ٹیکنالوجی کمپنی ایئر ٹرنک ہندوستان میں 3 لاکھ کروڑ روپے کی سرمایہ کاری کرے گی: مودی
نئی دہلی
ٹیکنالوجی کمپنی ایئر ٹرنک نے 2030 تک ہندوستان میں تین لاکھ کروڑ روپے سے زائد سرمایہ کاری کرنے کا منصوبہ بنایا ہے۔ اس سرمایہ کاری کا مقصد ملک کے ڈیجیٹل بنیادی ڈھانچے کی صلاحیت کو مضبوط بنانا اور ہندوستان کو اپنی عالمی ترقیاتی حکمتِ عملی کے ایک اہم مرکز کے طور پر قائم کرنا ہے۔
وزیرِ اعظم نریندر مودی نے ایئر ٹرنک کے بانی اور چیف ایگزیکٹو آفیسر رابن خدہ سے ملاقات کے بعد جمعہ کو اعلان کیا کہ ایشیا-بحرالکاہل اور مغربی ایشیا میں سرگرم ٹیکنالوجی کمپنی ایئر ٹرنک ہندوستان میں تقریباً تین لاکھ کروڑ روپے (30 ارب ڈالر) کی سرمایہ کاری کرے گی اور 5 گیگاواٹ صلاحیت کا ڈیٹا سینٹر تیار کرے گی۔
وزیرِ اعظم نے سوشل میڈیا پلیٹ فارم ایکس پر لکھا کہ ہندوستان کا ڈیجیٹل بنیادی ڈھانچہ غیر معمولی رفتار سے ترقی کر رہا ہے۔ ایئر ٹرنک نے ہندوستان میں تقریباً تین لاکھ کروڑ روپے (30 ارب ڈالر) کی سرمایہ کاری اور 5 گیگاواٹ صلاحیت کے ڈیٹا سینٹر کی تعمیر کے منصوبے کا اعلان کیا ہے۔ یہ ملک کے ڈیجیٹل انفراسٹرکچر شعبے میں مجوزہ سب سے بڑی سرمایہ کاریوں میں سے ایک ہے۔
مودی نے کہا کہ اس طرح کی سرمایہ کاری سے کلاؤڈ کمپیوٹنگ اور مصنوعی ذہانت (اے آئی) کے عالمی مرکز کے طور پر ہندوستان کی حیثیت مزید مضبوط ہوگی۔ اس کے ساتھ روزگار کے نئے مواقع پیدا ہوں گے، مقامی سپلائی چین کو فروغ ملے گا اور اختراع پر مبنی ترقی کو تیز رفتار حاصل ہوگی۔
انہوں نے مزید کہا کہ یہ بات بالکل واضح ہے کہ عالمی ڈیجیٹل معیشت کا مستقبل تیزی سے ہندوستان میں تشکیل پا رہا ہے۔ایئر ٹرنک ایک ہائپر اسکیل ڈیٹا سینٹر کمپنی ہے جو ایشیا-بحرالکاہل اور مغربی ایشیا کے خطے میں کلاؤڈ سروسز، ڈیجیٹل مواد فراہم کرنے والی کمپنیوں اور بڑی کاروباری تنظیموں کے لیے جدید ڈیجیٹل پلیٹ فارم اور انفراسٹرکچر فراہم کرتی ہے۔
