نئی دہلی

ہندوستان میں فارمولا ون ریسنگ کی واپسی کے عمل کو تیز کرنے کے مقصد سے مرکزی وزیرِ کھیل منسکھ مانڈاویا نے ہفتہ کے روز کہا کہ ملک میں بڑے موٹر اسپورٹس مقابلوں کے انعقاد سے متعلق چیلنجز اور فوائد کا جائزہ لینے کے لیے جلد از جلد ایک ٹاسک فورس تشکیل دی جائے گی۔

منتخب میڈیا اداروں سے گفتگو کرتے ہوئے مانڈاویا نے بتایا کہ یہ فیصلہ حال ہی میں تمام متعلقہ فریقوں کے ساتھ ہونے والی میٹنگ کا نتیجہ ہے، جس میں فارمولا ون کے حکام، بدھ انٹرنیشنل سرکٹ کے مالکان، اڈانی گروپ کے نمائندے، فیڈریشن آف موٹر اسپورٹس کلبز آف انڈیا (ایف ایم ایس سی آئی) کے عہدیداران، نوجوان ریس ڈرائیورز اور موٹر اسپورٹس کے شوقین افراد شریک تھے۔

انہوں نے کہا کہ اس اجلاس کا اہم نتیجہ یہ نکلا کہ وزارتِ کھیل چار سے پانچ ارکان پر مشتمل ایک خصوصی ٹاسک فورس تشکیل دے گی، جو ملک میں موٹر اسپورٹس کے نظام کا تفصیلی جائزہ لے گی اور اس شعبے کی ترقی میں حائل رکاوٹوں کا مطالعہ کرے گی۔

انہوں نے مزید کہا کہ یہ ٹاسک فورس ہندوستان میں بڑے موٹر اسپورٹس مقابلوں کے انعقاد سے حاصل ہونے والے بین الاقوامی، معاشی، سیاحتی اور سرمایہ کاری کے فوائد کا جائزہ لے گی۔ اس کے علاوہ شعبے کی پائیدار ترقی کے لیے درکار ترجیحات، بنیادی ڈھانچے اور عملی ضروریات کی نشاندہی کرے گی اور اپنی سفارشات وزارتِ کھیل کو پیش کرے گی۔

ٹاسک فورس میں ایف ایم ایس سی آئی، وزارتِ کھیل، ریاستی حکومت (کیونکہ بدھ انٹرنیشنل سرکٹ گریٹر نوئیڈا، اتر پردیش میں واقع ہے) اور سرکٹ کے مالکان کے نمائندے شامل ہوں گے۔

اگرچہ وزیر نے اس پورے عمل کے لیے کوئی حتمی مدت مقرر نہیں کی، تاہم انہوں نے کہا کہ کام "جلد از جلد" شروع کیا جائے گا اور ٹاسک فورس کو اپنی سرگرمیاں شروع ہونے کے بعد رپورٹ پیش کرنے کے لیے تین ماہ کا وقت دیا جائے گا۔ٹاسک فورس کی سفارشات کی بنیاد پر موٹر اسپورٹس کے فروغ کے لیے ایک جامع پالیسی فریم ورک تیار کیا جائے گا۔

مانڈاویا نے کہا کہ ہمارا ہدف 2028 تک ہندوستان میں فارمولا ون ریس کا انعقاد ہے اور اس مقصد کے لیے ضروری پالیسی اور ڈھانچہ آئندہ سال تک تیار کر لیا جائے گا۔ علاقائی اور نچلی سطح کے موٹر اسپورٹس مراکز کی حوصلہ افزائی اور معاونت پر خصوصی توجہ دی جائے گی۔

انہوں نے اس سے قبل 2027 تک فارمولا ون ریس کرانے کے اپنے ہدف میں ترمیم کرتے ہوئے نیا ہدف 2028 مقرر کیا۔

وزیرِ کھیل نے مزید کہا کہ موٹر اسپورٹس کو حکومت کے 'پلے اِن انڈیا' اقدام کا ایک اہم حصہ بنایا جائے گا۔ فارمولا ون کے گرد ایک مکمل معاشی نظام تشکیل پا سکتا ہے اور اس کھیل کے لیے ہندوستان میں بے پناہ امکانات موجود ہیں کیونکہ اس کے مداحوں کی تعداد بہت زیادہ ہے۔

انہوں نے کہا کہ یہ پورا منصوبہ مرحلہ وار اور منظم انداز میں نافذ کیا جائے گا اور حکومت موٹر اسپورٹس کے فروغ اور ترقی کے لیے ہر ممکن تعاون فراہم کرے گی۔

ہندوستان نے 2011 سے 2013 تک فارمولا ون گراں پری کی میزبانی کی تھی، تاہم بعد میں ٹیکس اور مالیاتی وجوہات کی بنا پر اسے کیلنڈر سے خارج کر دیا گیا تھا۔حال ہی میں فارمولا ون کے چیف ایگزیکٹو آفیسر اسٹیفانو ڈومینیکالی نے تسلیم کیا تھا کہ ہندوستان میں اس کھیل کے لیے غیر معمولی دلچسپی موجود ہے، تاہم انہوں نے اس کی واپسی کے لیے کوئی حتمی وقت نہیں بتایا اور کہا کہ اس منصوبے کی کامیابی کے لیے مناسب سرمایہ کاری اور درست شراکت داروں کی ضرورت ہوگی۔

فارمولا ون کے دسمبر 2025 کے ایک بیان کے مطابق، ہندوستان میں اس کھیل کے مداحوں کی تعداد 7 کروڑ 90 لاکھ تھی، جو صرف چھ ماہ سے بھی کم عرصے میں بڑھ کر 9 کروڑ 80 لاکھ تک پہنچ گئی ہے۔