پٹنہ
جے جے ڈی کے صدر تیج پرتاپ یادو نے جمعہ کے روز پٹنہ کے سیکریٹریٹ پولیس اسٹیشن میں آر جے ڈی کے طلبہ ونگ کے سابق صدر آکاش یادو اور سات دیگر افراد کے خلاف شکایت درج کراتے ہوئے الزام عائد کیا کہ وہ انہیں قتل کرنے کی سازش کر رہے ہیں۔ انہوں نے دعویٰ کیا کہ شکایت باضابطہ طور پر درج کر لی گئی ہے اور تمام متعلقہ نام ایف آئی آر میں شامل کر دیے گئے ہیں۔ ساتھ ہی انہوں نے یہ بھی کہا کہ ان کی شبیہ کو مسلسل خراب کرنے کی کوششیں کی جا رہی ہیں۔
شکایت درج کرانے کے بعد صحافیوں سے گفتگو کرتے ہوئے تیج پرتاپ یادو نے کہا کہ میں سیکریٹریٹ پولیس اسٹیشن پہنچا ہوں۔ مجھے آکاش یادو کی جانب سے جان سے مارنے کی دھمکی دی گئی ہے۔ تمام نام ایف آئی آر میں درج ہیں۔ ابتدا ہی سے میری شبیہ خراب کرنے کی کوشش کی جا رہی ہے۔ میرے والد لالو پرساد یادو علیل ہیں اور یہ میرے والد اور مجھے قتل کرنے کی سازش ہے۔ آکاش یادو مجھے قتل کروانا چاہتے ہیں۔
انہوں نے مزید الزام لگایا کہ یہ دھمکی کسی بڑی سیاسی سازش کا حصہ بھی ہو سکتی ہے۔تیج پرتاپ یادو نے کہا کہ ممکن ہے کہ آکاش یادو اپوزیشن کے ساتھ مل کر میرا قتل کروانا چاہتے ہوں۔ چار افراد زبردستی میری رہائش گاہ میں داخل ہوئے تھے۔ جب تک ہم انہیں پکڑنے کی کوشش کرتے، وہ فرار ہو گئے۔ میں اپنی سکیورٹی کا مطالبہ کرتا ہوں، اور سکیورٹی کے حوالے سے ہم نے عدالت میں بھی درخواست دائر کی ہے۔ اگر ضرورت پڑی تو ہم وزیر اعلیٰ سے بھی ملاقات کریں گے۔
تیج پرتاپ یادو کے مطابق حال ہی میں چند نامعلوم افراد مبینہ طور پر ان کی رہائش گاہ میں داخل ہوئے تھے، تاہم پکڑے جانے سے پہلے ہی فرار ہو گئے۔ ان کا کہنا ہے کہ اس واقعے نے ان کے سکیورٹی خدشات میں مزید اضافہ کر دیا ہے۔انہوں نے بتایا کہ اس معاملے میں سیکریٹریٹ پولیس اسٹیشن میں ایف آئی آر درج کر لی گئی ہے اور تمام متعلقہ افراد کے نام شکایت میں شامل کیے گئے ہیں۔
جے جے ڈی رہنما نے فوری سکیورٹی انتظامات کا مطالبہ کرتے ہوئے کہا کہ وہ پہلے ہی تحفظ کے حصول کے لیے عدالت سے رجوع کر چکے ہیں۔ ان کے مطابق یہ ایک سنجیدہ معاملہ ہے جس میں حکام کی فوری مداخلت ضروری ہے۔
