نئی دہلی: بھارت کے خفیہ ادارے ریسرچ اینڈ اینالیسس ونگ (را) کے سابق سربراہ امرجیت سنگھ دولت نے پاکستان کے ساتھ سفارتی مذاکرات دوبارہ شروع کرنے کی حمایت کرتے ہوئے کہا ہے کہ نئی دہلی کو اسلام آباد کے ساتھ براہِ راست دہشت گردی کے مسئلے پر بات کرنی چاہیے۔

ان کا یہ بیان ایسے وقت میں سامنے آیا ہے جب بھارت اور پاکستان کے 100 سے زائد ممتاز شہریوں کے مشترکہ خط نے دونوں حکومتوں سے امن، معمول کے تعلقات اور دوطرفہ مذاکرات بحال کرنے کی اپیل کی ہے۔

امرجیت سنگھ دولت نے کہا کہ بھارت کا یہ مؤقف درست رہا ہے کہ "دہشت گردی اور مذاکرات ساتھ ساتھ نہیں چل سکتے"، تاہم اب بات چیت کا محور دہشت گردی ہی ہونا چاہیے۔

انہوں نے کہا، "ہمیں پاکستان سے یہ پوچھنا چاہیے کہ وہ دہشت گردی کو پناہ کیوں دے رہا ہے۔ ہم پہلے بھی کہتے رہے ہیں کہ دہشت گردی اور مذاکرات ایک ساتھ نہیں چل سکتے، تو آئیے دہشت گردی ہی پر بات کریں۔"

سابق را سربراہ نے کہا کہ پاکستان کی جموں و کشمیر میں دہشت گردی میں شمولیت کسی سے ڈھکی چھپی نہیں، لیکن اس کے باوجود مکمل طور پر بات چیت بند رکھنا کوئی مؤثر سفارتی حکمت عملی نہیں ہے۔

انہوں نے کہا، "میرے خیال میں بات چیت ہمیشہ ضروری ہوتی ہے۔ یہ کامیاب ہوگی یا نہیں، اس کا فیصلہ وقت کرے گا، لیکن بات نہ کرنا کوئی اچھا متبادل نہیں۔"

دشمن ممالک سے مذاکرات کے حوالے سے انہوں نے کہا، "سفارت کاری میں امن قائم کرنے کے لیے سب سے پہلے اپنے دشمنوں سے ہی بات کی جاتی ہے۔"

امرجیت سنگھ دولت نے واضح کیا کہ وہ یہ رائے کسی سرکاری حیثیت سے نہیں بلکہ ایک عام بھارتی شہری کی حیثیت سے پیش کر رہے ہیں۔ ان کے بقول، "میں اب کسی عہدے پر نہیں ہوں، یہ صرف ایک عام ہندوستانی شہری کی رائے ہے۔"

دوسری جانب بھارتی حکومت نے حالیہ دنوں پاکستان کے ساتھ کسی بھی بیک چینل رابطے کی خبروں سے خود کو الگ کرتے ہوئے واضح کیا ہے کہ ایسی کسی بھی غیر سرکاری بات چیت کی نئی دہلی کے لیے کوئی سرکاری حیثیت یا اہمیت نہیں۔

بھارت اور پاکستان کے تعلقات اپریل 2025 میں جموں و کشمیر کے پہلگام میں ہونے والے دہشت گرد حملے کے بعد مزید کشیدہ ہوگئے تھے، جس میں 26 شہری ہلاک ہوئے تھے۔

امرجیت سنگھ دولت نے اس حملے میں پاکستان کے ملوث ہونے کا الزام دہراتے ہوئے کہا کہ اس تعطل کا مستقل حل بالآخر مذاکرات ہی سے نکل سکتا ہے، اگرچہ موجودہ بھارتی حکومت کا مؤقف ہے کہ ریاستی سرپرستی میں دہشت گردی مکمل طور پر ختم ہونے تک پاکستان سے مذاکرات ممکن نہیں۔