع مشہور اسکی ریزورٹ گلمرگ میں کم از کم درجۂ حرارت صفر سے 6.8 ڈگری سیلسیس نیچے رہا، جبکہ ایک رات پہلے یہ صفر سے 7.2 ڈگری سیلسیس نیچے درج کیا گیا تھا۔
وسطی کشمیر کے گاندربل ضلع میں واقع سیاحتی مقام سونمرگ میں کم از کم درجۂ حرارت صفر سے 6.3 ڈگری سیلسیس نیچے ریکارڈ کیا گیا۔ وادی کے داخلی دروازے قاضی گنڈ میں اس موسم کی سب سے سرد رات رہی، جہاں کم از کم درجۂ حرارت صفر سے 6.3 ڈگری سیلسیس نیچے درج کیا گیا۔ کوکرناگ میں کم از کم درجۂ حرارت صفر سے 4.0 ڈگری سیلسیس نیچے اور کپواڑہ میں صفر سے 6.1 ڈگری سیلسیس نیچے ریکارڈ کیا گیا۔
کشمیر اس وقت ’چِلّاۓ کَلاں‘ کے مرحلے سے گزر رہا ہے، جو 40 دنوں پر مشتمل شدید سردی کا دور ہوتا ہے۔ اس عرصے میں رات کے درجۂ حرارت میں شدید گراوٹ آتی ہے اور برف باری کے امکانات سب سے زیادہ ہوتے ہیں۔
چِلّاۓ کَلاں‘ کا آغاز 21 دسمبر کو ہوا تھا اور یہ 30 جنوری کو اختتام پذیر ہوگا۔ عہدیداروں کے مطابق، اس موسم میں اب تک وادی کے میدانی علاقوں میں برف باری نہیں ہوئی ہے۔ محکمۂ موسمیات نے بتایا ہے کہ 21 جنوری تک موسم خشک مگر ابر آلود رہنے کا امکان ہے۔
