نئی دہلی
سپریم کورٹ نے روس میں پھنسے ہوئے ہندوستانیوں کے معاملے میں دائر 26 درخواستوں پر حکومت سے جواب طلب کر لیا ہے۔ عدالت نے وزارت خارجہ سمیت تمام ریاستی حکومتوں کو نوٹس جاری کرتے ہوئے جواب دینے کے لیے چار ہفتوں کا وقت دیا ہے۔ یہ تمام افراد طالب علم یا سیاحتی ویزا پر روس گئے تھے۔ درخواست میں ان ہندوستانی شہریوں کے مبینہ استحصال کے خلاف کارروائی کی مانگ کی گئی ہے، جنہیں روس میں رہتے ہوئے مبینہ طور پر یوکرین کے خلاف جنگ میں حصہ لینے پر مجبور کیا جا رہا ہے۔
درخواست میں متاثرہ افراد کے اہل خانہ کی جانب سے دی گئی نمائندگیوں پر وزارت خارجہ کی مبینہ بے عملی کو بھی اجاگر کیا گیا ہے۔ اس میں روس سے 26 ہندوستانیوں کی محفوظ واپسی کا مطالبہ کیا گیا ہے۔ اس سلسلے میں دائر حبسِ بے جا (ہیبیئس کارپس) درخواست پر سپریم کورٹ نے مرکز کو نوٹس جاری کیا ہے۔
درخواست گزار کے وکیل نے کہا کہ ریاست کی جانب سے مسلسل بے عملی دیکھنے کو مل رہی ہے۔ درخواست میں کہا گیا ہے: "ہم روس میں پھنسے ہوئے ہیں اور اپنی مرضی کے خلاف ایک غیر ملکی ریاست کے لیے یوکرین کے خلاف جنگ لڑ رہے ہیں۔
سولیسٹر جنرل تشار مہتا نے کہا کہ وہ اس معاملے کی جانچ کریں گے۔ عدالت نے اپنے حکم میں کہا کہ سولیسٹر جنرل نے ہدایات حاصل کرنے کے لیے وقت مانگا ہے، اس لیے ایک ہفتے کے اندر جواب داخل کرنے کا نوٹس جاری کیا جائے۔
درخواست گزار کے وکیل نے مزید کہا کہ ہم میں سے کچھ لوگ یا تو مارے جا چکے ہیں یا زخمی ہیں، اور ہم انتہائی مشکل حالات میں ہیں۔" چیف جسٹس نے کہا کہ انہوں نے سولیسٹر جنرل سے اس معاملے پر غور کرنے کی درخواست کی ہے۔
درخواست میں یہ بھی کہا گیا ہے کہ متاثرہ افراد کے اہل خانہ کو آخری پیغامات ستمبر اور اکتوبر 2025 کے درمیان موصول ہوئے تھے۔ ان پیغامات سے معلوم ہوتا ہے کہ وہ کوپیانسک، سیلیدووے، ماکیئیوکا اور چیلیابنسک جیسے فعال جنگی علاقوں میں یا ان کے آس پاس تعینات تھے۔ انہوں نے اپنی سلامتی کے حوالے سے خدشات ظاہر کیے اور بتایا کہ وہ ان علاقوں سے نکلنے سے قاصر ہیں۔
