نئی دہلی: سپریم کورٹ نے جمعہ کے روز مرکزی حکومت کو ہدایت دی کہ وزارتِ خارجہ میں ایک نوڈل افسر مقرر کیا جائے، جو روس۔یوکرین جنگ میں ہلاک، لاپتا یا زخمی ہونے والے ہندوستانی شہریوں کے اہلِ خانہ کے ساتھ رابطہ اور ہم آہنگی کا کام انجام دے۔

چیف جسٹس سوریا کانت، جسٹس جوئمالیہ باگچی اور جسٹس وی موہنا پر مشتمل بنچ نے وزارتِ خارجہ کو یہ بھی ہدایت دی کہ ہلاک ہونے والوں کی لاشوں کی شناخت کے لیے اہلِ خانہ کے ڈی این اے کے نمونوں کا ملاپ (DNA Matching) کرانے میں سہولت فراہم کی جائے۔

عدالت نے مزید کہا کہ وزارتِ خارجہ متاثرہ خاندانوں کو نئی دہلی میں قائم روسی سفارت خانے کے سامنے معاوضے کے دعوے دائر کرنے میں مدد فراہم کرے اور تمام متعلقہ معلومات اور پیش رفت سے انہیں مقامی زبانوں میں آگاہ کرے۔

سپریم کورٹ نے نیشنل لیگل سروسز اتھارٹی (NALSA) اور ریاستی قانونی خدماتی اداروں کو بھی ہدایت دی کہ وہ متاثرہ خاندانوں کو اپنے عزیزوں کی میتیں حاصل کرنے اور معاوضے کے دعووں کی کارروائی میں ہر ممکن قانونی مدد فراہم کریں۔ یہ ہدایات عدالت نے ان خاندانوں کی جانب سے دائر درخواست کی سماعت کے دوران جاری کیں، جن کا الزام ہے کہ ان کے رشتہ دار روس۔یوکرین جنگ میں لڑنے کے لیے بھرتی کیے جانے کے بعد یا تو ہلاک ہو گئے یا لاپتا ہیں۔