کولکتہ/ آواز دی وائس

آئندہ انتخابات سے قبل ترنمول کانگریس (ٹی ایم سی) اور بی جے پی کے درمیان جاری کشیدگی کے دوران مغربی بنگال کی وزیر اعلیٰ ممتا بنرجی نے بی جے پی اور مرکزی وزیر داخلہ امت شاہ کو براہِ راست چیلنج دیتے ہوئے کہا کہ اگر وہ بنگال چاہتے ہیں تو آئیں، جمہوری طریقے سے مقابلہ کریں اور جیت کر دکھائیں۔

ان کے یہ بیانات سیاسی مشاورتی ادارے آئی پی اے سی کے کولکتہ دفتر میں پیش آئے ایک ڈرامائی واقعے کے پس منظر میں سامنے آئے، جہاں مبینہ جعلی سرکاری نوکری گھوٹالے کے سلسلے میں انفورسمنٹ ڈائریکٹوریٹ (ای ڈی) نے چھاپہ مارا۔ ممتا بنرجی سڑک کے بیچ واقع آئی پی اے سی کے دفتر پہنچیں اور مرکزی ایجنسی پر الزام لگایا کہ اس نے غیر قانونی طور پر پارٹی سے متعلق ڈیٹا، لیپ ٹاپس، موبائل فونز اور اسٹریٹجک دستاویزات ضبط کر لیے۔

ممتا بنرجی نے کہا کہ اگر امت شاہ بنگال چاہتے ہیں تو آئیں، جمہوری طور پر لڑیں اور جیتیں۔ سب کو معلوم ہونا چاہیے کہ کس طرح کی کارروائی کی گئی ہے۔ صبح چھ بجے سے وہ آئے اور پارٹی کا ڈیٹا، لیپ ٹاپس، حکمتِ عملیاں اور موبائل فونز ضبط کر لیے۔ ان کے فرانزک ماہرین نے تمام ڈیٹا منتقل کر لیا۔ میرے خیال میں یہ ایک جرم ہے۔

وزیر اعلیٰ نے کہا کہ آئی پی اے سی کوئی نجی ادارہ نہیں بلکہ آل انڈیا ترنمول کانگریس (اے آئی ٹی سی) کے لیے کام کرنے والی ایک مجاز ٹیم ہے۔ انہوں نے الزام لگایا کہ ای ڈی نے حساس دستاویزات ضبط کیں، جن میں ووٹر لسٹ کی اسپیشل انٹینسیو ریویژن سے متعلق ڈیٹا بھی شامل ہے۔

انہوں نے کہا کہ یہ کوئی نجی تنظیم نہیں ہے۔ یہ آل انڈیا ترنمول کانگریس کی مجاز ٹیم ہے۔ انہوں نے تمام کاغذات اور ڈیٹا لوٹ لیا، جن میں ایس آئی آر سے متعلق بڑی مقدار میں معلومات شامل ہیں۔ ہم ایک رجسٹرڈ سیاسی جماعت ہیں۔ ہم باقاعدگی سے انکم ٹیکس جمع کراتے ہیں۔ اگر ای ڈی کو کوئی معلومات درکار ہیں تو وہ انکم ٹیکس محکمہ سے حاصل کر سکتی ہے۔ پھر ہماری پارٹی کے آئی ٹی ڈپارٹمنٹ پر چھاپہ کیوں مارا گیا؟

ممتا بنرجی نے ایس آئی آر کے دوران ووٹر ناموں کے مبینہ اخراج پر بھی تشویش ظاہر کی اور دعویٰ کیا کہ “منطقی تضاد” کے نام پر 54 لاکھ نام ووٹر لسٹ سے نکال دیے گئے۔ انہوں نے کہا کہ اس سے خاص طور پر خواتین اور نوجوان ووٹرز متاثر ہوئے ہیں، اور دعویٰ کیا کہ ماہرِ معاشیات امرتیہ سین کو بھی نوٹس بھیجا گیا۔

انہوں نے کہا کہ ایس آئی آر کے نام پر ووٹر لسٹ سے بہت سے نام حذف کر دیے گئے۔ حتیٰ کہ امرتیہ سین کو بھی نوٹس بھیجا گیا۔ سب سے زیادہ خواتین ووٹرز کے نام کیوں نکالے گئے؟ نوجوانوں کے نام کیوں؟ انہیں ووٹ ڈالنے کی اجازت نہیں دی جا رہی۔ یہ کیسا نام نہاد ‘منطقی تضاد’ ہے؟ ‘منطقی تضاد’ کے نام پر 54 لاکھ نام ووٹر لسٹ سے ہٹا دیے گئے ہیں۔ اپنا حملہ مزید تیز کرتے ہوئے ممتا بنرجی نے دعویٰ کیا کہ ایس آئی آر کے دباؤ اور اس کے نتائج کے باعث 72 افراد کی موت ہو چکی ہے، اور اس کے لیے بی جے پی کو ذمہ دار ٹھہرایا۔

انہوں نے کہا کہ آپ نے ہماری پارٹی کے آئی ٹی ڈپارٹمنٹ پر چھاپہ کیوں مارا؟ آپ نے تمام کاغذات اور ڈیٹا کیوں لے لیا؟ آپ نے 54 لاکھ نام کیوں حذف کیے؟ ایس آئی آر کے دباؤ اور اس کے نتائج کے سبب 72 لوگوں کی موت ہو چکی ہے۔ ان کی موت کا ذمہ دار کون ہے؟ بی جے پی ایک قاتل پارٹی ہے۔

دوسری جانب، ای ڈی کے ذرائع نے کہا ہے کہ یہ چھاپے سیاسی محرکات کے تحت نہیں ہیں اور تمام کارروائیاں قانونی ضابطوں کے مطابق کی جا رہی ہیں۔ ای ڈی کے مطابق، کچھ افراد، جن میں آئینی عہدوں پر فائز لوگ بھی شامل ہیں، 10 میں سے 2 مقامات پر آئے، اپنے عہدے کا غلط استعمال کرتے ہوئے غیر قانونی طور پر داخل ہوئے اور دستاویزات چھین کر لے گئے۔

یہ ملک گیر تلاشی مہم ایک منظم گروہ کے خلاف چلائی جا رہی ہے، جو مبینہ طور پر جعلی سرکاری نوکریوں کے گھوٹالے میں ملوث ہے اور مختلف سرکاری محکموں میں دھوکہ دہی کے ذریعے تقرریوں کا جھانسہ دے کر امیدواروں کو ٹھگتا رہا۔یہ چھاپے آج صبح سویرے 15 مقامات پر شروع کیے گئے۔ ایجنسی کا پٹنہ زونل دفتر ریاستی پولیس فورسز کے ساتھ قریبی تال میل میں بہار میں تین، مغربی بنگال میں دو، کیرالہ میں چار، تمل ناڈو میں ایک، گجرات میں ایک اور اتر پردیش میں چار مقامات پر تلاشی کارروائیاں انجام دے رہا ہے۔